ໃນຕອນເຊົ້າວັນທີ 10 ສິງຫາ ນີ້, ທີ່ສະໂມສອນແຂວງ #ຄະນະກໍາມະການແນວລາວສ້າງຊາດແຂວງເຊກອງ ໄດ້ຈັດພິທີທໍາບຸນຕັກບາດ ຖວາຍສັງຄະທານ ແດ່ພະສົງ 19 ອົງ ເພື່ອເປັນສີລິມຸງຄຸນ ໃນງານສະເຫຼີມສະຫຼອງລະນຶກເຖິງ #ວັນສ້າງຕັ້ງແນວລາວສ້າງຊາດ ຄົບຮອບ 72 ປີ (13 ສິງຫາ 1950-13 ສິງຫາ 2022), ໂດຍການເຂົ້າຮ່ວມຂອງທ່ານ ເຫຼັກໄຫຼ ສີວິໄລ ເຈົ້າແຂວງ, ມີທ່ານ ນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງ, ມີພຣະເຖຣາ ນຸເຖຣະ ພຣະສົງ, ບັນດາທ່ານການນຳພັກ-ລັດຂັ້ນແຂວງ, ການນຳພັກ-ລັດເມືອງລະມາມ ຕະຫຼອດເຖິງຊາວພຸດທະສາສະນິກະຊົນເຂົ້າຮ່ວມຢ່າງຫຼວງຫຼາຍ.
ຊຶ່ງຈຸດປະສົງໃນການທໍາບຸນຕັກບາດຖວາຍສັງຄະທານ ໃນຄັ້ງນີ້ ໂດຍເຈດຈຳນົງອັນແຮງກ້າດ້ວຍຈິດໃຈໃສສັດທາທາງພຸດທະສາສະໜາ ໂດຍມີ ທ່ານ ນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງ ພ້ອມດ້ວຍພະນັກງານ-ລັດຖະກອນ ໄດ້ເປັນເຈົ້າພາບຈັດພິທີນີ້ຂຶ້ນ ເພື່ອເປັນສິລິມຸງຄຸນ ແລະເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງແນວລາວສ້າງຊາດ ເຊິ່ງໄດ້ໝູນວຽນມາບັນຈົບຄົບ ຮອບ 72 ປີ ໃຫ້ເປັນຂະບວນຟົດຟື້ນ.
ໂອກາດນີ້ ທ່ານ ເຫຼັກໄລ ສີວິໄລ ໄດ້ໃຫ້ກຽດຂຶ້ນໄຕ້ທຽນໄຊບູຊາພຣະຣັດຕະນະໄຕຣ ແລະລັ່ນຄ້ອງ 9 ບາດ ເພື່ອສີລິມຸງຄຸນໃນງານດັ່ງກ່າວ, ນອກຈາກນີ້ ກໍໄດ້ມີການໄຫ້ວພຣະ ຮັບສິນ ແລະຖວາຍສັງຄະທານ ໃສ່ບາດ ຢາດນໍ້າຕາມປະເພນີ.
ຂ່າວ:ພຸດທະສອນ
