ການຊ້ອມຮົບລະຫ່ວາງກອງບັນຊາການທະຫານຊາຍແດນແຂວງເຊີນລາ ສສ ຫວຽດນາມ ແລະ ກອງບັນຊາການທະຫານແຂວງຫຼວງພະບາງ ໄດ້ສໍາເລັດລົງເມື່ອບໍ່ດົນມານີ້ ທີ່ກອງບັນຊາການທະຫານຊາຍແດນແຂວງເຊິນລາ ສສ ຫວຽດນາມ ເປັນເຈົ້າພາບ, ໂດຍການເຂົ້າຮ່ວມຂອງ ສະຫາຍ ພົວ ເລວັນຟຸກ ຮອງຫົວໜ້າກອງບັນຊາການທະຫານທະຫານຊາຍແດນ ກະຊວງປ້ອງກັນປະເທດ ສສ ຫວຽດນາມ, ມີສະຫາຍ ພົວ ວິລ່ຽມ ວົງທິສານ ຫົວໜ້າການທະຫານກອງບັນຊາການທະຫານແຂວງຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ການຊ້ອມຮົບຮ່ວມຄັ້ງນີ້, ເພື່ອເປັນການຮ່ວມມືປ້ອງກັນສະກັດກັ້ນ ແລະ ແກ້ໄຂສະພາບການ, ປະກົດການຫຍໍ້ທໍ້ຕ່າງໆຢູ່ຂອບເຂດບໍລິເວນຊາຍແດນໃຫ້ຫຼຸດໜ້ອຍຖອຍລົງ, ທັງເປັນການສະແດງໃຫ້ເຫັນເຖິງການພົວພັນຮ່ວມມືປະສານສົມທົບໃນວຽກງານຄຸ້ມຄອງປ້ອງກັນຊາຍແດນລະຫ່ວາງສອງຝ່າຍ, ຕາມຂໍ້ຕົກລົງວ່າດ້ວຍການຮ່ວມມືວຽກງານຄຸ້ມຄອງ, ປ້ອງກັນຊາຍແດນ, ກົມຊາຍແດນ, ກົມໃຫຍ່ເສນາທິການ, ກະຊວງປ້ອງກັນປະເທດລາວ ແລະ ກອງບັນຊາການທະຫານຊາຍແດນກະຊວງປ້ອງກັນປະເທດແຫ່ງ ສສ ຫວຽດນາມ ທີ່ໄດ້ລົງນາມໃນວັນທີ 16 ຕຸລາ 2018.
ການຊ້ອມຮົບຮ່ວມລະຫວ່າງກອງບັນຊາການທະຫານແຂວງຫຼວງພະບາງ ກັບກອງບັນຊາການທະຫານແຂວງເຊີນລາ, ດຽນບຽນຄັ້ງນີ້ ຍັງເປັນການຍົກລະດັບຂີດຄວາມສາມາດໃນການນຳພາ-ຊີ້ນຳ ແລະ ບັນຊາທາງດ້ານທິດສະດີ ແລະ ພາກປະຕິບັດຕົວຈິງຢູ່ພື້ນທີ່ຂອບເຂດບໍລິເວນຊາຍແດນຂອງຕົນ ແລະ ການຮ່ວມມືແກ້ໄຂສະພາບການຢູ່ຕາມບໍລິເວນຊາຍແດນ ໃນການປະຕິບັດໜ້າທີ່ຂອງກຳລັງທະຫານຊາຍແດນທັງສອງຝ່າຍ, ໂດຍສະເພາະແມ່ນການແກ້ໄຂການເຄື່ອນຍ້າຍຖິ່ນລຳເນົາແບບເສລີ, ການແຕ່ງງານ ແລະ ການເຂົ້າ-ອອກເມືອງບໍ່ຖືກຕ້ອງຕາມກົດໝາຍ, ການແກ້ໄຂຄ້າຂາຍເຖື່ອນ ແລະ ການແກ້ໄຂປະກົດການຫຍໍ້ທໍ້ຕ່າງໆໃນຂອບເຂດບໍລິເວນຊາຍແດນໃຫ້ຫຼຸດໜ້ອຍຖອຍລົງ, ເພື່ອປະກອບ ສ່ວນສ້າງຊາຍແດນໃຫ້ກາຍເປັນຊາຍແດນມິດຕະພາບ ແລະ ການຮ່ວມມືພັດທະນາຢ່າງແທ້ຈິງ.
ໂອກາດນີ້ຜູ້ເຂົ້າຮ່ວມຍັງໄດ້ຊົມການຊ້ອມຮົບຮ່ວມເທິງແຜນທີ່ ລະຫວ່າງກອງບັນຊາການທະຫານຊາຍແດນແຂວງເຊີນລາ ກັບກອງບັນຊາການທະຫານແຂວງຫຼວງພະບາງ ເພື່ອສ້າງຄວາມຊຳນິຊຳນານ ແລະ ຄວາມເປັນເອກະພາບໃນການປະຕິບັດໜ້າທີ່ວຽກງານປ້ອງກັນຊາຍແດນໃຫ້ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ. ພ້ອມດຽວກັນນີ້ຍັງໄດ້ມອບໃບຍ້ອງຍໍໃຫ້ກົມກອງລວມໝູ່ ແລະ ບຸກຄົນທີ່ມີຜົນງານດີເດັ່ນຢ່າງສົມກຽດ.
ຂ່າວ-ພາບ: ສົມພອນ ສຸວັນທອນ
