ເມື່ອວັນທີ 3 ຕຸລາ ຜ່ານມາ ທີ່ ອົງການໄອຍະການປະຊາຊົນສູງສຸດ (ອອປສ) ໄດ້ມີກອງປະຊຸມຄົບຄະນະບໍລິຫານງານພັກ ອົງການໄອຍະການປະຊາຊົນສູງສຸດ ຄັ້ງທີ 5 ສະໄໝທີ V ໂດຍພາຍໃຕ້ການເປັນປະທານຂອງ ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ ເລຂາຄະນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ, ມີສະຫາຍຮອງເລຂາ, ຄະນະປະຈໍາພັກ ແລະ ບັນດາສະຫາຍຄະນະບໍລິຫານງານພັກເຂົ້າຮ່ວມຢ່າງພ້ອມພຽງ.
ໃນວາລະດັ່ງກ່າວ ກອງປະຊຸມໄດ້ພ້ອມກັນສະຫຼຸບຕີລາຄາຄືນການຈັດຕັ້ງປະຕິບັດວຽກງານຊີ້ນໍາ-ນໍາພາຮອບດ້ານຂອງຄະນະບໍລິຫານງານພັກໃນສາມເດືອນຜ່ານມາ ພ້ອມທັງວາງທິດທາງແຜນການການເຄື່ອນໄຫວວຽກງານຕົນໃນສາມເດືອນຕໍ່ໜ້າ ແລະ ປຶກສາຫາລືຍັງໄດ້ປຶກສາຫາລື ກ່ຽວກັບວຽກງານກົງຈັກການຈັດຕັ້ງ, ວຽກງານພະນັກງານ, ວຽກງານສ້າງຕັ້ງອົງການໄອຍະການເຂດປະຈໍາເມືອງ, ແບ່ງປັນຄວາມຮັບຜິດຊອບຊີ້ນໍາອົງການໄອຍະການປະຊາຊົນທ້ອງຖິ່ນໃຫ້ບັນດາສະຫາຍຄະນະບໍລິຫານງານພັກ, ຫົວໜ້າຫ້ອງການ, ຫົວໜ້າກົມ, ວຽກງານວິຊາສະເພາະ, ວຽກງານຂ່າວສານຂອງອົງການໄອຍະການປະຊາຊົນ ໂດຍໄດ້ພ້ອມກັນຕີລາຄາວ່າ ການຊີ້ນໍາ-ນໍາພາວຽກງານຮອບດ້ານຂອງຄະນະບໍລິຫານງານພັກອົງການໄອຍະການປະຊາຊົນສູງສຸດໃນສາມເດືອນຜ່ານມາ ແມ່ນມີຄວາມສໍາເລັດອັນໜ້າເພິ່ງພໍໃຈເປັນຢ່າງດີ; ຄະນະບໍລິຫານງານພັກ, ສະມາຊິກພັກ ແລະ ພະນັກງານ-ລັດຖະກອນ ທົ່ວລະບົບອົງການໄອຍະການປະຊາຊົນ ມີຄວາມອຸ່ນອ່ຽນທຸ່ນທ່ຽງ, ມີຄວາມສາມັກຄີເປັນປຶກແຜ່ນ ພາຍໃຕ້ການນຳພາຂອງອົງຄະນະພັກ ແລະ ເປັນກຳລັງແຮງປະກອບສ່ວນໃຫ້ອົງຄະນະພັກ ນຳພາຍາດເອົາຜົນສຳເລັດໃໝ່ ຍິ່ງໃຫຍ່ກວ່າເກົ່າ.
ໃນໂອກາດດັ່ງກ່າວ ສະຫາຍປະທານກອງປະຊຸມ ໄດ້ໃຫ້ທິດຊີ້ນໍາໃຫ້ເພີ່ມທະວີຄວາມຮັບຜິດຊອບໃນການຊີ້ນຳ-ນຳພາ, ປັບປຸງກົງຈັກການຈັດຕັ້ງ, ປັບປຸງແບບແຜນວິທີນຳພາ-ແບບແຜນວິທີເຮັດວຽກ, ປະເມີນຜົນໜ່ວຍພັກ, ວຽກງານແຂ່ງຂັນ-ຍ້ອງຍໍ, ເພີ່ມທະວີວຽກງານກວດກາ, ວຽກງານວິຊາສະເພາະ ໂດຍສະເພາະວຽກງານຕິດຕາມກວດກາທົ່ວໄປ, ສ້າງກົນໄກປະສານງານໃຫ້ໂລ່ງລ່ຽນ ແລະ ມີປະສິດທິຜົນ ພ້ອມທັງຮຽກຮ້ອງໃຫ້ບັນດາສະຫາຍຄະນະບໍລິຫານງານພັັກ ຈົ່ງຍົກສູງຄວາມຮັບຜິດຊອບຂອງຕົນ ໃນການຊີ້ນໍາ-ນໍາພາ ຊຶ່ງກ່ອນອື່ນໝົດຕ້ອງເພີ່ມທະວີການເຊື່ອມຊຶມ, ກໍາແໜ້ນແນວທາງແຜນນະໂຍບາຍຂອງພັກ, ກົດໝາຍຂອງລັດ ໂດຍສະເພາະກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍອື່ນທີ່ກ່ຽວຂ້ອງ, ເປັນແກນນໍາໃນລະບົບການເມືອງຢູ່ອົງການໄອຍະການປະຊາຊົນ, ເປັນແບບຢ່າງຕັ້ງໜ້າໃນການປະຕິບັດສິດ ແລະ ໜ້າທີ່ ແລະ ຕາມຄວາມຮັບຜິດຊອບຂອງຕົນ ມີຜົນສໍາເລັດ, ເຮັດໃຫ້ອົງການໄອຍະການປະຊາຊົນນັບມື້ ໄດ້ມີການພັດທະນາ, ຍົກສູງຄຸນນະພາບຂອງການດໍາເນີນຄະດີຕາມຂະບວນການຍຸຕິທໍາ, ເພີ່ມທະວີວຽກງານຕິດຕາມກວດກາຂອງອົງການໄອຍະການປະຊາຊົນ, ປະກອບສ່ວນເຮັດໃຫ້ປະເທດເຮົາມີຄວາມສະຫງົບ ແລະ ຄວາມເປັນລະບຽນຮຽບຮ້ອຍ, ເສດຖະກິດ ໄດ້ຮັບການພັດທະນາ ຢ່າງບໍ່ຢຸດຢັ້ງ.
(ຂ່າວ-ພາບ: ອານຸສັກ)
