ແຫຼ່ງທ່ອງທ່ຽວຕາດເລາະ-ຕາດຮັງ ແຂວງສາລະວັນ ເປັນໜຶ່ງສະຖານທີ່ທ່ອງທ່ຽວ ທີ່ໄດ້ຮັບຄວາມນິຍົມຊົມຊອບຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ໂດຍສະເພາະເນື່ອງໃນໂອກາດວັນສຳຄັນຕ່າງໆ ຫຼື ເທດສະການບຸນປີໃໝ່ລາວທຸກໆປີ ແມ່ນມີນັກທ່ອງທ່ຽວຈຳນວນຫຼວງຫຼາຍມາທ່ຽວຫຼິ້ນນໍ້າ, ທ່ຽວຊົມ, ພັກຜ່ອນ ໃນໄລຍະສະເຫຼີມສະຫຼອງບຸນປີໃໝ່ລາວ.
ສຳລັບປີນີ້, ແມ່ນໄດ້ມີການຫ້າງຫາກະກຽມແຕ່ຫົວທີ ຂອງຜູ້ປະກອບການໃນເຂດດັ່ງກ່າວ ຮ່ວມມື ຈັດສັນສະຖານທີ່ ເປັນຕົ້ນ: ຈັດສັນບ່ອນຫຼິ້ນນໍ້າ, ສ້າງຂົວຜາກະແຕະ ຍ່າງທ່ຽວຊົມນໍ້າຕົກຕາດໃນຂອບເຂດອ້ອມຮອບຕາດຮັງ, ຂົວໄມ້ໄຜ່ລຽນລໍາ, ທາງຍ່າງ, ບ່ອນຖ່າຍຮູບ, ຕູບນັ່ງຫຼິ້ນ, ຫ້ອງນໍາສາທາລະນະ, ບ່ອນຖິ້ມຂີ້ເຫຍື້ອສິ່ງເສດເຫຼືອຕ່າງງໆ, ສະຖານທີ່ຈໍາໜ່າຍສິນຄ້າ ແລະ ອື່ນໆ ເພື່ອຄວາມສະດວກສະບາຍ ຄວາມເປັນລະບຽບຮຽບຮ້ອຍ ແລະ ບໍ່ໃຫ້ມີຄວາມແອອັດ. ການປຶກສາຫາລືຄັ້ງນີ້, ຍັງໄດ້ມີການແລກປ່ຽນຄຳຄິດຄຳເຫັນ, ຄຳສະເໜີຕ່າງໆ ເພື່ອກະກຽມຄວາມພ້ອມຫຼາຍດ້ານໃຫ້ເປັນລະບົບລະບຽບ ແລະ ສ້າງຄວາມພໍໃຈຕໍ່ຜູ້ມາທ່ຽວ.
ກອງປະຊຸມ, ສະຫຼຸບປະເມີນຄືນການປັບປຸງແຫຼ່ງທ່ອງທ່ຽວ ຕາດເລາະ-ຕາດຮັງ ເພື່ອກະກຽມຄວາມພ້ອມຕ້ອນຮັບງານເທດສະການງານປີໃໝ່ລາວ ໄດ້ຈັດຂຶ້ນໃນຫວ່າງແລ້ວນີ້ ທີ່ສູນຂໍ້ມູນທ່ອງທ່ຽວຕາດເລາະ ໂດຍການເຂົ້າຮ່ວມຂອງທ່ານ ຄຳໄພ ໄຊຍະເດດ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ມີພາກສ່ວນກ່ຽວຂ້ອງຈາກແຂວງ, ເມືອງ, ບ້ານອ້ອມຂ້າງ ແລະ ຜູ້ປະກອບການເຂົ້າຮ່ວມ.
(ຂ່າວ-ພາບ: ທິດລານີ ໂຄດໂຍທາ).
