ກະຊວງແຜນການ ແລະ ການລົງທຶນ ໄດ້ຈັດກອງປະຊຸມຄະນະຊີ້ນໍາລວມໂຄງການ “ສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການຂຶ້ນ ໃນວັນທີ 2 ກຸມພານີ້ ທີ່ນະຄອນຫຼວງວຽງຈັນ ພາຍໃຕ້ການເປັນປະທານ ຂອງທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນທັງເປັນປະທານຄະນະຊີ້ນຳລວມຂອງໂຄງການ, ເຂົ້າຮ່ວມໂດຍມີຄະນະຊີ້ນຳລວມຂອງໂຄງການ ຊຶ່ງເປັນຕົວແທນຈາກຂະແໜງການຕ່າງໆ ທີ່ກ່ຽວຂ້ອງເຊັ່ນ: ຂະແໜງສາທາ, ສຶກສາ, ກະສິກຳ, ສະຖິຕິ-ແຜນການ ພ້ອມດ້ວຍບັນດາແຂກຖືກເຊີນ.
ຈຸດປະສົງກອງປະຊຸມເພື່ອເປັນການລາຍງານຜົນການຈັດຕັ້ງປະຕິບັດໂຄງການ, ທົບທວນຄືນບັນດາຂໍ້ສະດວກຂໍ້ຫຍຸ້ງຍາກ ແລະ ບົດຮຽນຖອດຖອນໄດ້ໃນໄລຍະໜຶ່ງປີທີ່ຜ່ານມາ ຊຶ່ງໃນປີ 2022 ທີ່ຜ່ານມາທາງໂຄງການແມ່ນສໍາເລັດໃນຫຼາຍໆ ດ້ານ ໂດຍສະເພາະສຳເລັດການສ້າງເວັບໄຊຂອງໂຄງການ NIPN ຊຶ່ງໃນປັດຈຸບັນກໍາລັງປັບປຸງເປັນ Version 2 ຄະນະທີມງານວິຊາການພາຍໃນໂຄງການໄດ້ຮັບການຍົກລະດັບວິເຄາະວິໄຈຢ່າງເປັນປົກກະຕິ ພ້ອມນັ້ນໂຄງການຍັງໄດ້ສຳເລັດສ້າງບົດຄົ້ນຄວ້າ ແລະ ບົດສະຫຼຸບຫຍໍ້ທາງນະໂຍບາຍຈຳນວນໜຶ່ງ ແລະ ໃນແຕ່ລະປີ, ໂຄງການໄດ້ຈັດກອງປະຊຸມເຜີຍແຜ່ຜົນການຄົ້ນຄວ້າປະຈຳປີ ຂອງໂຄງການສ້າງຖານຂໍ້ມູນຂ່າວສານແຫ່ງຊາດ ດ້ານໂພຊະນາການ (NIPN day) ໃຫ້ແກ່ຂະແໜງການກ່ຽວຂ້ອງກັບວຽກງານໂພຊະນາການໃນຂອບເຂດທົ່ວປະເທດ ຊຶ່ງໄດ້ຈັດຂຶ້ນທຸກໆປີ. ພ້ອມກັນນັ້ນຍັງໄດ້ຈັດກອງປະຊຸມເຜີຍແຜ່ຜົນການຄົ້ນຄວ້າດັ່ງກ່າວໃຫ້ແກ່ບັນດາສະມາຊິກສະພາ ແລະ ບັນດານັກຄົ້ນຄວ້າ, ຄູ-ອາຈານ ແລະ ນັກສຶກສາ ຢູ່ບັນດາວິທະຍາໄລຕ່າງໆ ພ້ອມດຽວກັນນີ້ກອງປະຊຸມຍັງໄດ້ຜ່ານແຜນການຈັດຕັ້ງປະຕິບັດວຽກງານທີ່ເປັນບຸລິມະສິດຂອງໂຄງການປະຈໍາປີ 2023 ໂດຍໄດ້ຮັບການເຫັນດີ ແລະ ຮັບຮອງໂດຍຄະນະຊີ້ນໍາລວມຂອງໂຄງການ.
ທ່ານ ສະຖາບັນດິດ ອິນສີຊຽງໃໝ່ ໄດ້ສະແດງຄວາມຊົມເຊີຍຕໍ່ຜົນສໍາເລັດໃນໄລຍະໜຶ່ງປີທີ່ຜ່ານມາ ແລະ ໃນຕອນທ້າຍຂອງກອງປະຊຸມຍັງໄດ້ເນັ້ນໜັກໃຫ້ແກ່ຄະນະກອງເລຂາທີ່ຮັບຜິດຊອບໃນການຈັດຕັ້ງປະຕິບັດໂຄງການ ໃຫ້ນໍາເອົາບັນດາຂໍ້ສະເໜີແນະຕ່າງໆ ໃນກອງປະຊຸມນີ້ໄປຈັດຕັ້ງຜັນຂະຫຍາຍໃນການຈັດຕັ້ງປະຕິບັດບັນດາກິດຈະກໍາຕ່າງໆ ໃນປີ 2023 ໃຫ້ເກີດດອກອອກຜົນຢ່າງເປັນຮູບປະທໍາ ຕາມເນື້ອໃນຈິດໃຈຂອງສະມາຊິກຄະນະຊີ້ນຳລວມໂຄງການ “ໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (National Platform for Nutrition “NIPN”) ໄດ້ຮັບການສະໜັບສະໜູນດ້ານງົບປະມານຈາກສະຫະພາບເອີຣົບ (EU) ແລະ ສະໜັບສະໜູນທາງດ້ານວິຊາການຈາກອົງການ ສປຊ ສໍາລັບເດັກ (UNICEF) ມີໄລຍະການຈັດຕັ້ງປະຕິບັດໂຄງການ 4 ປີ (ເລີ່ມມາແຕ່ປີ 2018-2022) ຊຶ່ງໂຄງການໄດ້ສຳເລັດການຈັດຕັ້ງປະຕິບັດໂຄງການໄລຍະທີ 1 ແລ້ວ ແລະ ປັດຈຸບັນໂຄງການກໍໄດ້ຮັບການເຫັນດີອະນຸມັດຈາກຄະນະນໍາຂອງກະຊວງແຜນການ ແລະ ການລົງທຶນ ເພື່ອສືບຕໍ່ຈັດຕັ້ງປະຕິບັດໂຄງການໃນໄລຍະທີ 2 (ເລີ່ມແຕ່ປີ 2022-2025) ຈຸດປະສົງຂອງໂຄງການແມ່ນສ້າງຖານຂໍ້ມູນຕ່າງໆ ທີ່ຕິດພັນກັບວຽກໂພຊະນາການເພື່ອຮັບໃຊ້ໃນການວິໄຈ ແລະ ຕິດຕາມຄວາມຄືບໜ້າຂອງວຽກງານໂພຊະນາການ ພ້ອມທັງກໍານົດນະໂຍບາຍດ້ານໂພຊະນາການໃຫ້ມີຄວາມສອດຄ່ອງ ແລະ ສະໜັບສະໜູນຕາມນະໂຍບາຍແຜນງານດ້ານຂໍ້ມູນຂອງຄະນະກຳມະການແຫ່ງຊາດດ້ານໂພຊະນາການ. ພ້ອມກັນນັ້ນຍັງເປັນການສະໜັບສະໜູນການຈັດຕັ້ງປະຕິບັດຍຸດທະສາດ 2025, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ແລະ ເປົ້າໝາຍການພັດທະນາແບບຍືນຍົງໃນປີ 2030.
ຂ່າວ-ພາບ: ແສງຈັນ
