ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມພົບປະ ຂອງທ່ານ ດິນກາ ອາທານາ (H.E. Mr. Dinkar Asthana) ເອກອັກຄະລັດຖະທູດອິນເດຍ ປະຈໍາ ສປປ ລາວ ພ້ອມຄະນະ ໃນວັນທີ 13 ກັນຍາ ນີ້ ທີ່ກະຊວງ ຖວທ ເພື່ອສະເໜີຂໍ້ລິເລີ່ມການຈັດຕັ້ງປະຕິບັດໂຄງການປັບປຸງເສັ້ນທາງບູຮານ ເພື່ອສົ່ງເສີມການທ່ຽວທ່ອງ.
ໃນໂອກາດດັ່ງກ່າວ, ນາງ ສວນສະຫວັນ ວິຍະເກດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ທ່ານ ດິນກາ ອາທານາ ໃນການເຂົ້າຢ້ຽມພົບປະໃນຄັ້ງນີ້ ຊຶ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ອິນເດຍ ໃຫ້ ແໜ້ນແຟ້ນຍິ່ງຂຶ້ນ ໂດຍສະເພາະການຮ່ວມມືໂຄງການປັບປຸງເສັ້ນທາງບູຮານ ເພື່ອສົ່ງເສີມການທ່ຽວທ່ອງ ເປັນໂອກາດດີ ໃນການຍາດແຍ່ງທຶນຊ່ວຍເຫຼືອ ເຂົ້າມາຈັດຕັ້ງປະຕິບັດໃນຂົງເຂດວັດທະນະທຳ ຊຶ່ງໃນປີ 2020 ຜ່ານມາ ກະຊວງ ຖວທ ເຄີຍໄດ້ສະເໜີສະຖານທູດອິນເດຍປະຈຳລາວ ພິຈາລະນາສະໜັບສະໜູນການບູລະນະປະຕິສັງຂອນ ເຮືອນຫີນທີ່ແຂວງສະຫວັນນະເຂດ.
ພ້ອມນີ້, ທ່ານ ດິນກາ ອາສທານາ (Dinkar Asthana) ກໍໄດ້ສະແດງຄວາມຂອບໃຈຕໍ່ທ່ານ ລັດຖະມົນຕີ ຖວທ ທີ່ໄດ້ເສຍສະຫຼະເວລາອັນມີຄ່າໃນການຕ້ອນຮັບອັນອົບອຸ່ນໃນຄັ້ງ ເພື່ອປຶກສາຫາລື ກ່ຽວກັບການຈັດຕັ້ງປະຕິບັດໂຄງການປັບປຸງເສັ້ນທາງບູຮານ ເພື່ອສົ່ງເສີມການທ່ອງທ່ຽວ.
Medialaos MMD
