ເຜີຍແຜ່ຜົນການສຳຫຼວດສະຖິຕິກະສິກຳ ແລະ ການສຳຫຼວດເສດຖະກິດ ທົ່ວປະເທດ
………
ກອງປະຊຸມເຜີຍແຜ່ວຽກງານສະຖິຕິ, ຜົນການສຳຫຼວດສະຖິຕິກະສິກຳ ແລະ ການສຳຫຼວດເສດຖະກິດ ທົ່ວປະເທດ ຄັ້ງທີ III ປີ 2019/2020 ໃຫ້ແກ້ການນໍາຂັ້ນເມືອງ (148 ເມືອງ) ໃນຂອບເຂດທົ່ວປະເທດ ໄດ້ຈັດຂຶ້ນໃນວັນ 30 ມີນາ ນີ້ ທີ່ສູນສະຖິຕິແຫ່ງຊາດ. ໂດຍການເປັນປະທານ ຂອງທ່ານ ນາງ ພອນສະຫຼີ ສຸກສະຫວັດ ຫົວໜ້າສູນສະຖິຕິແຫ່ງຊາດ, ມີເລຂາພັກ, ຄະນະປະຈໍາ, ເຈົ້າເມືອງ, ຮອງເຈົ້າ ແລະ ພາກສ່ວນທີ່ກ່ຽວຂອງເຂົ້າຮ່ວມ.
ຈຸດປະສົງຂອງກອງປະຊຸມໃນນີ້ແມ່ນເພື່ອສ້າງຄວາມເຂົ້າໃຈຢ່າງເລິກເຊິ່ງຕໍ່ການສົ່ງເສີມການນຳໃຊ້ສະຖິຕິທາງການ, ກະຕຸກຊຸກຍູ້ໃຫ້ສັງຄົມປະກອບສ່ວນຂໍ້ມູນຂ່າວສານສະຖິຕິ. ຊຸກຍູ້ໃຫ້ຫ້ອງການ ແຜນການຂອງເມືອງ ແລະ ອໍານາດປົກຄອງບ້ານປະສານສົມທົບ ແລະ ຈັດຕັ້ງປະຕິບັດ ລະບົບການເກັບກຳ ແລະ ລາຍງານຂໍ້ມູນ ໂດຍຜ່ານການນຳໃຊ້ ສະຖິຕິຂັ້ນບ້ານ ຕາມການລາຍງານ ລະບົບບໍລິຫານ; ລະດົມປະຊາຊົນບັນດາເຜົ່າເຂົ້າໃນຂະບວນການເກັບກຳຂໍ້ມູນ ເປັນຕົ້ນການສໍາຫຼວດພົນລະເມືອງ 2025, ການສໍາຫຼວດເສດຖະກິດ 2023-2024, ການສຳຫຼວດດັດຊະນີໝາຍສັງຄົມ 2023 ແລະ ການຊົມໃຊ້ ແລະ ໃຊ້ຈ່າຍຄົວເຮືອນຄັ້ງທີ 7 2023-2024 ແລະ ການສຳຫຼວດ ກະສິກຳເພື່ອໃຫ້ມີຂໍ້ມູນ ຄົບຖ້ວນ ສາມາດຕອບສະໜອງຂໍ້ມູນເຂົ້າໃນການວາງແຜນພັດທະນາເສດຖະກິດ-ສັງຄົມແຫ່ງຊາດ, ສ່ວນໜຶ່ງກໍເປັນການເຜີຍແຜ່ສະຖິຕິ ທາງການໃຫ້ແກ່ບັນດາທ່ານເພື່ອຮັບຮູ້ ແລະ ເຂົ້າໃຈຄວາມຫຍຸ້ງຍາກຄວາມທ້າທາຍໃນການເກັບກຳ ແລະ ພັດທະນາ ຂໍ້ມູນສະຖິຕິທາງການໃນລະບົບສະຖິຕິແຫ່ງຊາດ ລວມທັງແຜນດຳເນີນງານ.
ກອງປະຊຸມຄັ້ງນີ້ ໄດ້ລົງເລິກເຜີຍແຜ່ຜົນການສຳຫຼວດສະຖິຕິກະສິກຳ ແລະ ການສຳຫຼວດເສດຖະກິດ ທົ່ວປະເທດ ຄັ້ງທີ່ III ເພື່ອສ້າງຄວາມເຂົ້າໃຈການພັດທະນາທາງດ້ານເສດຖະກິດ, ສະພາບກໍາລັງແຮງ ງານ, ອັດຕາເງິນເຟີ້, ສະຖິຕິພົນລະເມືອງ, ຄວາມຄືບໜ້າໃນການພັດທະນາດ້ານສັງຄົມເຊັ່ນ: ສຶກສາ, ສາທາລະນະສຸກ ແລະ ອື່ນໆ.
ສຳລັບຫົວຂໍ້ ແລະ ເນື້ອໃນທີ່ນຳສະເໜີຄັ້ງນີ້ ປະກອບມີຜົນການສຳຫຼວດສະຖິຕິກະສິກຳ ແລະ ການສຳຫຼວດເສດຖະກິດ ທົ່ວປະເທດ ຄັ້ງທີ III ແລະ ແຜນໃນຕໍ່ໜ້າ ທີ່ຈະລົງເລິກ ໃນການສືບຕໍ່ວິເຄາະວິໄຈ ແລະ ການຂຽນບົດລາຍງານດັ່ງກ່າວ ຂັ້ນແຂວງ ແລະ ເມືອງ, ສະຫຼຸບຜົນກ່ຽວກັບການຈັດຕັ້ງປະຕິບັດວຽກງານສະຖິຕິຮັບໃຊ້ແຜນພັດທະນາເສດຖະກິດ-ສັງຄົມແຫ່ງຊາດ (ໃນນີ້: ຈະສະເໜີລວມກ່ຽວກັບການຈັດຕັ້ງລະບົບສະຖິຕິແຫ່ງຊາດ, ບົດບາດ ແລະ ໜ້າທີ່ໃນການຜະລິດ ແລະ ເຜີຍແຜ່ຂໍ້ມູນສະຖິຕິທາງການ, ຄວາມຕ້ອງການ ແລະ ການສະຫນອງຂໍ້ມູນສະຖິຕິທາງການໃນ ສປປ ລາວ, ແຜນພັດທະນາລະບົບສະຖິຕິແຫ່ງຊາດ ໂດຍສະເພາະ ແຜນໃນປີ 2023), ການຜະລິດຕົວຊີ້ບອກສະຖິຕິ ທາງດ້ານເສດຖະກິດ-ສັງຄົມ ແລະ ສິ່ງແວດລ້ອມຮັບໃຊ້ການຕິດຕາມ ແລະ ປະເມີນແຜນພັດທະນາເສດຖະກິດ-ສັງຄົມແຫ່ງຊາດ, ການນໍາສະ ເໜີກ່ຽວກັບ ລວມຍອດຜະລິດຕະພັນພາຍໃນ, ເງິນເຟີ້, ສະຖິຕິຄວາມທຸກຍາກ ແລະ ການນໍາໃຊ້ ແລະ ເຜີຍແຜ່ສະຖິຕິທາງການ.
(ຂ່າວ-ພາບ: ສຳນານ-ພັດ)
