ໃນຕອນເຊົ້າຂອງວັນທີ 25 ທັນວານີ້, ພິທີມອບ-ຮັບລົດຖີບຈາກໂຄງການນໍ້າໃຈຮັກລາວ ໄດ້ຈັດຂຶ້ນທີ່ສະພາແຫ່ງຊາດລາວ ໂດຍໃຫ້ກຽດເຂົ້າຮ່ວມຂອງທ່ານ ສົມມາດ ພົລເສນາ ຮອງປະ ທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ ເຊິ່ງລົດຖີບຈຳນວນ 1000 ຄັນແມ່ນໄດ້ຮັບການສະ ໜັບສະໜູນຈາກໂຄງການ “ນ້ຳໃຈຮັກລາວ” ຂອງມູນນິທິເພື່ອພັດທະນາຊົນນະບົດຂອງຈີນ ແລະ ໄດ້ຂົນສົ່ງຈາກນະຄອນຫນານໜິງ ເຂດປົກຄອງຕົນເອງຊົນເຜົ່າຈ້ວງກວາງຊີ ສປ ຈີນ ມາ ຮອດນະຄອນຫຼວງວຽງຈັນ ສປປ ລາວ ແລ້ວ ດ້ວຍລົດໄຟລາວ- ຈີນ ໃນວັນທີ 24 ທີ່ຜ່ານມາ.
ໂອກາດນີ້ ທ່ານ ສົມມາດ ພົລເສນາ ໄດ້ຕີລາຄາສູງຕໍ່ການ ຮ່ວມມືລະຫວ່າງຄະນະສັນຕິພາບ ແລະ ສາມັກຄີລາວ ກັບ ມູນນິ ທິເພື່ອພັດທະນາຊົນນະບົດຂອງຈີນວ່າ: ເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບຄູ່ຮ່ວມຊະຕາກຳລາວ-ຈີນຮອບດ້ານ ລະຫວ່າງສອງພັກສອງລັດ ແລະ ປະຊາຊົນສອງຊາດລາວຈີນ. ທ່ານ ສົມມາດ ພົລເສນາ ຍັງໄດ້ກ່າວສະແດງຄວາມຂອບໃຈຢ່າງຍິ່ງ ມາຍັງພັກ-ລັດຖະບານ ແລະ ປະຊາຊົນຈີນ ໂດຍສະເພາະແມ່ນກອງທຶນມູນນິທິເພື່ອພັດທະນາຊົນນະບົດຂອງຈີນ ກໍຄື ບໍລິສັດ ທາງລົດໄຟລາວ-ຈີນ ຈຳກັດ ແລະ ພາກສ່ວນຕ່າງໆທີ່ກ່ຽວຂ້ອງ ທີ່ໄດ້ໃຫ້ການສະໜັບສະໜູນຕະຫຼອດມາ. ເພິ່ນຍັງໄດ້ກ່າວຕື່ມອີກວ່າ: ໃນອະນາຄົດຈະສືບຕໍ່ລົງເລິກການຮ່ວມມື ແລະ ແລກປ່ຽນຖອດຖອນບົດຮຽນນຳ ສປ ຈີນ ໂດຍສະເພາະແມ່ນດ້ານການພັດທະນາການສຶກສາຢູ່ເຂດຊົນ ນະບົດ ແລະ ການແກ້ໄຂບັນຫາຄວາມທຸກຍາກ.
ປະຈຸບັນ ລົດຖີບທັງໝົດຈາກໂຄງການນໍ້າໃຈຮັກລາວ ແມ່ນກໍາລັງທະຍ່ອຍຂົນສົ່ງໄປບັນດາແຂວງຕ່າງໆຂອງ ສປປ ລາວ ເພື່ອນໍາໄປມອບໃຫ້ນ້ອງນັກຮຽນທີ່ດ້ອຍໂອກາດຢູ່ເຂດຊົນນະ ບົດ ແລະ ຫ່າງໄກສອກຫຼີກ ເພື່ອກຳລັງໃຈ ແລະ ເປັນພາຫານະອຳນວຍຄວາມສະດວກໃນການໄປໂຮງຮຽນຂອງນ້ອງໆນັກຮຽນ. ສະເພາະແຂວງທາງພາກເໜືອແມ່ນຈະຂົນສົ່ງຜ່ານທາງລົດໄຟລາວ-ຈີນ ໂດຍໃສ່ຕູ້ຄອນເທັນເນີ ເພື່ອຮັບປະກັນໃຫ້ລົດຖີບທຸກຄັນຈະບໍ່ໄດ້ຮັບຄວາມເສຍຫາຍ ແລະ ໄປຮອດມືຂອງນ້ອງໆນັກ ຮຽນຢ່າງສະຫວັດດີພາບ.
ໃນອະນາຄົດ ບໍລິສັດ ທາງລົດໄຟລາວ-ຈີນ ຈໍາກັດ ຈະສືບຕໍ່ຮ່ວມມືກັບບັນດາກັບອົງການຕ່າງໆ ເພື່ອສົ່ງເສີມການພັດທະນາໃນຊົນນະບົດ ໂດຍສະເພາະແມ່ນດ້ານການສຶກສາ ແລະ ການສ້າງໂອກາດໃຫ້ຊາວໜຸ່ມລາວຕາມແລວເສັ້ນທາງລົດໄຟລາວ-ຈີນ ໃຫ້ມີວຽກເຮັດງານທຳ ໂດຍທີ່ຜ່ານມາທາງລົດໄຟລາວ-ຈີນ ໃນເວລາຮັບພະນັກງານເຂົ້າເຮັດວຽກຢູ່ທາງລົດໄຟ ພາຍໃຕ້ເງື່ອນໄຂອັນດຽວກັນຈະໃຫ້ບຸລິມະສິດພິເສດ ສຳລັບລູກຫຼານຜູ້ຖືກໂຄງການທາງລົດໄຟ ແລະ ຜູ້ທີ່ອາໄສຢູ່ຊົນນະບົດຕາມແລວທາງລົດໄຟລາວ-ຈີນ.
