ເມື່ອບໍ່ດົນມານີ້ ທີ່ ໂຮງແຮມອໍເຊີດ ແະເທດສິງກະໂປ, ສະຖານເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ສິງກະໂປ, ໃນນາມປະທານອາຊຽນ 2024 ຮ່ວມກັບບັນດາສະຖານທູດອາຊຽນ ແລະ ຕີມໍແລັດສະເຕ ປະຈໍາ ສິງກະໂປ ໄດ້ພ້ອມກັນເປັນເຈົ້າພາບຈັດງານ ອາຊຽນ ກາລາໄນ 2024 (ASEAN Gala Night 2024). ການຈັດງານດັ່ງກ່າວນີ້ແມ່ນເປັນປະເພນີປະຕິບັດກັນມາຂອງບັນດາສະຖານທູດ ອາຊຽນ ປະຈໍາ ສິງກະໂປ, ໂດຍປະເທດທີ່ເປັນປະທານອາຊຽນ ຕາມຮອບໝູນວຽນຈະຕ້ອງໄດ້ເປັນເຈົ້າພາບ, ປີນີ້ ເປັນຮອບໝູນວຽນຂອງ ສະຖານທູດລາວເຮົາເປັນເຈົ້າພາບ, ໂດຍການເຂົ້າຮ່ວມເປັນແຂກກິດຕິມະສັກຂອງ ທ່ານ ອານເບີດ ຈົວ ຫົວໜ້າຫ້ອງການກະຊວງການຕ່າງປະເທດ ສິງກະໂປ, ບັນດາທູດຂອງປະເທດຄູ່ຮ່ວມເຈລະຈາ ແລະ ແຂກຖືກເຊີນ ເຂົ້າຮ່ວມ ຫຼາຍກວ່າ 300 ທ່ານ.
ຈຸດປະສົງຂອງການຈັດງານດັ່ງກ່າວນີ້ ເພື່ອເປັນການສະຫຼຸບຍ້ອງຍໍຊົມເຊີຍການເປັນທານອາຊຽນ ຂອງ ສປປ ລາວ ແລະ ທັງເປັນການປະກາດມອບປະທານອາຊຽນຕາມຮອບໝູນວຽນໃຫ້ປະເທດມາເລເຊຍ ເປັນປະທານ ອາຊຽນ ປີ 2025, ທັງເປັນການໂຄສະນາເຜີຍແຜ່ວັດທະນະທໍາ, ຮີດຄອງປະເພນີອັນດີງາມ, ຂອງບັນດາປະເທດອາຊຽນ ໃນນັ້ນ ແຕ່ລະປະເທດ ໄດ້ນຳເອົາເຄື່ອງບໍລິໂພກ ແລະ ອຸປະໂພກ ທີ່ເປັນສັນຍາລັກຂອງຊາດ ມາວາງສະແດງໃນງານ ເປັນຕົ້ນ ອາຫານ, ຜ້າໄໝແຜ່ນແພ ແລະ ອື່ນໆ, ຜູ້ເຂົ້າຮ່ວມງານຄັ້ງນີ້ ຍັງໄດ້ຮັບຊົມການສະແດງສິລະປະວັດທະນະທໍາ ທີ່ເປັນເອກະລັກແຕ່ລະປະເທດ ນຳອີກ. ພ້ອມນັ້ນ, ງານດັ່ງກ່າວນີ້, ຖືເປັນການສ້າງໂອກາດທີ່ດີໃຫ້ບັນດານັກການທູດ, ພະນັກງານສະຖານທູດ ແລະ ສະມາຄົມຄົນຕ່າງປະເທດຂອງບັນດາປະເທດອາຊຽນ ທີ່ອາໄສຢູ່ ສິງກະໂປ ໄດ້ພົບປະສັງສັນ ເຕົ້າໂຮມຄວາມສາມັກຄີ ແລະ ໂອ້ລົມສົນທະນາ ເພື່ອແລກປ່ຽນຄໍາຄິດເຫັນຮ່ວມກັນ, ສ້າງຄວາມຮັກແພງກັນລະຫວ່າງນັກການທູດ ແລະ ນັກທຸລະກິດຂອງ ສິງກະໂປ ກໍຄື ນັກທຸລະກິດຂອງບັນດາປະເທດອາຊຽນ ທີ່ເຮັດທຸລະກິດຢູ່ສິງກະໂປ.
ການເປັນເຈົ້າພາບຈັດງານ ອາຊຽນ ກາລາໄນ ຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ຟົດຟື້ນ ແລະ ໄດ້ຮັບຜົນສໍາເລັດຢ່າງຈົບງາມ ຊຶ່ງເຕັມໄປດ້ວຍເນື້ອໃນຄວາມໝາຍສຳຄັນ. ຜົນສໍາເລັດດັ່ງກ່າວນີ້ ແມ່ນປາສະຈາກບໍ່ໄດ້ການຮ່ວມມືຈາກອ້າຍນ້ອງພະນັກງານພາຍໃນສະຖານທູດລາວ, ສະມາຄົມຄົນລາວ ແລະ ບັນດານັກຮຽນ-ນັກສຶກສາລາວ ຢູ່ ສິງກະໂປ, ລວມທັງໄດ້ຮັບການຮ່ວມມື ແລະ ສະໜັບສະໜູນອັນດີ ຈາກບັນດາສະຖານທູດປະເທດອາຊຽນ ແລະ ຕີມໍແລັດສະເຕ ປະຈຳ ສ ສິງກະໂປ ກໍຄື ເພື່ອນມິດໃກ້ຊິດຈາກ ສິງກະໂປ ຈໍານວນໜຶ່ງ.
ຂ່າວ: ກະຊວງການຕ່າງປະເທດ
