ພິທີສະເຫລີມສະຫລອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 70 ປີ ໄດ້ຈັດຂຶ້ນ ໃນວັນທີ 22 ມັງກອນ 2025 ຢູ່ນະຄອນຫລວງໂຕກຽວ, ປະເທດຍີ່ປຸ່ນ ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ, ມີ ບັນດາລັດຖະມົນຕີ, ຮອງລັດຖະມົນຕີ, ປະທານສະມາຄົມມິດຕະພາບ ລາວ-ຍີ່ປຸ່ນ, ປະທານສະມາຄົມມິດຕະພາບລັດຖະສະພາ ຍີ່ປຸ່ນ-ລາວ ແລະ ແຂກຖືກເຊີນ ຈາກທັງສອງຝ່າຍ ເຂົ້າຮ່ວມ.
ສປປ ລາວ ແລະ ຍີ່ປຸ່ນ ໄດ້ສ້າງຕັ້ງສາຍພົວພັນການທູດນໍາກັນ ແຕ່ວັນທີ 5 ມີນາ 1955 ເຊິ່ງຖືເປັນຂີດໝາຍສໍາຄັນທາງດ້ານປະຫວັດສາດຂອງສອງປະເທດ ແລະ ນັບຈາກນັ້ນເປັນຕົ້ນມາ ສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ລາວ ແລະ ຍີ່ປຸ່ນ ໄດ້ຮັບການພັດທະນາຂຶ້ນເປັນກ້າວໆ. ມາຮອດປີ 2010, ສປປ ລາວ ແລະ ຍີ່ປຸ່ນ ໄດ້ຍົກລະດັບການພົວພັນເປັນ ຄູ່ຮ່ວມມືຮອບດ້ານ ແລະ ຕໍ່ມາໃນປີ 2015 ໃນໂອກາດຄົບຮອບ 60 ປີ ແຫ່ງການສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຍີ່ປຸ່ນ, ສອງປະເທດ ກໍໄດ້ຍົກລະດັບການພົວພັນຂຶ້ນມາເປັນ ຄູ່ຮ່ວມຍຸດທະສາດ. ພິເສດ, ໃນປີ 2025 ນີ້, ບໍ່ພຽງແຕ່ແມ່ນ ຄົບຮອບ 70 ປີ ແຫ່ງການສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຍີ່ປຸ່ນ ແລະ ຄົບຮອບ 60 ປີ ທີ່ລັດຖະບານຍີ່ປຸ່ນ ໄດ້ສົ່ງອາສາສະໝັກຍີ່ປຸ່ນ ໄປປະຕິບັດໜ້າທີ່ຢູ່ ສປປ ລາວ ເທົ່ານັ້ນ, ແຕ່ຍັງແມ່ນປີແຫ່ງການຍົກລະດັບກ້າວສູ່ການເປັນ ຄູ່ຮ່ວມຍຸດທະສາດຮອບດ້ານ ນໍາກັນອີກດ້ວຍ.
ໃນພິທີດັ່ງກ່າວ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຂຶ້ນມີຄໍາເຫັນ ໂດຍໄດ້ຍົກໃຫ້ເຫັນເຖິງໝາກຜົນຂອງການພົວພັນ ແລະ ຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ຕະຫລອດໄລຍະ 7 ທົດສະວັດທີ່ຜ່ານມາ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງໃນຫລາຍຂົງເຂດ ແລະ ນໍາຜົນສໍາເລັດມາສູ່ປະຊາຊົນສອງຊາດ ເປັນຕົ້ນ ແມ່ນ ຄວາມເຂົ້າໃຈເຊິ່ງກັນ ແລະ ກັນ ລະຫວ່າງສອງປະເທດ ໄດ້ຮັບການພັດທະນາດີຂຶ້ນ ໂດຍຜ່ານການຢ້ຽມຢາມເຊິ່ງກັນ ແລະ ກັນ ໃນລະດັບຕ່າງໆ; ການຮ່ວມມືເພື່ອການພັດທະນາ ສປປ ລາວ ໄດ້ຮັບການເສີມຂະຫຍາຍຢ່າງຕໍ່ເນື່ອງ ໂດຍສະເພາະການພັດທະນາຊັບພະຍາກອນມະນຸດ, ສາທາລະນະສຸກ, ກະສິກໍາ, ປ່າໄມ້ ແລະ ພື້ນຖານໂຄງລ່າງ. ພິເສດ ແມ່ນການຊ່ວຍເຫລືອ ໃນຂະແໜງການເກັບກູ້ລະເບີດບໍ່ທັນແຕກ (UXO) ເຊິ່ງເປັນໜຶ່ງໃນໂຄງການບຸລິມະສິດຂອງ ສປປ ລາວ ທີ່ ຍີ່ປຸ່ນ ເປັນຜູ້ໃຫ້ທຶນສະໜັບສະໜູນຫລັກມາແຕ່ດົນນານ ລວມເຖິງການຊ່ວຍເຫລືອໃນໂຄງການປັບປຸງສະໜາມກິລາເຈົ້າອະນຸວົງ ເຊິ່ງເປັນສັນຍາລັກໜຶ່ງ ໃນການສະເຫລີມສະຫລອງ 70 ປີ ຂອງສອງປະເທດ. ພ້ອມນີ້, ການຮ່ວມມືດ້ານການຄ້າ ແລະ ການລົງທຶນ ໄດ້ຮັບການພັດທະນາຂຶ້ນຢ່າງເປັນກ້າວໆ ແລະ ພາຍຫລັງ ທີ່ສອງຝ່າຍໄດ້ມີສົນທິສັນຍາປົກປ້ອງການລົງທຶນ ໃນປີ 2008, ຈໍານວນບໍລິສັດຂອງຍີ່ປຸ່ນ ທີ່ມາລົງທຶນໃນ ສປປ ລາວ ກໍເພີ່ມຂຶ້ນຢ່າງຕໍ່ເນື່ອງ; ການຮ່ວມມືໃນເວທີພາກພື້ນ ແລະ ສາກົນ ກໍໄດ້ມີການສະໜັບສະໜູນ ແລະ ຮ່ວມມືຊ່ວຍເຫລືອເຊິ່ງກັນ ແລະ ກັນ ເປັນຢ່າງດີ, ພິເສດ ຍີ່ປຸ່ນຍັງໄດ້ໃຫ້ການຊ່ວຍເຫລືອທາງການເພື່ອການພັດທະນາ (ODA) ແກ່ ສປປ ລາວ ເປັນອັນດັບຕົ້ນໆ ມາຫລາຍສິບປີ ສະເລ່ຍ 90-100 ລ້ານໂດລາສະຫະລັດ ຕໍ່ປີ.
ທ່ານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຍັງໃຫ້ຮູ້ອີກວ່າ: ໃນປີ 2025 ນີ້ ຈະມີຫລາຍກິດຈະກໍາ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ ແລະ ຍີ່ປຸ່ນ ຄົບຮອບ 70 ປີ ຢ່າງເປັນຂະບວນຟົດຟື້ນ ເປັນຕົ້ນ ບຸນມະໂຫລານຍີ່ປຸ່ນ, ງານບຸນລາວ, ງານວາງສະແດງພິເສດ ເພື່ອເຜີຍແຜ່ວັດທະນະທໍາຂອງສອງປະເທດ ແລະ ກິດຈະກໍາອື່ນໆ ເຊິ່ງຈະຈັດຂຶ້ນທັງໃນ ສປປ ລາວ ແລະ ຍີ່ປຸ່ນ.
ຂ່າວ-ພາບ: ກຕທ
