ໃນນາມສະຫະພັນບານເຕະແຫ່ງຊາດລາວ (ສຕລ), ຄະນະຄູຝຶກ, ນັກກິລາ ຂໍຂອບໃຈເປັນຢ່າງສູງມາຍັງບໍລິສັດ, ທະນາຄານ, ຫ້າງຮ້ານຕ່າງໆ ແລະ ນິຕິບຸກຄົນ ທີ່ໄດ້ໃຫ້ການສະຫນັບສະຫນູນ ທີມຊາດລາວຮຸ່ນອາຍບໍ່ເກີນ 19 ປີ (U-19) ທີ່ຍາດໄດ້ຮອງແຊ້ມການແຂ່ງຂັນບານເຕະຊາຍຊີງແຊ້ມອາຊຽນ AFF U-19 CHAMPIONSHIP 2022 ທີ່ປະເທດອິນໂດເນເຊຍ ໂດຍໄດ້ຮັບເງິນສະຫນັບສະຫນູນທັງໝົດ 3,263,998,222 ກີບ ແລະ ຈຳນວນເງິນທັງໝົດແມ່ນໄດ້ມອບໃຫ້ຄະນະນັກກິລາ ແລະ ຄູຝຶກທີມຊາດລາວ U-19 ໃນຈຳນວນ 35 ຄົນ ໂດຍກົງ, ບໍ່ມີການຫັກອອກມານຳໃຊ້ເພື່ອວຽກງານອື່ນຢ່າງເດັດຂາດ ເຊິ່ງປັດຈຸບັນຄະນະຄູຝຶກ ແລະ ນັກກິລາແມ່ນໄດ້ຮັບເງິນແລ້ວ.
ການອຸປະຖຳດັ່ງກ່າວໄດ້ກາຍເປັນຂວັນ ແລະ ກຳລັງໃຈໃຫ້ກັບຄະນະຄູຝຶກ ແລະ ນັກກິລາ ທີມຊາດລາວ U-19 ແລະ ຫວັງຢ່າງຍິ່ງວ່າທິມນັກກິລາບານເຕະລາວຈະສືບຕໍ່ໄດ້ຮັບການສະຫນັບສະຫນູນຈາກບັນດາທ່ານໃນຕໍ່ໆ ໄປ ເຊິ່ງຄະນະຄູຝຶກ, ນັກກິລາ ຂໍສັນຍາວ່າຈະພະຍາຍາມຝຶກຊ້ອມໃຫ້ດີກວ່າເກົ່າ ພ້ອມນຳໃຊ້ບົດຮຽນ ແລະ ປະສົບການໃນການແຂ່ງຂັນຊຸດນີ້ໄປປັບປຸງ ແລະ ເສີມຂະຫຍາຍເພື່ອສ້າງຜົນງານໃໝ່ອອກມາໃຫ້ດີທີ່ສຸດ.
ສຳລັບລາຍການຕໍ່ໄປທີມຊາດລາວ ມີລາຍການເຂົ້າຮ່ວມການແຂ່ງຂັນບານເຕະຊີງແຊ້ມອາຊີຮຸ່ນອາຍຸບໍ່ເກີນ 20 ປີ ຮອບຄັດເລືອກແຂ່ງຂັນໃນລະຫວ່າງວັນທີ 10-18 ກັນຍາ 2022 ໂດຍ ສປປລາວ ໄດ້ຮັບກຽດເປັນເຈົ້າພາບກຸ່ມ C ຮ່ວມກັບຍີ່ປຸ່ນ, ເຢເມນ, ປາແລສຕິນ, ລາວ (ເຈົ້າພາບ) ແລະ ກວມ.
ຕາຕະລາງ ການແຂ່ງຂັນຂອງ ທີມຊາດລາວ
- 10/09/2022 ເວລາ 19:00 ລາວ ພົບ ກວມ
- 12/09/2022 ເວລາ 19:00 ລາວ ພົບ ຍີ່ປຸ່ນ
- 14/09/2022 ເວລາ 19:00 ລາວ ພົບ ເຢເມນ
- 18/09/2022 ເວລາ 19:00 ລາວ ພົບ ປາແລສຕິນ
ທຸກໆ ນັດແມ່ນແຂ່ງຂັນຢູ່ທີ່ສະຫນາມກິລາແຫ່ງຊາດຫຼັກ 16, ການແຂ່ງຂັນລາຍການດັ່ງກ່າວ ມີ 43 ທີມ ເຂົ້າຮ່ວມໂດຍໄດ້ແບ່ງອອກເປັນ 10 ກຸ່ມ, ອັນດັບ 1 ຂອງແຕ່ລະກຸ່ມແມ່ນຈະໄດ້ຜ່ານເຂົ້າຮອບ ແລະ ອັນດັບ 2 ທີ່ມີຄະແນນດີທີ່ສຸດຈຳນວນ 5-6 ທີມ ຈະໄດ້ຜ່ານເຂົ້າຮອບສຸດທ້າຍ ທີ່ປະເທດອຸສະເບກິສຖານ ໃນປີ 2023.
