ຫ້ອງການສາທາລະນະສຸກ ເມືອງພຽງ ແຂວງໄຊຍະບູລີ ໄດ້ຈັດພິທີເປີດຂະບວນການອະນາໄມເພື່ອປ້ອງກັນພະຍາດໄຂ້ຍຸງລາຍຂຶ້ນ ເມື່ອບໍ່ດົນມານີ້ ທີ່ຫ້ອງປະຊຸມບ້ານາແຄມ ໂດຍການເປັນກຽດເຂົ້າຮ່ວມຂອງທ່ານ ບຸນຕ້ອງ ປັນຍາຄຳ ຮອງເຈົ້າເມືອງໆພຽງ, ມີບັນດາພາກສ່ວນກ່ຽວຂ້ອງຂອງເມືອງເຂົ້າຮ່ວມ.
ພິທີ ທ່ານ ບຸນຕ້ອງ ປັນຍາຄຳ ໄດ້ຮຽກຮ້ອງໃຫ້ຄະນະຮັບຜິດຊອບຕ້ານໄຂ້ຍຸງລາຍຂັ້ນເມືອງ ແລະ ປະຊາຊົນບັນດາເຜົ່າຈົ່ງພ້ອມກັນອອກແຮງງານສ້າງຂະບວນການຢູ່ແຕ່ລະບ້ານ ແລະ ທຸກໆວັນສິນ 8 ຄ່ຳ, 15 ຄ່ຳ ແຕ່ລະບ້ານຕ້ອງສ້າງຂະບວນການອະນາໄມເປັນປົກກະຕິ, ສ່ວນສໍານັກງານ, ອົງການ, ກົມກອງແມ່ນຖືເອົາວັນສຸກ ຂອງທຸກໆອາທິດເປັນມື້ສ້າງຂະບວນການອະນາໄມເຊັ່ນດຽວກັນ ໂດຍສ້າງຂະບວນການໃຫຍ່ອອກແຮງງານເຮັດອະນາໄມຖາງຫຍ້າ, ຂວໍ້າກະໂປະກະປ່ອງ, ປ່ຽນນໍ້າໃນຖັງເກັບນ້ຳໃນເຮືອນ, ໂຖໂຕ່ງນ້ຳທາງຫຼັງຕູ້ເຢັນ, ຢາງຕີນລົດເກົ່າ ຊຶ່ງອາດຈະເປັນແຫຼ່ງເພາະພັນຂອງຍຸງລາຍ ພ້ອມນັ້ນ ແຕ່ລະບ້ານຕ້ອງໄດ້ແຕ່ງຕັ້ງຄະນະຮັບຜິດຊອບຕ້ານໄຂ້ຍຸງລາຍຂັ້ນບ້ານ, ແຕ່ງຕັ້ງຫົວໜ້າໜ່ວຍລົງສຳຫຼວດໜອນນ້ຳຍຸງລາຍຢູ່ແຕ່ລະຄອບຄົວ ພ້ອມທັງປະຕິບັດຕາມ 5ປ ທີ່ກະຊວງສາທາລະນະສຸກໄດ້ວາງອອກຢ່າງເຂັ້ມງວດ.
ໃນໂອກາດນີ້, ຄະນະຮັບຜິດຊອບ ຮ່ວມກັບປະຊາຊົນບັນດາເຜົ່າໄດ້ພ້ອມກັນອອກແຮງງານອະນາໄມຕາມແຄມທາງ ແລະ ສະຖາທີ່ສາທາລະນະຕ່າງໆເຮັດໃຫ້ມີຄວາມສະອາດສວຍງາມ ທັງເປັນການທຳລາຍແຫຼ່ງເພາະພັນຂອງຍຸງລາຍ.
(ຂ່າວ-ພາບ: ນັກຂ່າວເມືອງພຽງ)
Medialaos MMD
