ໃນວັນທີ 19 ສິງຫາ 2022 ນີ້, ກອງພັນ 432 ທະຫານແຂວງວຽງຈັນ, ໄດ້ເປີດຂະບວນການແຂ່ງຂັນສ້າງກົມກອງປອດໃສ,ປອດໄພ,ປອດຄະດີ ປະຈຳ ປີ 2022-2025, ໂດຍການເປັນປະທານຂອງສະຫາຍ ພັນໂທ ເພັດສະໄໝ ໄຊຍະຄໍາ ຮອງເລຂາຄະນະພັກຮາກຖານຫົວຫນ້າການທະຫານກອງພັນ 432 ທະຫານແຂວງວຽງຈັນ, ມີຄະນະພັກ-ຄະນະບັນຊາ,ພະນັກງານ-ນັກຮົບເຂົ້າ. ສະຫາຍ ພັນຕີ ບຸນສີ ປັນຍາສິດ ຄະນະພັກຮາກຖານ ຮອງການເມືອງກອງພັນ 432 ໄດ້ຂື້ນຜ່ານແຜນການສ້າງກົມກອງ ປອດໃສ, ປອດໄພ, ປອດຄະດີ, ອິງຕາມຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການສ້າງກົມກອງປອດໃສ, ປອດໄພ, ປອດຄະດີ ທົ່ວກອງທັບ, ເພື່ອສຶກສາອົບຮົມທາງດ້ານການເມືອງແນວຄິດໃຫ້ນາຍ ແລະ ພົນທະຫານມີແນວຄິດການເມືອງປອດໃສ ໜັກແໜ້ນ ມີຄວາມສັດຊື່ບໍລິສຸດ, ມີຄວາມຈົ່ງຮັກພັກດີຕໍ່ພັກ,ຕໍ່ລັດ,ຕໍ່ປະເທດຊາດ, ມີສະຕິເຄົາລົບການຈັດຕັ້ງ ລະບຽບວິໄນຂອງກອງທັບ, ກົດໝາຍຂອງລັດ ຍົກສູງສະຕິລະວັງຕົວ, ຈຳແນກໄດ້ມິດສັດຕູໃຫ້ຈະແຈ້ງ, ສ້າງໃຫ້ມີທັດສະນະຫຼັກໝັ້ນຊົນຊັ້ນຂອງພັກ, ມີຄຸນທາດການເມືອງໜັກແໜ້ນ ມີຄຸນສົມບັດ ສິນທຳປະຕິວັດ, ມີຄວາມເປັນເອກະພາບພາຍໃນພັກ, ພາຍໃນກົມກອງ, ຕ້ານແນວຄິດຫຼາຍພັກ-ຫຼາຍເຄົ້າ, ຈຸມເຈື່ອພັກພວກ.
ກຸ່ມກ້ອນແບ່ງແຍກຄວາມສາມັກຄີພາຍໃນ, ຕ້ານແນວຄິດເອກະເທດ-ເອກະຊົນ ສໍ້ລາດບັງຫຼວງ, ສວຍໃຊ້ໜ້າທີ່ຕຳແໜ່ງ, ຕ້ານ ແລະ ສະກັດກັ້ນປະກົດການຫຍໍ້ທໍ້ດ້ານຕ່າງໆ ຢູ່ພາຍໃນກົມກອງໃຫ້ໄດ້ 90% ຂື້ນໄປ, ຕາມ 5 ມາດຖານໃນການສ້າງກົມກອງປອດໃສ, ປອດໄພ, ປອດຄະດີ, ຄື ດ້ານການເມືອງ, ດ້ານການຈັດຕັ້ງ, ປ້ອງກັນການເມືອງພາຍໃນ, ປ້ອງກັນຮັກສາຄວາມລັບ ແລະ ປ້ອງກັນຄວາມປອດໄພ, ທັງນີ້ກໍ່ເພື່ອເຮັດໃຫ້ກົມກອງມີຄວາມສະຫງົບປອດໃສ ຕ້ານ ແລະ ສະກັດກັ້ນການເລັດລອດແຊກຊຶມຂອງສັດຕູ ແລະ ກຸ່ມຄົນບໍ່ດີແຊກຊຶມເຂົ້າພາຍໃນກົມກອງ, ເພີ່ມທະວີວຽກງານປ້ອງກັນພາຍໃນກອງທັບໃນໄລຍະໃໝ່ໃຫ້ກາຍເປັນໜ້າທີ່ຄວາມຮັບຜິດຊອບຂອງຄະນະພັກ – ຄະນະບັນຊາ, ນາຍ ແລະ ພົນທະຫານເຂົ້າໃຈຕໍ່ວຽກງານປ້ອງກັນພາຍໃນ ທັງເປັນເຈົ້າການປ້ອງກັນພັກ-ພະນັກງານ, ປ້ອງກັນຕົນເອງ ແລະ ປ້ອງກັນກົມກອງໃຫ້ມີຄວາມສະຫງົບປອດໄພ.
ໂດຍ:ຈັນທະຈອນ ສີສະເກດ
