ໃນວັນທີ 18 ທັນວາ 2024 ນີ້, ຢູ່ທີຫ້ອງປະຊຸມສະຖາບັນຄົ້ນຄວ້າວິທະຍາສາດການສຶກສາ ໄດ້ຈັດຕັ້ງສະເຫຼີມສະຫຼອງວັນຄົນພິການສາກົນ ເພື່ອເປັນການລະນຶກເຖິງວັນຄົນພິການສາກົນ, ລະຫວ່າງກະຊວງສຶກສາທິການ ແລະ ກິລາ ສປປ ລາວ ຮ່ວມກັບລັດຖະບານອົດສະຕຣາລີ ໂດຍຜ່ານແຜນງານບີຄວາ ເພື່ອສະແດງໃຫ້ເຫັນເຖິງຜົນສຳເລັດຂອງການຮ່ວມມືໃນຂະແໜງການສຶກສາ ຂອງ ສປປ ລາວ ໂດຍການເຂົ້າຮ່ວມເປັນປະທານຂອງທ່ານ ປອ. ສໍາລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ນາງ ເບັນນິຕາ ຊຳເມີວິວ, ຮອງເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ມີຜູ້ຕາງໜ້າຈາກບັນດາກົມຂອງກະຊວງສຶກສາທິການ ແລະ ກິລາ, ກະຊວງອ້ອມຂ້າງ, ອົງການຈັດຕັ້ງຄົນເພື່ອຄົນພິການ (OPDs), ຄູ່ຮ່ວມພັດທະນາ ແລະ ອົງການບັນດາອົງການຈັດຕັ້ງສາກົນຕ່າງໆ ພ້ອມດ້ວຍແຂກຖືກເຊີນ ເຂົ້າຮ່ວມ.
ທ່ານ ປອ. ສໍາລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ກ່າວວ່າ: ກະຊວງສຶກສາທິການ ແລະ ກິລາ ຂອງ ສປປ ລາວ ຮ່ວມກັບລັດຖະບານອົດສະຕຣາລີ ມຸ່ງໝັ້ນທີ່ຈະສົ່ງເສີມລະບົບການສຶກສາທີ່ສາມາດເຂົ້າເຖິງໄດ້ ແລະ ເໝາະສົມສຳລັບນັກຮຽນທຸກຄົນ. ສົ່ງເສີມຜູ້ວາງນະໂຍບາຍ ແລະ ຜູ້ເຮັດວຽກໃນວຽກງານຂອງຂະແໜງການສຶກສາ ໃຫ້ເຂົ້າໃຈຢ່າງເລິກເຊິງກ່ຽວກັບຄວາມຕ້ອງການ ແລະ ສິດທິຂອງຄົນພິການ ພ້ອມທັງຈັດຕັ້ງປະຕິບັດນະໂຍບາຍ ໃຫ້ເປັນຮູບປະທຳ ເພື່ອການພັດທະນາໂຮງຮຽນ” ໂດຍສະເພາະໃຫ້ຄູພັດທະນາທັກສະການສອນທີ່ເຂົ້າໃຈຄົນພິການ ແລະ ຄົນປົກກະຕິສາມາດຮຽນຮ່ວມກັນໄດ້ ແລະ ວິທີຮັບປະກັນໃຫ້ໂຮງຮຽນເປັນບ່ອນປອດໄພສຳລັບຄົນພິການ ແລະ ເພື່ອຊ່ວຍກັນລົບລ້າງບັນດາອຸປະສັກ ແລະ ສົ່ງເສີມການເຂົ້າເຖິງການສຶກສາທີ່ມີຄຸນນະພາບຢ່າງເທົ່າທຽມກັນສຳລັບຄົນພິການ ທີ່ຢູ່ ສປປ ລາວ”.
ທ່ານ ນາງ ເບັນນິຕາ ຊຳເມີວິວ ໄດ້ກ່າວວ່າ: “ຄູເປັນກຸນແຈໃນການເຮັດໃຫ້ຫ້ອງຮຽນທີ່ມີການສຶກສາຮຽນຮ່ວມ. ເພື່ອຮັບປະກັນໃຫ້ນັກຮຽນທຸກຄົນສາມາດເຕີບໃຫຍ່, ລັດຖະບານອົດສະຕຣາລີ ຈະສະໜັບສະໜູນ ກະຊວງສຶກສາທິການ ແລະ ກິລາ ສປປ ລາວ ແລະ ຄູ່ຮ່ວມພັດທະນາ ໂດຍໃຫ້ບູລິມະສິດເພື່ອສະໜອງເຄື່ອງມື, ສື່ການຮຽນການສອນ ແລະ ການຝຶກອົບຮົມທີ່ຈຳເປັນ ໃຫ້ແກ່ຄູ . ໃນນີ້ຍັງລວມມີ ການເຊື່ອມໂຍງບົດຮຽນຫຼັກສູດຄູໃນວິທະຍາໄລຄູ ໃຫ້ລວມເອົາການສຶກສາຮຽນຮ່ວມ ແລະ ຫຼັກສູດສຳລັບຄູປະຈຳການ”.
ຫຼັງຈາກສຳເລັດພິທີ, ທີມງານຄູຝຶກວຽກງານສົ່ງເສີມຄວາມສະເໝີພາບຍິງ-ຊາຍຈຳນວນ 35 ທ່ານ ແລະ ທີມງານຜູ້ປະສານງານຫຼັກຈາກ 3 ວິທະຍາໄລຄູເປົ້າໝາຍ (ຫຼວງນ້ຳທາ, ຄັງໄຂ ແລະ ສະຫວັນນະເຂດ) ສືບຕໍ່ເຂົ້າຮ່ວມຊຸດຝຶກອົບຮົມ “ພື້ນຖານຄວາມເຂົ້າໃຈກ່ຽວກັບຄວາມພິການ” ເປັນເວລາ 2 ວັນ. ການຝຶກອົບຮົມໄດ້ນຳພາໂດຍທີມງານທີ່ມີປະສົບການຈາກ ສູນສົ່ງເສີມການສຶກສາຮຽນຮ່ວມ, ພະແນກສົ່ງເສີມຄວາມກ້າວຫນ້າຂອງແມ່ຍິງ ແລະ ບັນດາການຈັດຕັ້ງຂອງຄົນພິການໃນ ສປປ ລາວ. ຄູຝຶກໄດ້ອະທິບາຍເຖິງ ວິທີການກໍານົດປະເພດຂອງຄວາມພິການທີ່ແຕກຕ່າງກັນ ແລະ ວິທີການສະຫນັບສະຫນູນນັກຮຽນ. ຄາດໝາຍຂອງການຝຶກອົບຮົມແມ່ນເພື່ອສ້າງຄຳແນະນໍາສໍາລັບຄູທີ່ຈະຊ່ວຍໃຫ້ເຂົາເຈົ້າດັດປັບການປະຕິບັດທີ່ເຫມາະສົມກັບນັກຮຽນຂອງເຂົາເຈົ້າທີ່ມີຄວາມຕ້ອງການພິເສດ.
ທ່ານ ນາງ ເບັນນິຕາ ຊຳເມີວິວ ໄດ້ກ່າວຕື່ມອີກວ່າ: “ລັດຖະບານອົດສະຕຣາລີ ໃຫ້ຄຳໝັ້ນສັນຍາຈະສະໜັບສະໜູນກະຊວງສຶກສາ ເພື່ອລຶບລ້າງສິ່ງອຸປະສັກດ້ານການສຶກສາ. ການສ້າງຈິດສໍານຶກກ່ຽວກັບອຸປະສັກທີ່ນັກຮຽນພິການປະເຊີນ ແລະ ສະໜອງຍຸດທະສາດທີ່ຊັດເຈນ ເພື່ອແກ້ໄຂສິ່ງທ້າທາຍເຫຼົ່ານີ້ແມ່ນວຽກງານສໍາຄັນ. ທ່ານຍັງໄດ້ຂໍຂອບໃຈ ມາຍັງຜູ້ບໍລິຫານການສຶກສາ, ຄູ, ຜູ້ອຳນວຍການໂຮງຮຽນ, ແລະ ສະມາຊິກໃນຊຸມຊົນທຸກທ່ານ ທີ່ຈະຊ່ວຍກັນຍົກສູງ ການຊ່ວຍກັນລະບຸ ແລະ ລົບລ້າງອຸປະສັກທາງດ້ານຮ່າງກາຍ, ທັດສະນະຄະຕິ, ແລະ ການສື່ສານທີ່ກີດຂວາງການຮຽນຮູ້ສໍາລັບນັກຮຽນທີ່ມີຄວາມຕ້ອງການທີ່ແຕກຕ່າງກັນ”.
ແຜນງານບີຄວາ ແມ່ນແຜນງານທີ່ນຳພາໂດຍກະຊວງສຶກສາທິການ ແລະ ກິລາ ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ອົງການພັດທະນາສາກົນຂອງປະເທດສະຫະລັດອາເມລິກາ (USAID) ຍັງໄດ້ສຸມໃສ່ການເສີມຂະຫຍາຍຜົນການຮຽນຂອງໄວໜຸ່ມຂອງປະເທດ, ໂດຍສະເພາະແມ່ນຜູ້ທີ່ຕ້ອງການຄວາມຊ່ວຍເຫຼືອ ແລະ ຜູ້ທີ່ດ້ອຍໂອກາດ. ແຜນງານບີຄວາ ຍັງຈະສືບຕໍ່ສຸມໃສ່ການຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ສົ່ງເສີມການສຶກສາຮຽນຮ່ວມເຂົ້າໃນທຸກໆກິດຈະກໍາ.
ໂດຍ: ບິກໄຊ ສົມພູ
