ພິທີເປີດງານບຸນປະເພນີບັນດາເຜົ່າ ເພື່ອສົ່ງເສີມການທ່ອງທ່ຽວ ປະຈຳປີ 2025 ທີ່ແຂວງອຸດົມໄຊ ຈັດຂຶ້ນໃນວັນທີ 16 ມັງກອນນີ້ ທີ່ສະໜາມກິລາແຂວງ. ມີ ທ່ານ ບຸນຄົງ ຫຼ້າຈຽມພອນ, ເຈົ້າແຂວງອຸດົມໄຊ, ທ່ານ ຄຳຈັນ ໂສຕາປະເສີດ ປະທານກຳມະທິການບັນດາເຜົ່າ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 4; ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍແຂກຮັບເຊີນ, ປະຊາຊົນບັນດາເຜົ່າ, ນັກທ່ອງທ່ຽວທັງພາຍ ໃນ ແລະ ຕ່າງ ປະເທດເຂົ້າາຮ່ວມ.
ທ່ານ ບຸນຄົງ ຫຼ້າຈຽມພອນ ໃຫ້ຮູ້ວ່າ: ແຂວງອຸດົມໄຊ ປະກອບມີ 12 ຊົນເຜົ່າຄື: ເຜົ່າລາວ, ເຜົ່າກຶມມຸ, ເຜົ່າມົ້ງ, ເຜົ່າໄຕ, ເຜົ່າລື້, ເຜົ່າຢັ້ງ, ເຜົ່າບິດ, ເຜົ່າລະເມັດ, ເຜົ່າອີວມຽນ, ເຜົ່າອາຄາ, ເຜົ່າພູນ້ອຍ ແລະ ເຜົ່າຫໍ້. ຕະຫຼອດໄລຍະທີ່ຜ່ານມາແຕ່ລະເຜົ່າໄດ້ດຳລົງຊີວິດຢູ່ຮ່ວມກັນຢ່າງສັນຕິ, ມີຄວາມສາມັກຄີປອງດອງ, ມີວິຖີຊີວິດ, ມູນເຊື້ອປະຫວັດສາດ, ວັດທະນະທໍາ ຮີດຄອງປະເພນີອັນດີງາມ ແລະ ມີພາສາປາກເວົ້າທີ່ເປັນເອກະລັກສະເພາະຂອງຕົນ ແລະ ໄດ້ພ້ອມກັນທຳມາຫາກິນສ້າງສາພັດທະນາເຮືອນຊານບ້ານສ່ອງຂອງຕົນ ທັງເປັນການປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາແຂວງອຸດົມໄຊ ໃຫ້ມີຄວາມເຕີບໃຫຍ່ ເຂັ້ມແຂງ ຈະເລີນ ຮຸ່ງເຮືອງ ເປັນກ້າວໆ ມາ.
ພ້ອມນີ້ທ່ານໄດ້ເຊີນຊວນບັນດາທ່ານນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເຂົ້າມາຢ້ຽມຢາມ ແລະ ທ່ຽວຊົມວັດທະນະທໍາ-ຮີດຄອງປະເພນີທີ່ຫຼາກຫຼາຍສີສັນຂອງບັນດາເຜົ່າ ຕິດພັນກັບການທ່ຽວຊົມສະຖານທີ່ທ່ອງທ່ຽວທາງດ້ານທຳມະຊາດ, ປະຫວັດສາດ ແລະ ວັດທະນະທຳຕ່າງໆ ຂອງແຂວງອຸດົມໄຊ ຕາມຄໍາຂວັນທີ່ວ່າ: “ທ່ຽວແຂວງອຸດົມໄຊ ໄປຊົມທຳມະຊາດນໍ້າກັດຍໍລະປາ, ຊົມວັດທະນະທໍາບັນດາເຜົ່າ, ໄຫວ້ພະເຈົ້າສິງຄໍາ, ດື່ມນໍ້າຊາພັນປີ, ຂີ່ເຮືອຊົມທຳມະຊາດແມ່ນໍ້າຂອງ”.
ພາຍໃນງານຄັ້ງນີ້ມີກິດຈະກຳງານວາງສະແດງສິນຄ້າຫັດຖະກຳ-ກະສິກຳ, ປະກວດສິນຄ້າເຄື່ອງຕ້ອນຂອງຝາກ, ຈັດເວທີສົນ ທະນາເຜີຍແຜ່ເອກະສານກ່ຽວກັບການເຂົ້າເຖິງແຫຼ່ງທືນດອກເບ້ຍຕໍ່າຂອງລັດຖະບານ ແລະ ແນະນໍາການຂາຍສິນຄ້າຜ່ານລະບົບອອນລາຍ. ຊົມບັນດາກິດຈະກຳຕ່າງໆ ຂອງ 5 ເຜົ່າຄື: ເຜົ່າກຶມມຸ, ເຜົ່າມົ້ງ, ເຜົ່າຫໍ້, ເຜົ່າໄຕດໍາ ແລະ ເຜົ່າລາວ ຊຶ່ງສະແດງເຖິງວັດທະນະທຳ, ວິຖີດໍາລົງຊີວິດ, ຮີດຄອງປະເພນີອັນດີງາມຂອງບັນດາເຜົ່າ. ຊົມການສະແດງງານຄອນເສີດຂອງນັກຮ້ອງທີ່ມີຊື່ສຽງ, ງານປະກວດນັກຮ້ອງສຽງດີ, ການສະແດງສິນລະປະວັນນະຄະດີບັນດາເຜົ່າ ແລະ ຕິດພັນກັບການເດີນແບບຍິງ-ຊາຍນຸ່ງເຄື່ອງບັນດາເຜົ່າ ແລະ ອື່ນໆ.
ຂ່າວ: ຄຳພູສະຫວັນ
