ອົງການກາແດງແຫ່ງຊາດລາວ ຈັດພິທີສະເຫລີມສະຫລອງວັນປະຖົມພະຍາ ບານໂລກ 2022 ໃນວັນທີ 16 ກັນຍາ 2022 ຢູ່ໂຮງຮຽນມັດທະຍົມຕອນປາຍ (ມປ) ວຽງຈັນ-ໂຮ່ຈິມິນ, ນະຄອນຫລວງວຽງຈັນ ໂດຍມີ ທ່ານ ກາວີພອນ ສຸດທິ ຫົວໜ້າຫ້ອງ ການອົງການກາແດງແຫ່ງຊາດລາວ, ທ່ານ ບຸນຈັນ ສີສຸກ ຜູ້ອໍານວຍການ ໂຮງຮຽນ ມປ ວຽງຈັນ-ໂຮ່ຈິມິນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ກາວີພອນ ສຸດທິ ໄດ້ໃຫ້ຮູ້ວ່າ: ວຽກງານປະຖົມພະຍາບານ ໄດ້ຕິດພັນກັບການກໍາເນີດເກີດຂຶ້ນຂອງອົງການກາແດງສາກົນເມື່ອ 160 ປີກວ່າມາແລ້ວ ໂດຍຜ່ານເຫດການເດືອນມິຖຸນາ ປີ 1859, ວັນປະຖົມພະຍາບານໂລກ ໄດ້ຖືກກຳນົດຈາກ ສະຫະ ພັນກາແດງ ແລະ ຊີກວົງເດືອນແດງສາກົນ (IFRC) ແລະ ໄດ້ຈັດຕັ້ງການສະເຫລີມສະ ຫລອງ ເລີ່ມແຕ່ປີ 2000 ເປັນຕົ້ນມາ ໂດຍຖືເອົາ ວັນເສົາ ທີ 2 ຂອງເດືອນກັນຍາ ຂອງທຸກໆປີ, ຊຶ່ງປີນີ້ ແມ່ນກົງກັບວັນທີ 16 ກັນຍາ 2022. ບັນດາປະເທດສະມາຊິກ 192 ປະເທດໃນທົ່ວໂລກ ໄດ້ຈັດຕັ້ງການສະຫລອງດ້ວຍການສາທິດ, ການເຜີຍແຜ່ວິທີການ ປະຖົມພະຍາບານໃຫ້ແກ່ຊຸມຊົນ ກໍຄື ສະຖານທີ່ການຮຽນ, ການສອນ, ໂຮງຈັກໂຮງງານ, ໂຮງແຮມ ທີ່ມີຄົນເຕົ້າໂຮມກັນຢູ່ເປັນຈຳນວນຫລາຍ ແຕ່ໃນປີນີ້ ຍ້ອນສະພາບການພະ ຍາດໂຄວິດ-19 ຈຶ່ງໄດ້ຈັດການສະຫລອງແບບກະທັດຮັດ ໂດຍໄດ້ສາທິດວິທີປະຖົມພະຍາ ບານຜ່ານສື່ມວນຊົນຕ່າງໆ ອອກສູ່ສັງຄົມ.
ສະຫະພັນກາແດງ ແລະ ຊີກວົງເດືອນແດງສາກົນແມ່ນອົງກອນນໍາໜ້າຮັບຜິດຊອບການຝຶກອົບຮົມດ້ານປະຖົມພະຍາບານຢູ່ໃນໂລກ, ໃນແຕ່ລະປີ ໄດ້ຈັດຝຶກອົບຮົມວຽກງານດັ່ງກ່າວໃຫ້ແກ່ປະຊາຊົນທົ່ວໂລກ ຫລາຍກວ່າ 20 ລ້ານຄົນ, ຊຶ່ງຈັດຕັ້ງປະຕິບັດໂດຍກາ ແດງແຫ່ງຊາດ ຂອງແຕ່ລະປະເທດ, ການສະເຫລີມສະຫລອງແຕ່ລະປີໄດ້ກຳນົດຄຳຂວັນທີ່ແຕກຕ່າງກັນ ເພື່ອເປັນທິດທາງ. ສໍາລັບ ການສະຫລອງວັນປະຖົມພະຍາບານ ໃນປີ 2022 ພາຍໃຕ້ຄໍາຂວັນ: ການຮຽນຮູ້ປະຖົມພະຍາບານບໍ່ມີສິ້ນສຸດ “Lifelong first aid Learning” ໂດຍມີຈຸດປະສົງເພື່ອກະຕຸ້ນ ໃຫ້ໂຮງຮຽນທຸກແຫ່ງ, ທຸກຊັ້ນ, ຊຸມຊົນຕ່າງໆ, ບ້ານ, ໂຮງຈັກ, ໂຮງງານ, ສຳນັກງານ, ອົງການ, ສະຖານທີ່ສາທາລະນະອື່ນໆ ໄດ້ໃຫ້ຄວາມສຳຄັນ ໃນການຝຶກອົບຮົມການປະຖົມພະຍາບານ ເພື່ອສ້າງໃຫ້ໄດ້ຄົນດີ, ຄົນເກັ່ງ, ດ້ານການປະຖົມພະຍາບານ ກຽມພ້ອມຊ່ວຍເຫລືອໄດ້ທັນທີ, ມີປະສິດທິພາບໃນກໍລະນີມີເຫດສຸກເສີນເກີດຂຶ້ນ.
ການປະຖົມພະຍາບານ ແມ່ນໜຶ່ງໃນ 9 ວຽກງານຕົ້ນຕໍ ຂອງອົງການກາແດງແຫ່ງຊາດລາວ ເປັນວຽກມະນຸດສະທໍາທີ່ອົງການກາແດງແຫ່ງຊາດລາວ ໄດ້ປະຕິບັດມາ ເລີ່ມແຕ່ປີ 1977 ໄດ້ມີການຮ່ວມມືກັບອົງການກາແດງສາກົນ, ສ້າງເອກະສານຄູ່ມືປະຖົມພະ ຍາບານ, ຄູ່ມືການຝຶກອົບຮົມປະຖົມພະຍາບານຂັ້ນພື້ນຖານ, ໄດ້ສ້າງຄູຝຶກຂັ້ນແຂວງ, ຂະ ຫຍາຍກວມເອົາທຸກແຂວງໃນທົ່ວປະເທດ, ມາຮອດປັດຈຸບັນ ໄດ້ຈັດຝຶກອົບຮົມໃຫ້ອາສາສະໝັກຊາວໜຸ່ມ, ຄູ-ອາຈານ, ນັກຮຽນ, ນັກສຶກສາຢູ່ໂຮງຮຽນ ແລະ ສະຖາບັນຕ່າງໆທົ່ວປະເທດ ໄດ້ 924 ຄົນ, ຍິງ 448 ຄົນ ແລະ ຍັງສືບຕໍ່ຈັດຝຶກອົບຮົມໃຫ້ກວ້າງຂວາງຂຶ້ນເລື້ອຍໆ.
