ຄະນະຜູ້ແທນສະມາຄົມ ມິດຕະພາບ ກູບາ-ລາວ ແລະ ນັກສິລະປະ 16 ສະຫາຍ, ນໍາໂດຍ ສະຫາຍ ນາງ ວຽງໄຊ ວານເດັດ ຮັກສາການປະທານສະມາຄົມມິດຕະພາບ ກູບາ-ລາວ, ຜູ້ອໍານວຍການຟ້ອນບາເລ່ ແຫ່ງຊາດກູບາ ພ້ອມດ້ວຍຄະນະ ມາຢ້ຽມຢາມ ສປປ ລາວ ແຕ່ວັນທີ 30 ພະຈິກ-2 ທັນວາ 2024 ເພື່ອສະເຫລີມສະຫລອງວັນສ້າງຕັ້ງ ສາຍພົວພັນການທູດ ລະຫວ່າງ ສປປ ລາວ ແລະ ສ ກູບາ ຄົບຮອບ 50 ປີ (04 /11/1974-04/11/2024).
ໃນວັນທີ 1 ທັນວາ, ຄະນະຜູ້ແທນສະມາຄົມມິດຕະພາບ ກູບາ-ລາວ ໄດ້ຢ້ຽມຂໍ່ານັບການນໍາຂັ້ນສູງ ຂອງພັກ, ລັດ ລວມມີ ສະຫາຍ ຈະເລີນ ເຍຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານສະມາຄົມມິດຕະພາບລາວ-ກູບາ, ສະຫາຍ ນາງ ສວນສະຫວັນ ວິຍະເກດ ກໍາມະການສູນກາງພັກ, ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ສະຫາຍ ບຸນເຫລືອ ພັນດານຸວົງ ຮັກສາການ ຫົວໜ້າຄະນະພົວພັນຕ່າງປະເທດສູນກາງພັກ ໂດຍບັນດາສະຫາຍການນໍາຂັ້ນສູງ ຂອງພັກ, ລັດຖະບານ ໄດ້ຕີໄດ້ຕີລາຄາສູງຕໍ່ການຢ້ຽມຢາມ ຂອງຄະນະຜູ້ແທນສະມາຄົມມິດຕະພາບ ກູບາ-ລາວ. ພ້ອມນັ້ນ, ຍັງໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືອັນເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ກູບາ ທີ່ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງນັບມື້ກ້າວເຂົ້າສູ່ລວງເລິກ ແລະ ນໍາເອົາຜົນປະໂຫຍດມາສູ່ປະຊາຊົນສອງປະເທດ.
ສະຫາຍ ນາງ ວຽງໄຊ ວານເດັດ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ອໍານວຍຄວາມສະດວກ ໃຫ້ແກ່ຄະນະຜູ້ແທນສະມາຄົມມິດຕະພາບກູບາ-ລາວ. ໃນຕອນຄໍ່າຂອງວັນດຽວກັນ, ຄະນະຜູ້ແທນ ສ ກູບາ ໄດ້ສະແດງສິລະປະຟ້ອນບາເລ່ ຢູ່ຫໍວັດ ທະນະທໍາແຫ່ງຊາດ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ ກູບາ. ໃນງານດັ່ງກ່າວ, ນັກສະແດງໄດ້ສະແດງທັກສະການຟ້ອນບາເລ່ ທີ່ເປັນເອກະລັກ, ມີຄວາມງົດງາມ ເຮັດໃຫ້ບັນຍາກາດໃນງານມີຄວາມໝາຍ ແລະ ມີຜົນສໍາເລັດຢ່າງຈົບງາມ.
ພ້ອມນັັ້ນ, ໄດ້ມີພິທີປະດັບຫລຽນໄຊມິດຕະພາບ ໃຫ້ແກ່ ສະຫາຍ ນາງ ວຽງໄຊ ວານເດັດ ເຊິ່ງເປັນຫລຽນສູງສົ່ງ ຂອງ ລັດຖະບານແຫ່ງ ສປປ ລາວ ເພື່ອຊົມເຊີຍ ແລະ ຕອບແທນຄຸນງາມຄວາມດີ ທີ່ສະຫາຍໄດ້ປະກອບສ່ວນເສີມຂະຫາຍ ແລະ ເພີ່ມພູນຄູນສ້າງສາຍພົວພັນ ແລະ ການຮ່ວມມືອັນດີລະຫວ່າງ ສປປ ລາວ ແລະ ສ ກູບາ.
ການຢ້ຽມຢາມ ແລະ ສະແດງສິລະປະຂອງຄະນະຜູ້ແທນ ສ ກູບາ ໃນຄັ້ງນີ້, ນອກຈາກເປັນການສະເຫລີມສະຫລອງ ວັນສ້າງຕັ້ງສາຍພົວພັນການທູດແລ້ວ, ຍັງເປັນການເຄື່ອນໄຫວການທູດປະ ຊາຊົນ ກໍຄື ການແລກປ່ຽນສິລະປະ-ວັດທະນະທໍາ, ທັງເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນອັນເປັນມູນເຊື້ອ ແລະ ການຮ່ວມມືອັນດີງາມລະຫວ່າງ ສປປ ລາວ ແລະ ສ ກູບາ.
