ສະຖານເອກອັກຄະລັດຖະທູດ ແຫ່ງ ສາທາລະນະລັດ ເກົາຫລີ ປະຈຳ ສປປ ລາວ ແລະ ຫໍສະໝຸດແຫ່ງຊາດ ໄດ້ຈັດພິທີມອບ-ຮັບໂຄງການ “Korea Corner” ຫ້ອງອ່ານພາສາ ແລະ ວາງສະແດງວັດທະນະທຳ ເກົາຫລີ ທີ່ຫໍສະໝຸດແຫ່ງຊາດ ໂດຍມີ ທ່ານນາງ ຈັນເພັດ ຄຳຟອງ ຫົວໜ້າກົມວັນນະຄະດີ ແລະ ການພິມຈຳໜ່າຍ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ອີມ ມູ ຮົງ(IM MOO HONG)ເອກອັກຄະລັດຖະທູດ ສ ເກົາຫລີ ປະຈຳ ສປປ ລາວ, ທ່ານ ຄຳສວຍ ແກ້ວດາລາວົງ ປະທານສະມາຄົມມິດຕະພາບ ລາວ-ສ ເກົາຫລີ ພ້ອມຄະນະ, ທ່ານນາງ ຂັນທະມາລີ ຍັງນາວົງ ອຳນວຍການຫໍສະໝຸດແຫ່ງຊາດ ແລະ ພາກສ່ວນກ່ຽວຂ້ອງ ເຂົ້າຮ່ວມ, ຊຶ່ງເປັນການສ້າງເງື່ອນໄຂອັນດີໃຫ້ແກ່ນັກຮຽນ, ນັກສຶກສາ, ສາມັນຊົນ ແລະ ປະຊາຊົນໄດ້ເຂົ້າອ່ານ, ຮຽນຮູ້ພາສາ, ວິຖີຊີວິດ ວັດທະນະທຳ, ເສດຖະກິດ-ສັງຄົມຂອງ ສ ເກົາຫລີ.
ການມອບ-ຮັບໃນຄັ້ງນີ້, ມີປຶ້ມອ່ານກ່ຽວກັບການສຶກສາ, ວັດທະນະທໍາ, ມະນຸດວິທະ ຍາ, ນິທານສໍາລັບເດັກ, ເຕັກໂນໂລຊີ, ສິລະປະ ແລະ ອື່ນໆ. ພ້ອມນັ້ນ, ຍັງມອບອຸປະກອນຮັບໃຊ້ວຽກຕິດພັນກັບຫໍສະໝຸດຈຳນວນໜຶ່ງ ແລະ ຈັດຫ້ອງອ່ານພາສາເກົາຫລີ ແລະຈັດວາງສະແດງວັດທະນະທໍາການນຸ່ງຖື, ທາງດ້ານດົນຕີພື້ນເມືອງ ເພື່ອຕອບສະໜອງໃຫ້ແກ່ຜູ້ໃຊ້ບໍລິການ ໄດ້ສຶກສາຄົ້ນຄວ້າກ່ຽວກັບວັດທະນະທໍາເກົາຫລີ ຊຶ່ງເປັນໂຄງການຊ່ວຍ ເຫລືອຂອງມູນນິທິເກົາຫລີ (Korea Foundation) ໂດຍສ້າງເປັນຫ້ອງວາງສະແດງປຶ້ມແລະ ວັດທະນະທຳເກົາຫລີ ໃຫ້ແກ່ຫໍສະໝຸດແຫ່ງຊາດລາວ ເພື່ອໃຫ້ມວນຊົນທີ່ມີຄວາມສົນໃຈພາສາ ແລະ ວັດທະນະທຳເກົາຫລີ ສາມາດເຂົ້າໄປອ່ານ ແລະ ເບິ່ງໄດ້ທັງເປັນການດຶງດູດໃຫ້ແກ່ນັກອ່ານ ເພື່ອເຂົ້າມາຊົມໃຊ້ຫໍສະໝຸດແຫ່ງຊາດຕື່ມອີກ.
ທ່ານ ນາງ ຂັນທະມາລີ ຍັງນາວົງ ໄດ້ສະແດງຄວາມຂອບໃຈມາຍັງ ທ່ານເອກອັກຄະລັດຖະທູດ ສ ເກົາຫລີ ປະຈໍາ ສປປ ລາວ ທີ່ໄດ້ໃຫ້ການຊ່ວຍເຫລືອປຶ້ມອ່ານ, ກອງຕີຫລາຍຊະນິດ ແລະ ເຄື່ອງນຸ່ງຫົ່ມພື້ນເມືອງຂອງເກົາຫລີ ທີ່ໄດ້ສ່ອງແສງໃຫ້ເຫັນວ່າ ສ ເກົາຫລີເ ປັນປະເທດໜຶ່ງທີ່ມີວັດທະນະທໍາທີ່ໂດດເດັ່ນ ແລະ ສວຍງາມ, ຊຶ່ງປັດຈຸບັນໄດ້ມີຫລາຍປະເທດໃນໂລກມີຄວາມສົນໃຈຫລາຍໆດ້ານ ເຊັ່ນ: ບົດເພງ, ລະຄອນ, ດ້ານຕົບແຕ່ງຄວາມສວຍງາມ ແລະ ອື່ນໆ.
ທ່ານເອກອັກຄະລັດຖະທູດ ອີມ ມູ ຮົງ ໄດ້ໃຫ້ຮູ້ວ່າ: “ອຸປະກອນທີ່ນຳມາມອບໃຫ້ຫໍສະໝຸດແຫ່ງຊາດລາວ ໃນຄັ້ງນີ້ ປະກອບມີ ຄອມພິວເຕີ 8 ຊຸດ, ໂປຣເຈັກເຕີ 1 ຊຸດ ແລະ ຍັງມີຊຸດເຄື່ອງນຸ່ງ “ຮັນໂບກ” 2 ຊຸດ ແລະ ເຄື່ອງດົນຕີພື້ນເມືອງຂອງເກົາຫລີ ລວມມູນຄ່າ 2.000 ໂດລາສະຫະລັດ, ພ້ອມນີ້ ຍັງມີປຶ້ມເລື່ອງ ທີ່ເປັນພາສາເກົາຫລີ ຈຳນວນ 12.000 ຫົວ ໂດຍໄດ້ຈັດເປັນພື້ນທີ່ວາງສະແດງສະເພາະທີ່ເອີ້ນວ່າ “ມູມເກົາຫລີ”. ສະນັ້ນ, ຫວັງວ່າ ມູມເກົາຫລີ ຈະກາຍເປັນພື້ນທີ່ລວມທາງດ້ານວັດທະນະທຳ ເພື່ອໃຫ້ມວນຊົນທັງຫລາຍສາມາດເຂົ້າສຶກສາວັດທະນະທຳເກົາຫລີ ໄດ້ຕະຫລອດເວລາ.
