ວັນທີ 8 ມິຖຸນາ 2022 ຢູ່ທີ່ເຮືອນຮັບແຂກເລກ 01 ຂອງແຂວງຄຳມ່ວນໄດ້ຈັດກອງປະຊຸມປະກອບຄຳຄິດ – ຄຳເຫັນ ໃສ່ຮ່າງນິຕິກຳລຸ່ມກົດໝາຍ ໂດຍການເປັນປະທານຂອງ ທ່ານ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງ ຄຳມ່ວນ ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ, ເຂົ້າຮ່ວມມີ ທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ ປູ້ຊີ້ນຳຂົງເຂດເສດຖະກິດ, ມີບັນດາຫົວໜ້າພະແນກການ, ກົມກອງ, ພະນັກງານຫລັກແຫລ່ງອ້ອມຂ້າງເຂົ້້າຮ່ວມ.
ກອງປະຊຸມໄດ້ຮັບຟັງການຜ່ານຮ່າງຂໍ້ຕົກລົງວ່າດ້ວຍການອະນຸລັກ, ຄຸ້ມຄອງເຮືອນອານານິຄົມສະໄໝຝຣັ່ງຢູ່ເມືອງທ່າແຂກ, ຮ່າງຄຳແນະນໍາວ່າດ້ວຍການສົ່ງເສີມການຜະລິດເປັນສິນຄ້າ ແລະ ການຊົມໃຊ້ຜະລິດຕະພັນພາຍໃນແຂວງ, ຮ່າງຂໍ້ຕົກລົງວ່າດ້ວຍການຄຸ້ມຄອງການຮ່ອນແຮ່ກົ່ວແບບພື້ນເມືອງ ແລະ ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ຈັດສັນຄວາມເປັນລະບຽບຮຽບຮ້ອຍຂອງເມືອງທ່າແຂກ.
ເຊິ່ງສະເໜີໂດຍພະແນກການກ່ຽວຂ້ອງ, ພ້ອມນັ້ນບັນດາທ່ານທີ່ເຂົ້າຮ່ວມກໍ່ໄດ້ປະກອບຄຳຄິດຄໍາເຫັນ, ຕາມຄຳຖາມເຈາະຈິ້ມ ແລະ ຕອບຄຳສັກຖາມຕ່າງໆ ເພື່ອແນໃສ່ເຮັດ ໃຫ້ຮ່າງນິຕິກຳດັ່ງກ່າວມີເນື້ອໃນຄົບຖ້ວນສົມບູນ, ແທດເໝາະ, ສອດຄ່ອງຕາມພາລະບົດບາດ, ສິດ, ໜ້າທີ່ ແລະ ໄປຕາມກົດໝາຍກຳນົດໄວ້. ເຊິ່ງຮ່າງນິຕິກຳຈຳນວນ 4 ສະບັບນີ້ ແມ່ນຈະໄດ້ນຳໄປລາຍງານຕໍ່ຄະນະປະຈຳພັກແຂວງ ແລະ ສະເໜີຕໍ່ກອງປະຊຸມສະພາປະຊາຊົນແຂວງຄົ້ນຄວ້າພິຈາລະນາ ແລະ ຮັບຮອງ ເພື່ອນຳໄປຈັດຕັ້ງປະຕິບັດໃຫ້ເປັນຮູບປະທຳ ໃນໄລຍະຕໍ່ໄປ.
ພາບ-ຂ່າວ: ນັກຂ່າວ ນັກຂ່າວແຂວງຄຳມ່ວນ
#Medialaos MMD #Khammouan Province
