ໃນທ້າຍອາທິດຜ່ານມານີ້, ຢູ່ບ້ານທົ່ງນ້ອຍ ເມືອງປາກຊັນ ແຂວງບໍລິຄຳໄຊ ໄດ້ຈັດພິທີເປີດຂະບວນການກໍ່ສ້າງເສັ້ນທາງເບຕົງ ເຂົ້າຫາ ວັດດານສູງ ວະນາຣາມ ໂດຍເປັນກຽດເຂົ້າຮ່ວມຂອງ ທ່ານ ສຸພາລັກ ໄຊຊະນະສີ ຮອງເຈົ້າເມືອງປາກຊັນ, ມີພາກສ່ວນກ່ຽວຂ້ອງ ພາຍໃນບ້ານເຂົ້າຮ່ວມ.
ການກໍ່ສ້າງເສັ້ນທາງດັ່ງກ່າວ, ຈຸດເລີ່ມຕົ້ນຈາກເສັ້ນທາງ 4B ເຂົ້າຫາ ວັດດານສູງ ວະນາຣາມ ຊຶ່ງມີຄວາມຍາວ 995 ແມັດ, ໜ້າທາງກວ້າງ 6 ແມັດ, ມີຄວາມໜາ 15 ຊັງຕີແມັດ ຊຶ່ງມີມູນຄ່າການກໍ່ສ້າງ ປະມານ 400 ກວ່າລ້ານກີບ, ດ້ວຍທຶນສົມທົບຂອງບ້ານ ຮ່ວມກັບ ປັດໄຈສັດທາຂອງວັດດານສູງ ວະນາຣາມ ແລະ ເປັນແຮງງານການກໍ່ສ້າງໃນການເຕົ້າໂຮມຄວາມສາມັກຄີຂອງພໍ່ແມ່ປະຊາຊົນພາຍໃນບ້ານທົ່ງນ້ອຍ.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
