ຕາມຂ່າວຈາກ CRI, ເມື່ອບໍ່ດົນມານີ້, ລັດຖະບານຈີນ ໄດ້ຈັດງານລ້ຽງ ສະເຫລີມ ສະຫລອງ ວັນຊາດ ຢູ່ຫໍສະພາ ປະຊາຊົນ ທີ່ນະຄອນຫລວງ ປັກກິ່ງ, ເພື່ອສະ ເຫລີມ ສະຫລອງ ສາທາລະ ນະລັດ ປະຊາຊົນຈີນ ສະຖາປະນາຂຶ້ນ ຄົບຮອບ 73 ປີຢ່າງຄຶກຄື້ນ ມ່ວນຊື່ນ ໂດຍມີ ທ່ານ ສີ ຈີ້ນຜິງ ປະທານ ປະເທດຈີນ ພ້ອມດ້ວຍ ຜູ້ນຳ ພັກ-ລັດ ທ່ານອື່ນໆ ຮ່ວມກັບແຂກ ຜູ້ມີກຽດ ທັງພາຍໃນ ແລະ ຕ່າງປະເທດ ເກືອບ 500 ທ່ານ ໄດ້ເຕົ້າໂຮມກັນ ໃນຄັ້ງນີ້. ຈາກນັ້ນ ທ່ານ ຫລີ ເຄີ້ສຽງ, ນາຍົກລັດຖະມົນຕີ ຈີນ ກ່າວຄຳປາໄສວ່າ: ເນື່ອງໃນ ໂອກາດ ວັນຊາດຈີນ, ທ່ານ ຕາງໜ້າ ສູນກາງພັກ ແລະ ລັດຖະບານຈີນ ຝາກຄຳອວຍພອນ ໄປຍັງປະຊາຊົນບັນດາເຜົ່າທົ່ວປະເທດຈີນ, ຝາກຄວາມຢື້ຢາມ ຖາມຂ່າວທີ່ອົບອຸ່ນ ໄປຍັງພີ່ນ້ອງ ຮ່ວມຊາດ ຢູ່ເຂດຮົງກົງ, ເຂດມາກາວ, ເຂດໄຕ້ຫວັນຈີນ ແລະ ຊາວຈີນ ທັງຢູ່ພາຍໃນ ແລະ ຕ່າງປະເທດ, ພ້ອມທັງ ສະແດງ ຄວາມຂອບອົກ ຂອບໃຈ ຢ່າງຈິງໃຈ ຕໍ່ເພື່ອນມິດຕ່າງປະເທດທີ່ເອົາໃຈໃສ່ ແລະ ສະໜັບສະໜູນພາລະກິດສ້າງສາທັນສະໄໝຂອງຈີນ.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
