ວິທະຍາໄລເຕັກນິກລາວ-ເຢຍລະມັນ ຫຼື ວຕລຢ ແລະ ສະມາຄົມທຸລະກິດເຄື່ອງເຢັນລາວ ໄດ້ຮ່ວມມືກັນ ໄລຍະ 3 ປີ ຊ່ວຍສົ່ງເສີມວຽກງານທາງດ້ານວິຊາການ ເພື່ອສ້າງບຸກຄະລາກອນໃນສາຂາການຕິດຕັ້ງ, ສ້ອມແປງ ເຄື່ອງທຳຄວາມເຢັນ-ເຄື່ອງປັບອາກາດໃຫ້ມີຄຸນນະພາບ ສອດຄ່ອງກັບຄວາມຕ້ອງການຂອງຕະຫຼາດແຮງງານຢ່າງມີປະສິດທິພາບ ແລະ ປະສິດທິຜົນ.
ພິທີເຊັນສັນຍາການຮ່ວມມືທາງດ້ານວິຊາການ ລະຫວ່າງ ວິທະຍາໄລເຕັກນິກລາວ-ເຢຍລະມັນ ແລະ ສະມາຄົມທຸລະກິດເຄື່ອງເຢັນລາວ ໄດ້ມີຂຶ້ນເມື່ອບໍ່ດົນມານີ້ ທີ່ວິທະຍາໄລດັ່ງກ່າວ, ໂດຍຕາງໜ້າລົງນາມຂອງທ່ານ ຄຳສະໄຫວ ຍ່ອມມີລາວົງ ຜູ້ອຳນວຍການ ວິທະຍາໄລເຕັກນິກລາວ-ເຢຍລະມັນ ແລະ ທ່ານ ເຂັມພອນ ຈັນທະວອນ ປະທານສະມາຄົມທຸລະກິດເຄື່ອງເຢັນລາວ, ມີທ່ານ ໜູພັນ ອຸດສາ ຫົວໜ້າກົມອາຊີວະສຶກສາ, ທ່ານ ວຽງສອນ ເລືອງຄຳສິງ ຮອງຫົວໜ້າພະແນກຄຸ້ມຄອງອົງການຈັດຕັ້ງສັງຄົມ ກົມພັດທະນາບໍລິຫານລັດ ກະຊວງພາຍໃນ, ທ່ານ ສັກສີ ວິໄລສັກ ວິຊາການອາວຸໂສ ກົມຄຸ້ມຄອງການປ່ຽນແປງສະພາບດິນຟ້າອາກາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍບັນດາຮອງຜູ້ອຳນວຍການ, ຮອງປະທານ, ຄະນະສາມາຄົມເຄື່ອງເຢັນ, ວິຊາການຈາກກົມພັດທະນາບໍລິຫານລັດ ກະຊວງພາຍໃນ, ຫົວໜ້າພະແນກ/ພາກວິຊາ, ຄະນະຮັບຜິດຊອບ ຕະຫຼອດຮອດຄູ ແລະ ນັກສຶກສາ ໃນສາຂາທີ່ກ່ຽວຂ້ອງຮ່ວມເປັນສັກຂີພິຍານ.
ການຮ່ວມມືກັນຂອງສອງຝ່າຍໃນຄັ້ງນີ້, ແມ່ນມີໄລຍະ 3 ປີ ໂດຍຈະພ້ອມກັນສ້າງບຸກຄະລາກອນໃນສາຂາການຕິດຕັ້ງ, ສ້ອມແປງ ເຄື່ອງທຳຄວາມເຢັນ-ເຄື່ອງປັບອາກາດໃຫ້ມີຄຸນນະພາບ ເພື່ອໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ; ແລກປ່ຽນທາງດ້ານວິຊາການ ເຊັ່ນ: ປັບປຸງຫຼັກສູດ, ສ້າງຄູ່ມື; ຍົກລະດັບຄວາມຮູ້, ທັກສະຂອງຄູ ແລະ ພະນັກງານ ໂດຍການຈັດຕັ້ງການຝຶກອົບຮົມແລກປ່ຽນປະສົບການ ທັງພາຍໃນ ແລະ ຕ່າງປະເທດ ແລະ ຈັດຕັ້ງການຮຽນການສອນອາຊີວະສຶກສາແບບຄວບຄູ່ (Dual Cooperative Training (DCT)) ໃນສາຂາການຕິດຕັ້ງ ແລະ ສ້ອມແປງເຄື່ອງທໍາຄວາມເຢັນ-ເຄື່ອງປັບອາກາດຢ່າງມີຄຸນນະພາບ ແລະ ປະສິດທິຜົນເປັນວົງກວ້າງ.
ໃນພິທີ, ທ່ານ ໜູພັນ ອຸດສາ ໄດ້ຍົກໃຫ້ເຫັນເຖິງຄວາມໝາຍສຳຄັນ ແລະ ບົດບາດຂອງສະຖານປະກອບການ ໃນການປະກອບສ່ວນເຂົ້າໃນການພັດທະນາມາດຖານອາຊີບ, ການພັດທະນາຫຼັກສູດ ແລະ ຈັດການຮຽນການສອນອາຊີວະສຶກສາ ແລະ ຝຶກອົບຮົມວິຊາຊີບໃນຮູບແບບຕ່າງໆ. ພ້ອມດຽວກັນນັ້ນ, ໄດ້ຮຽກຮ້ອງໃຫ້ຄູ່ຮ່ວມສັນຍາ ແລະ ທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນວາງແຜນຈັດຕັ້ງປະຕິບັດແຕ່ລະໄລຍະ, ມີການຕິດຕາມກວດກາ, ຖອດຖອນບົດຮຽນຮ່ວມກັນຢ່າງເປັນປົກກະຕິ ເພື່ອຮັບປະກັນຜົນສຳເລັດ ຂອງການຮ່ວມມື.
ຂ່າວໂດຍ ສົງການ ພັນແພງດີ
