ແຂວງຄໍາມ່ວນ ໄດ້ຈັດຕັ້ງປາຖະກະຖາສອງວັນປະຫວັດສາດຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22 ມີນາ 1955 – 22 ມີນາ 2023) ແລະ ວັນສ້າງຕັ້ງນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ (21 ມີນາ 1946-21 ມີນາ 2023) ຄົບຮອບ 77 ປີ ຂຶ້ນໃນວັນທີ 20 ມີນາ ຜ່ານມາ ທີ່ສະໂມສອນຂອງແຂວງ ໂດຍການໃຫ້ກຽດເຜີຍແຜ່ຂອງ ສະຫາຍ ບົວສອນ ບຸບຜາວັນ ອະດີດກໍາມະການກົມການເມືອງສູນກາງພັກ ອະດີດນາຍົກລັດຖະມົນຕີ, ໂດຍການເຂົ້າຮ່ວມຮັບຟັງຂອງ ສະຫາຍ ວັນໄຊ ພອງສະຫວັນ ກໍາມະການສູນກາງພັກ ເລຂາພັກແຂວງ ເຈົ້າແຂວງຄໍາມ່ວນ, ມີຕາງໜ້າຄະນະ ອພສ ແຂວງ, ບັນດາສະຫາຍໃນຄະນະບໍລິຫານງານພັກແຂວງ, ອະດີດພະນັກງານອາວຸໂສບໍານານ, ຕາງໜ້າພະແນກການອ້ອມຂ້າງແຂວງ, ນັກຮຽນ-ນັກສຶກສາເຂົ້າຮ່ວມ.
ໃນພິທີ ສະຫາຍ ບົວສອນ ບຸບຜາວັນ ໄດ້ຍົກໃຫ້ເຫັນເຖິງປະຫວັດສາດແຫ່ງການກໍາເນີດເຕີບໃຫຍ່ຂະຫຍາຍຕົວຂອງພັກ ເນື່ອງໃນວັນສ້າງຕັ້ງພັກປະຊາຊົນ ປະຕິວັດລາວ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງ ເພື່ອເຮັດໃຫ້ສະມາຊິກ, ພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນລາວບັນດາເຜົ່າໄດ້ຄົ້ນຄວ້າເຊື່ອມຊຶມ, ປະຫວັດການກໍາເນີດ, ທາດແທ້ອຸດົມການກໍຄືຜົນງານການນໍາພາຂອງພັກໃນຕະຫຼອດໄລຍະ 68 ປີ ຜ່ານມາ ເພື່ອພ້ອມກັນນໍາເອົາມູນເຊື້ອ ແລະ ຜົນງານອັນຍິ່ງໃຫຍ່ຂອງພັກປະຊາຊົນ ປະຕິວັດລາວເຂົ້າໃນການປະຕິບັດວຽກງານຕົວຈິງຂອງຂະແໜງການ ແລະ ທ້ອງຖິ່ນໃຫ້ບັນລຸຕາມຄາດໝາຍທີ່ພັກໄດ້ກໍານົດໄວ້.
ສໍາລັບມູນເຊື້ອ 21 ມີນາ 1946 ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດແມ່ນເປັນບັ້ນຮົບໜຶ່ງທີ່ມີຄວາມໝາຍສໍາຄັນຕໍ່ການຕໍ່ສູ້ປ້ອງກັນຕົວເມືອງທ່າແຂກຈາກອິດທິກໍາລັງຂອງຈັກກະພັດລ່າເມືອງຂຶ້ນແບບເກົ່າຜູ້ຮຸກຮານ ເວົ້າສະເພາະ, ເວົ້າລວມ ກໍຄືປະຊາຊົນລາວບັນດາເຜົ່າໃນທົ່ວປະເທດ, ພ້ອມນັ້ນສະຫາຍຍັງໄດ້ຍົກໃຫ້ເຫັນສະພາບການ ແລະ ການກະກຽມການຕໍ່ສູ້ຕ້ານພວກລ່າເມືອງຂຶ້ນຝຣັ່ງຂອງໜ່ວຍພັກເມືອງທ່າແຂກ , ເຫດການ ແລະ ການຕໍ່ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງທ່າແຂກ, ຄວາມໝາຍຄວາມສໍາຄັນຂອງບັ້ນຮົບປ້ອງກັນຕົວເມືອງທ່າແຂກ ແລະ ການຜັນຂະຫຍາຍມູນເຊື້ອ 21 ມີນາ ຕິດພັນກັບການຍົກສູງບົດບາດດ້ານການນໍາພາຂອງພັກເປັນຕົ້ນແມ່ນການສຶກສາອົບຮົມຈິດໃຈຮັກຊາດ, ຮັກລະບອບປະຊາທິປະໄຕປະຊາຊົນ ກ້າວຂຶ້ນສັງຄົມນິຍົມພາຍໃຕ້ການນໍາຂອງພັກ. (ຂ່າວ-ພາບ: ແດງສະຫວັດ ແສນພານິດ)
