ວັນທີ 12 ກັນຍາ 2022 ນີ້, ຢູ່ທີ່ວິທະຍາຄານພະລາທິການກອງທັບ ຄະນະຝຶກຊ້ອມກອບກູ້ໄພພິບັດ 3 ກອງທັບ ກໍາປູເຈຍ, ລາວ, ຫວຽດນາມ ໄດ້ຈັດກິດຈະກໍາເເຂ່ງຂັນກິລາບານສົ່ງມິດຕະພາບຮ່ວມກັນ ໂດຍການເຂົ້າຮ່ວມຂອງຂອງສະຫາຍພົນຕີ ຈັນທອງ ສອນຕະອາດ ຮອງລັດຖະມົນກະຊວງປ້ອງກັນປະເທດ, ຜູ້ຊີ້ນໍາລວມວຽກງານການຝຶກຊ້ອມກອບກູ້ໄພພິບັດຮ່ວມ 3 ກອງທັບ, ມີສະຫາຍ ພົນຈັດຕະວາ ພູມີ ດາລາເພັດ ຮອງຫົວໜ້າກົມໃຫຍ່ການເມືອງກອງທັບ, ຄະນະຊີ້ນຳການຝຶກຊ້ອມກອບກູ້ໄພພິບັດ 3 ກອງທັບ ປະທານຈັດການເເຂ່ງຂັນກິລາມິດຕະພາບ, ມີຄະນະຊີ້ນຳ,ຄະນະກຳມະການຝຶກຊ້ອມກອບກູ້ໄພພິບັດ, ນັກກິລາ 3 ກອງທັບເຂົ້າຮ່ວມ.
ສະຫາຍພົນຈັດຕະວາ ພູມີ ດາລາເພັດ ໄດ້ໃຫ້ຮູ້ວ່າ: ຈຸດປະສົງຂອງການຈັດການເເຂ່ງຂັນກິລາໃນຄັ້ງນີ້ ແມ່ນເພື່ອເປັນການຮັດແໜ້ນຄວາມສາມັກຄີ, ມິດຕະພາບ, ການຮ່ວມມື ແລະ ການເເລກປ່ຽນບົດຮຽນເຊີ່ງກັນ ແລະ ກັນ ລະຫວ່າງ 3 ກອງທັບ ກຳປູເຈຍ , ລາວ , ຫວຽດນາມ ໃຫ້ແໜ້ນແຟ້ນກວ່າເກົ່າ ທັງເປັນການຝຶກຝົນກໍາລັງແຮງກາຍ, ແຮງໃຈ ຂອງພະນັກງານ – ນັກຝຶກຊ້ອມກອບກູ້ໄພພິບັດ 3 ກອງທັບ ໃຫ້ມີສຸຂະພາບເເຂງເເຮງ ກຽມພ້ອມເຮັດສຳເລັດໜ້າທີ່ໃນບັ້ນຝຶກຊ້ອມ-ຫັດແອບກອບກູ້ໄພພິບັດຮ່ວມ 3 ກອງທັບ ໃຫ້ບັນລຸຜົນສຳເລັດຢ່າງຈົບງາມ.
ຂ່າວຍັງໃຫ້ຮູ້ຕື່ມອີກວ່າ: ໃນຕອນຄໍ່າຂອງວັນດຽວກັນ ຄະນະຝຶກຊ້ອມກອບກູ້ໄພພິບັດ 3 ກອງທັບ ກຳປູເຈຍ, ລາວ, ຫວຽດນາມ ຍັງໄດ້ຮັບຊົມການສະແດງສິລະປະ – ວັນນະຄະດີ ຈາກກອງສິລະປະກອນກອງທັບ ຢ່າງມີບັນຍາກາດຟົດຟື້ນເບີກບານມ່ວນຊື່ນ.
ຂ່າວ:ລຸນທອງ
