ວັນທີ 10 ສິງຫາ 2022 ໄດ້ມີກອງປະຊຸມ ການລາຍງານ ແລະເຜີຍແຜ່ຜົນຂອງການວິໄຈ ໃນຫົວຂໍ້ “ແນວທາງການຟື້ນຟູການທ່ອງທ່ຽວ ພາຍຫຼັງການແຜ່ລະບາດຂອງໂຄວິດ 19 ຂອງແຂວງຫຼວງພະບາງ” ໂດຍມີທ່ານ ໂອກາວະ ມາຊາຊູມິ ຫົວໜ້າໂຄງການ ໄຈກາ ປະຈຳແຂວງຫຼວງພະບາງ,ທ່ານ ຮສ.ປອ ທອງວັນ ສີຣິວັນ ຄະນະເສດຖະສາດ ແລະບໍລິຫານທຸລະກິດ ມະຫາວິທະຍາໄລ ແຫ່ງຊາດ,ຕາງໜ້າຈາກພະແນກການ, ຂະແໜງການ, ຫ້ອງການ ຖວທ ນະຄອນ ແລະວິທະຍາກອນ ຈາກມະຫາວິທະຍາໄລສຸພານຸວົງ ເຂົ້າຮ່ວມ.
ການລາຍງານ ແລະເຜີຍແຜ່ຜົນຂອງການວິໄຈ ໃນຫົວຂໍ້ “ແນວທາງການຟື້ນຟູການທ່ອງທ່ຽວ ພາຍຫຼັງການແຜ່ລະບາດຂອງໂຄວິດ 19 ຂອງແຂວງຫຼວງພະບາງ” ແມ່ນພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງ ເປັນຜູ້ຮັບຜິດຊອບໃນການຈັດຕັ້ງປະຕິບັດ ແລະໄດ້ຮັບການສະໜັບສະໜູນ ຈາກໂຄງການສ້າງຄວາມອາດສາມາດດ້ານການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງແບບຍືນຍົງ ເພື່ອການທ່ອງທ່ຽວ ຫຼື ໄຈກາ (JICA-CEML).ເຊິ່ງການວິໄຈ ກໍແມ່ນເພື່ອວິເຄາະລະດັບຜົນກະທົບຂອງການແຜ່ລະບາດຂອງພະຍາດໂຄວິດ-19 ຕໍ່ການທ່ອງທ່ຽວໃນແຂວງຫຼວງພະບາງ, ເພື່ອວິເຄາະລະດັບການປັບຕົວຂອງການທ່ອງທ່ຽວໃນແຂວງຫຼວງພະບາງ ພາຍໃຕ້ສະຖານະການການແຜ່ລະບາດຂອງພະຍາດໂຄວິດ-19 ແລະເພື່ອສຶກສາແນວທາງການຟື້ນຟູການທ່ອງທ່ຽວພາຍຫລັງການແຜ່ລະບາດຂອງພະຍາດໂຄວິດ-19 ຂອງແຂວງຫລວງພະບາງ.
ສໍາລັບການຄົ້ນຄວ້າວິໄຈ ເປັນການຄົ້ນຄວ້າວິໄຈແບບປະລິມານ ໂດຍຄະນະຊ່ຽວຊານຈາກຕ່າງປະເທດ ໃນໂຄງການສ້າງຄວາມອາດສາມາດດ້ານການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງແບບຍືນຍົງ ເພື່ອການທ່ອງທ່ຽວ ເພື່ອເປັນແນວທາງ ໃນການປັບປຸງການທ່ອງທ່ຽວ ຂອງແຕ່ລະພາກສ່ວນ ໃຫ້ກົງກັບຄວາມຕ້ອງການຂອງນັກທ່ອງທ່ຽວ, ເພື່ອສົ່ງເສີມໃຫ້ຄົນພາຍໃນທ່ຽວຊົມໃຊ້ຜະລິດຕະພັນການທ່ອງທ່ຽວພາຍໃນປະເທດຫຼາຍຂຶ້ນ ໂດຍຜົນທີ່ຈະໄດ້ຮັບຈາກການສຶກສາໃນຄັ້ງນີ້ຈະມີສ່ວນຊ່ວຍໃນການພັດທະນາການທ່ອງທ່ຽວໃນແຂວງຫຼວງພະບາງໃຫ້ມີມາດຕະຖານການທ່ອງທ່ຽວທີ່ດີຂຶ້ນ ແລະການປັບຕົວຕໍ່ກັບສະຖານະການການດຳລົງຊີວິດແບບໃໝ່ ຂອງປະຊາຊົນ ແລະທຸລະກິດການທ່ອງທ່ຽວທຸກພາກສ່ວນຕ້ອງມີຄວາມຕື່ນຕົວ ແລະຮີບຮ້ອນດຳເນີນການໃນການຊອກມາດຕະການເພື່ອເປັນແນວທາງໃນການຮັບມືກັບການແກ້ໄຂບັນຫາຕ່າງໆ ທີ່ຈະເກີດຂຶ້ນ ອັນຈະເຮັດໃຫ້ສະຖານະການດັ່ງກ່າວ ກັບມາຢູ່ໃນພາວະປົກກະຕິ ພ້ອມກັບປັບຕົວເອງໃຫ້ເຂົ້າກັບການດຳລົງຊີວິດແບບໃໝ່ ໄດ້ຢ່າງເໝາະສົມ ແລະປອດໄພຈາກພະຍາດລະບາດ ຫຼື ໂຄວິດ-19 ທີ່ອາດຈະມີການລະບາດຂຶ້ນມາອີກຍາມໃດກໍໄດ້.
ກອງປະຊຸມຄັ້ງນີ້ ກໍແມ່ນກອງປະຊຸມວິຊາການ ເຊິ່ງໄດ້ນຳຜົນການວິເຄາະຕົວຈິງຈາກການໄດ້ລົງເກັບກຳ ສຳພາດຂໍ້ມູນ ຜົນກະທົບ ແລະຄຳຄິດເຫັນຈາກບັນດາທ່ານຜູ້ປະກອບການທຸລະກິດທ່ອງທ່ຽວພາຍໃນ ນະຄອນ ຫຼວງພະບາງ ແລະໄດ້ນຳມາສຶກສາ ແລະວິເຄາະຕາມສູດການຄິດໄລ່, ສັງລວມ ແລະສະຫຼຸບຜົນ. ເພື່ອໃຫ້ບັນດາທ່ານຜູ້ແທນກອງປະຊຸມ ປະກອບຄຳຄິດເຫັນຕື່ມໃສ່ບົດລາຍງານດັ່ງກ່າວນີ້ໃຫ້ສົມບູນ ແລະສາມາດນຳເອົາແຜນຟື້ນຟູການທ່ອງທ່ຽວນີ້ໄປຈັດຕັ້ງປະຕິບັດໃນຕໍ່ໜ້າ,ເພື່ອສ້າງຄວາມເປັນເອກະພາບໃນຂອດການບໍລິການ ທີ່ມີຄຸນນະພາບ ແລະມີປະສິດທິຜົນຕາມພາລະບົດບາດ, ໜ້າທີ່ຮັບຜິດຊອບຂອງແຕ່ລະພາກສ່ວນ ແລະທຸລະກິດໃຫ້ເກີດຜົນປະໂຫຍດສູງສຸດ.
ຂ່າວ: ເພັດສາຄອນ ສິມມະວົງ
