ຂ່າວຕ່າງປະເທດລາຍງານ ໃນວັນທີ 1 ເມສາ ຜ່ານມາວ່າ: ທ່ານນາງ ຄຣິສຕາລິນາ ຈໍເຈຍວາ ຜູ້ອໍານວຍການກອງທຶນການເງິນສາກົນ (IMF) ກ່າວວ່າ: ຄວາມບໍ່ແນ່ນອນກ່ຽວກັບແຜນການອັດຕາພາສີຂອງປະທານາທິບໍດີ ສະຫະລັດ ອາເມຣິກາ ສົ່ງຜົນກະທົບຕໍ່ກິດຈະກໍາທາງເສດຖະກິດທົ່ວໂລກ, ໂດຍຄວາມບໍ່ແນ່ນອນດັ່ງກ່າວຍິ່ງແກ່ຍາວເທົ່າໃດ ຄວາມສ່ຽງຍິ່ງຫຼາຍຂຶ້ນເທົ່ານັ້ນ.
ທ່ານນາງ ຄຣິສຕາລິນາ ຈໍເຈຍວາ ກ່າວຕື່ມວ່າ: IMF ຮັບຮູ້ສັນຍານຄວາມສ່ຽງຕ່າງໆ ຈາກຂໍ້ມູນຫຼ້າສຸດ ຊຶ່ງສະທ້ອນໃຫ້ເຫັນວ່າຄວາມໝັ້ນໃຈຂອງຜູ້ບໍລິໂພກ ແລະ ນັກລົງທຶນກຳລັງຫຼຸດລົງ ແລະ ປ່ຽນເປັນຜົນກະທົບຕໍ່ໂອກາດການຂະຫຍາຍຕົວທີ່ຫຼາຍພໍຈະເຮັດໃຫ້ເກີດການປັບຫຼຸດໂຕເລກການຄາດຄະເນການເຕີບໂຕຂອງເສດຖະກິດໂລກລົງເລັກໜ້ອຍ.
ໃນຂະນະດຽວກັນ, ທ່ານປະທານາທິບໍດີ ສະຫະລັດ ອາເມຮິກາ ປະກາດແຜນການທີ່ຈະເກັບພາສີຫຼາຍລາຍການ ຊຶ່ງບາງອັນໄດ້ມີຜົນບັງຄັບໃຊ້ແລ້ວ ແລະ ບາງອັນມີຜົນບັງຄັບໃຊ້ໃນ 2 ເມສາ ຜ່ານມານີ້.
