ທ່ານ ສາຍສະໝອນ ກວານເມືອງຈັນ ປະທານທີ່ປຶກສາສະຖາບັນນການເງິນຈຸນລະພາກທີ່ຮັບເງິນຝາກສາຍໄຍສຳພັນ ນະຄອນໄກສອນ ພົມວິຫານ ແຂວງສະຫວັນນະເຂດ, ເປັນບຸກຄົນໜຶ່ງທີ່ມີຜົນງານດີເດັ່ນໃນການປະກອບສ່ວນດ້ານເຫື່ອແຮງ ສະຕິປັນຍາ ແລະ ວັດຖຸ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງໃນຕະຫຼອດໄລຍະຜ່ານມາ ຈາກຜົນງານດັ່ງກ່າວ ເຮັດໃຫ້ ທ່ານ ສາຍສະໝອນ ກວານເມືອງຈັນ ໄດ້ຮັບນາມມະຍົດນັກພັດທະນາດີເດັ່ນແຫ່ງຊາດ ໄລຍະປີ 2016-2020 ຈາກການນໍາພັກ-ລັດຖະບານ ແຫ່ງ ສປປ ລາວ; ໃນກອງປະຊຸມສະຫຼຸບຕີລາຄາຂະບວນການຮັກຊາດ ແລະ ພັດທະນາ ທົ່ວປະເທດ ໄດ້ຈັດຂຶ້ນໃນລະຫວ່າງ 15 ຫາ 16 ກັນຍາ ທີ່ຜ່ານມາ.
ທ່ານ ສາຍສະໝອນ ກວານເມືອງຈັນ ໃຫ້ສໍາພາດວ່າ: ຕົນມີຄວາມພາກພູມໃຈທີ່ໄດ້ຮັບນາມມະຍົດນັກພັດທະນາດີເດັ່ນໃນຄັ້ງນີ້ ຊຶ່ງເປັນກຽດຕິຍົດອັນໃຫຍ່ຫຼວງ ເພາະຈະເປັນມໍລະດົກສືບທອດໃຫ້ລູກຫຼານໃນອະນາຄົດຮັບຮູ້ວ່າ ນັກທຸລະກິດກໍສາມາດເຂົ້າຮ່ວມໃນການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ຫຼື ເອີ້ນວ່າອາສາສະໝັກເຂົ້າໃນຂະບວນການດັ່ງກ່າວດ້ວຍຄວາມເຂັ້ມແຂງ, ຄວາມບໍລິສຸດໃຈ ແລະ ທຸ່ມເທເຫື່ອແຮງເຂົ້າໃນການປົກປັກຮັກສາ ແລະ ພັດທະນາປະເທດຊາດໃຫ້ມີຄວາມສີວິໄລ, ພ້ອມນັ້ນຍັງໄດ້ປະກອບສ່ວນສ້າງວຽກເຮັດງານທໍາໃຫ້ແກ່ປະຊາຊົນທີ່ດ້ອຍໂອກາດ, ທຸກຍາກຂາດເຂີນໄດ້ມີການດໍາລົງຊີວິດທີ່ດີຂຶ້ນ. ຈາກຜົນສໍາເລັດທີ່ຍາດມາໄດ້ນັ້ນ ເຮັດໃຫ້ຕົນໄດ້ຮັບນາມມະຍົດນັກພັດທະນາດີເດັ່ນແຫ່ງຊາດ; ຜົນງານອັນພົ້ນເດັ່ນທີ່ປະກອບສ່ວນແມ່ນເລີ່ມຕົ້ນຈາກການກອບກູ້ເອົາບ ບໍລິສັດ ຜະລິດຕະພັນຊາວກະສິກອນລາວ ໃນປີ 2017 ຜ່ານມາ, ບໍລິສັດດັ່ງກ່າວນັ້ນແມ່ນບໍ່ສາມາດດໍາເນີນກິດຈະການຕໍ່ໄປໄດ້ ດັ່ງນັ້ນຕົນຈຶ່ງໄດ້ເຂົ້າໄປຊື້ຮຸ້ນທັງໝົດຈາກຄົນຕ່າງປະເທດທີ່ມາລົງທຶນໃນບໍລິສັດ ຊຶ່ງເປັນບໍລິສັດສົ່ງອອກຜະລິດຕະພັນໄປຂາຍ ເປັນຕົ້ນແມ່ນເຄື່ອງບໍລິໂພກເຊັ່ນ: ກວນໝາກໄມ້, ເຂົ້າໜົມ, ໝາກຂາມ, ນໍ້າເຜິ້ງ, ຊາເຂົ້າກ້ອງ ເຂົ້າກໍ່າ, ນໍ້າມັນງາດໍາ ແລະ ອື່ນໆ ໃນ 4 ປະເທດເອີຣົບ ຕາມໂຄງການດັບເບິນຢູທີໂອ ຫຼື ການຄ້າທີ່ເປັນທໍາໃນປະເທດເຢຍລະມັນ, ສະວີເດັນ, ອົສຕຣາລີ ແລະ ປະເທດຝຣັ່ງ. ທ່ານໄດ້ກ່າວຕື່ມອີກວ່າ: ໃນວັນທີ 13 ທັນວາ 2019 ແຂວງສະຫວັນນະເຂດ ໄດ້ມີຂະບວນການແຂ່ງຂັນຮັກຊາດ ແລະ ພັດທະນາ ໃນນັ້ນ ກໍມີນັກທຸລະກິດຫຼາຍທ່ານໄດ້ປະກອບສ່ວນເຂົ້າໃນການແຂ່ງຂັນ ແລະ ຕົນເອງແມ່ນໄດ້ຮັບການຊັກຊວນຈາກ ທ່ານ ເກຍ ອູສິດທິເດດ ເຈົ້າຂອງໂຮງງານຜະລິດນໍ້າດື່ມ ແລະ ນໍ້າກ້ອນໂລມາຄໍາ, ຈາກນັ້ນໄດ້ຮ່ວມກັນ ສ້າງໂຄງການ “ຮ່ວມໃຈສາຍໄຍໂລມາຄໍາ” ເຂົ້າໄປຊ່ວຍບ້ານຕະຍົງ ແລະ ບ້ານປະແໜະ ເມືອງນອງ ແຂວງສະຫວັນນະເຂດ ໃນນັ້ນໄດ້ຊ່ວຍໜ້າວຽກຫຼາຍດ້ານ ໂດຍພື້ນຖານໄດ້ໃຫ້ຄວາມຮູ້ ໃຫ້ປະຊາຊົນໄດ້ຮູ້ຈັກຊອກຢູ່ຫາກິນ ມາເປັນສ້າງຢູ່ທໍາກິນ. ດ້ວຍການສ້າງເງື່ອນໄຂໃຫ້ໂອກາດປະຊາຊົນໄດ້ພັດທະນາຕົນເອງ ໃນການຝຶກແອບປູກ ຝັງ, ລ້ຽງສັດ ແລະ ຝຶກແອບທຸກຢ່າງ ທີ່ພໍຈະດໍາລົງຊີວິດ ແລະ ກຸ້ມຕົນເອງໃຫ້ໄດ້ ເພື່ອຈະຜະລິດໃຫ້ພໍກຸ້ມກິນ ຖ້າເຫຼືອກໍຂາຍເປັນສິນຄ້າ. ຈາກເມື່ອກ່ອນມາຮອດປັດຈຸບັນ ແມ່ນຮູ້ສຶກພາກພູມໃຈ ເພາະສິ່ງທີ່ປະຊາຊົນໄດ້ຈາກໂຄງການ ແລະ ທີ່ໂຄງການໄດ້ເຂົ້າໄປຊ່ວຍເຫຼືອນັ້ນ ເຮັດໃຫ້ປະຊາຊົນໄດ້ມີເນື້ອທີ່ສວນເປັນຂອງຕົນເອງ ແລະ ໄດ້ຂາຍຜົນຜະລິດຂອງຕົນເປັນຕົ້ນ: ໝາກກ້ວຍ, ອ້ອຍ, ມັນຕົ້ນ, ແຜ່ນແພທີ່ໄດ້ຕໍ່າສໍາເລັດ; ເຮັດໃຫ້ຊີວິດການເປັນຢູ່ຂອງປະຊາຊົນມີກໍາລັງຊື້ຫຼາຍຂຶ້ນ ໃນການຈັບຈ່າຍຊື້ເຄື່ອງໃຊ້ເຂົ້າໃນການດໍາລົງຊີວິດປະຈໍາວັນ, ດັ່ງນັ້ນ ຈຶ່ງຮູ້ສຶກວ່າການພັດທະນາຢູ່ຈຸດນັ້ນ ເຖິງວ່າຈະຍັງບໍ່ກ້າວໄກປານໃດ ແຕ່ກໍຖືວ່າເປັນຄວາມພາກພູມໃຈທີ່ໄດ້ເຫັນການປ່ຽນແປງຊີວິດການເປັນຢູ່ຂອງປະຊາຊົນໄດ້ພໍສົມຄວນ ສິ່ງທີ່ພົ້ນເດັ່ນທີ່ເຮັດໃຫ້ພວກເຮົາເຫັນວ່າມີການປ່ຽນແປງນັ້ນຄືໄດ້ຈາກການຊຸກຍູ້ຂອງໂຄງການດັ່ງກ່າວ.
ໂອກາດນີ້, ທ່ານ ສາຍສະໝອນ ກວານເມືອງຈັນ ກໍໄດ້ສະແດງຄວາມຮູ້ບຸນຄຸນ ແລະ ຂອບໃຈການນໍາພັກ-ລັດ ທີ່ໃຫ້ໂອກາດ ໄດ້ເຂົ້າຮ່ວມການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ, ຂອບໃຈ ສັງຄົມ ແລະ ຄົນອ້ອມຂ້າງທີ່ໃຫ້ຄວາມຊ່ວຍເຫຼືອໃຫ້ການສະໜັບສະໜູນໃນໄລຍະຜ່ານມາ, ສະນັ້ນໃນຕໍ່ໜ້າຈະສືບຕໍ່ໃນການປຸກລະດົມປະຊາຊົນເຂົ້າມາມີສ່ວນຮ່ວມ ເພື່ອເຮັດໃຫ້ວຽກງານແກ້ໄຂຄວາມທຸກຍາກ ນັບມື້ນັບຫຼຸດລົງເປັນກ້າວໆ ແລະ ຖ້າມີການແຂ່ງຂັນຂະບວນການຮັກຊາດ ແລະ ພັດທະນາໃນຕໍ່ໜ້າຕົນເອງກໍຈະສືບຕໍ່ປະກອບສ່ວນ ແລະ ກໍຫວັງວ່າຈະໄດ້ຮັບການຮ່ວມມືໃນການນໍາ ເອົາໂຄງການດັ່ງກ່າວເຂົ້າໄປຊ່ວຍເຫຼືອປະຊາຊົນໃນບ້ານອື່ນຕື່ມອີກ.
ໂດຍ: ຍຸພິນທອງ
