ກອງປະຊຸມຄົບຄະນະບໍລິຫານງານອົງຄະນະພັກກະຊວງເຕັກໂນໂລຊີ ແລະ ການສື່ສານ (ກຕສ) ເປີດກວ້າງ ຄັ້ງທີ 3 ສະໄໝທີ II ໃນວັນທີ 31 ມັງກອນ ຜ່ານມາ, ພາຍໃຕ້ການເປັນປະທານຂອງ ສະຫາຍ ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກຕສ, ມີຄະນະບໍລິຫານງານພັກ, ເລຂາ, ຮອງເລຂາໜ່ວຍພັກ, ຄະນະພັກຮາກຖານ, ປະທານ, ຮອງປະທານ 3 ອົງການຈັດຕັ້ງມະຫາຊົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມໄດ້ຜ່ານຮ່າງບົດສະຫລຸບ ການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II ຂອງອົງຄະນະພັກກະຊວງປະຈຳປີ 2022 ແລະ ທິດທາງແຜນການ ປະຈຳປີ 2023 ຮ່າງບົດສະຫລຸບການຈັດຕັ້ງປະຕິບັດແຜນພັດທະນາຂະແໜງການ ກຕສ, ສອງວາລະແຫ່ງຊາດ ປະຈຳປີ 2022 ແລະ ທິດທາງແຜນການປະຈຳປີ 2023 ຮ່າງການຈັດຕັ້ງປະຕິບັດແຜນພັດທະນາເສດຖະກິດດີຈິຕອນແຫ່ງຊາດ ປະຈຳປີ 2022 ແລະ ທິດທາງແຜນການ ປະຈຳປີ 2023. ພ້ອມນີ້ກອງປະຊຸມຍັງໄດ້ປະກອບຄຳຄິດ-ຄຳເຫັນ ແລະ ຍົກສູງຄວາມຮັບຜິດຊອບໃນການຄົ້ນຄວ້າ, ເສີມຂະຫຍາຍຫົວຄິດປະດິດສ້າງໃຫ້ເລິກເຊິ່ງ, ຢ່າງກົງໄປກົງມາ, ຍົກບັນຫາທີ່ເປັນປາກົດການຫຍໍ້ທໍ້ ແລະ ຂໍ້ຄົງຄ້າງທີ່ຜ່ານມາ ພ້ອມທັງຊອກວິທີແກ້ໄຂບັນຫາໃນຕໍ່ໜ້າ, ແລກປ່ຽນຄວາມຄິດຄວາມເຫັນ ແລະ ບົດຮຽນຈາກພຶດຕິກຳໃນການນຳພາ-ຊີ້ນຳ ໃນໄລຍະຜ່ານມາເພື່ອເຮັດໃຫ້ກອງປະຊຸມມີເນື້ອໃນເລິກເຊິ່ງໜັກແໜ້ນ ແລະ ມີບົດຮຽນທີ່ອຸດົມສົມບູນ.
ໃນຕອນທ້າຍຂອງກອງປະຊຸມ ສະຫາຍ ບໍ່ວຽງຄຳ ວົງດາລາ ກໍໄດ້ມີຄຳເຫັນສະຫລຸບ ພ້ອມທັງໂອ້ລົມໃຫ້ທິດຊີ້ນໍາຊຶ່ງສະຫາຍໄດ້ຮຽກຮ້ອງມາຍັງຄະນະບໍລິຫານງານພັກກະຊວງ ແລະ ພະນັກງານນຳພາຂັ້ນຫລັກແຫ່ງເອົາໃຈໃສ່ເພີ່ມທະວີຄວາມເປັນເຈົ້າການຍົກສູງໃນການຫັນເປັນດີຈິຕອນ, ການພັດທະນາຊັບພະຍາກອນມະນຸດ ນັບທັງການຫັນປ່ຽນຈິນຕະນາການກ້າວໄປ ເຖິງໂຄງລ່າງບັນດາແພັດຟອມຕ່າງໆ, ຄຽງຄູ່ກັບການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ທີ່ຕິດພັນກັບ 2 ວາລະແຫ່ງຊາດໃຫ້ເປັນຮູບປະທໍາ ແລະ ໃຫ້ມີຜົນສໍາເລັດ, ສືບຕໍ່ເສີມຂະຫຍາຍມູນເຊື້ອຄວາມສາມັກຄີພາຍໃນພັກ ແລະ ປະຊາຊົນບັນດາເຜົ່າ; ນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ໄປເຜີຍແຜ່ເຊື່ອມຊຶມ ແລະ ສືບຕໍ່ຊີ້ນໍາການຈັດຕັ້ງຜັນຂະຫຍາຍເຂົ້າໃນໜ້າທີ່ຄວາມຮັບຜິດຊອບຂອງຕົນໃຫ້ປະກົດຜົນເປັນຈິງ ແລະ ເອົາໃຈໃສ່ນໍາພາ-ຊີ້ນໍາ, ປັບປຸງ, ຍົກສູງຄວາມສາມາດ ແລະ ຄຸນນະພາບ ການເຄື່ອນໄຫວການປະຕິບັດໜ້າທີ່ການເມືອງ ທີ່ໄດ້ຮັບມອບໝາຍໃຫ້ສູງຂຶ້ນກວ່າເກົ່າ.
