ນັບແຕ່ເດີນທາງມາຮອດປະເທດ ສ. ຣັດເຊຍ ກ້ອນກຳລັງສວນສະໜາມກອງທັບປະຊາຊົນລາວ ໄດ້ເອົາໃຈໃສ່ ແລະ ຍົກສູງຄວາມຮັບຜີດຊອບໃນການຈັດຕັ້ງເຝິກຊ້ອມກຳລັງເພື່ອຮັບປະກັນເຖິງຄວາມເຂັ້ມແຂງທາງດ້ານຈັງຫວະເຕັກນິກເດີນສວນສະໜາມ ແລະ ມີຄວາມເປັນເອກະພາບ ຈົບງາມ ເພື່ອກະກຽມຄວາມພ້ອມຮອບດ້ານ.
ມາຮອດຄ່ຳຄືນຂອງວັນທີ່ 29 ເມສາ 2025 ກ້ອນກຳລັງສວນສະໜາມກອງທັບປະຊາຊົນລາວ ໄດ້ເຂົ້າຮ່ວມຫັດແອບຊ້ອມປະສານໃຫຍ່ ຄັ້ງທີ I ກັບບັນດາກ້ອນກຳລັງສວນສະໜາມທີ່ເຂົ້າພິທີສະເຫຼີມສະຫຼອງ ເນື່ອງໃນວັນໄຊຊະນະສົງຄາມປ້ອງກັນປິຕຸພູມ ຄົບຮອບ 80 ປີ ຢູ່ສະໜາມແດງ ນະຄອນຫຼວງມົດສະກູ ສ.ຣັດເຊຍ ໃນທ່າມກາງການຝຶກຊ້ອມທີ່ມີອາກາດໜາວເຢັນທັງມີຝົນຕົກ.
ແຕ່ຜ່ານການຫັດແອບຕົວຈິງ ເຫັນໄດ້ວ່າກ້ອນກຳລັງກອງທັບປະຊາຊົນລາວ ສາມາດຮັບປະກັນໄດ້ທາງດ້ານສຸຂະພາບ ຈັງຫວະເຕັກນິກເດີນສວນສະໜາມມີຄວາມເຂັ້ມແຂງ ແລະ ເປັນເອກະພາບກັບບັນດາກ້ອນກຳລັງ.
ທີ່ມາ: ວິທະຍຸກະຈາຍສຽງກອງທັບປະຊາຊົນລາວ
