ໂຄສົກ ກະຊວງ ການຕ່າງປະເທດຈີນ ໄດ້ກ່າວຢືນຢັນ ໃນກອງປະຊຸມຖະແຫລງຂ່າວ ທີ່ຈັດຂຶ້ນເມື່ອບໍ່ດົນມານີ້ວ່າ: ເພື່ອອຳນວຍຄວາມສະດວກໃຫ້ແກ່ການໄປມາ ຫາສູ່ກັນ ລະຫວ່າງບຸກຄະລາກອນຈີນ ແລະ ຕ່າງປະເທດ ຕື່ມອີກ, ສປ ຈີນ ຕົກລົງເປີດກວ້າງຂອບເຂດປະເທດທີ່ປະຕິບັດນະໂຍບາຍຍົກເວັ້ນວີຊ່າ ເຊິ່ງເລີ່ມແຕ່ວັນທີ 30 ພະຈິກ2024 ຈົນຮອດ ວັນທີ 31 ທັນວາ2025, ທົດລອງປະຕິບັດນະໂຍບາຍ ຍົກເວັ້ນວີຊ່າ ໃຫ້ຜູ້ຖືພາສປອດ ທຳມະດາຈາກ 9ປະເທດເຊັ່ນ: ບຸນກາລີ, ຣູມານີ ແລະ ຍີ່ປຸ່ນ ເປັນຕົ້ນ. ນອກນີ້,ສປ ຈີນ ຍັງໄດ້ຕົກລົງປັບປຸງ ນະໂຍບາຍ ຍົກເວັ້ນວີຊາ ໃຫ້ດີຂຶ້ນຕື່ມອີກ ໂດຍຈັດເອົາ ການແລກປ່ຽນ ຢ້ຽມຢາມ ເປັນສາເຫດໜຶ່ງໃນການຍົກເວັ້ນວີຊາເຂົ້າເມືອງ ຂະນະທີ່ ແກ່ຍາວເວລາເຂົ້າເມືອງແບບຍົກເວັ້ນວີຊ່າຈາກ 15ວັນ ທີ່ປະຕິບັດໃນປັດຈຸບັນໃຫ້ເປັນ 30ວັນ.
ນັບແຕ່ວັນທີ 30 ພະຈິກ2024 ເປັນຕົ້ນໄປ, ຜູ້ຖືພາສປອດທຳມະດາ ຂອງ38 ປະເທດທີ່ຍົກເວັ້ນວີຊາ ເຊິ່ງລວມທັງ 9 ປະເທດດັ່ງກ່າວ ທີ່ເດີນທາງມາ ສປ ຈີນ ເຮັດທຸລະກິດ, ທ່ອງທ່ຽວຢ້ຽມຢາມໝູ່ເພື່ອນ, ຍາດຕິພີ່ນ້ອງ ແລກປ່ຽນຢ້ຽມຢາມ ແລະ ຜ່ານແດນ ບໍ່ກາຍ 30ວັນ, ຈະສາມາດ ຍົກເວັ້ນວີຊາ ເຂົ້າເມືອງໄດ້.
ກ່ອນໜ້ານີ້ ນັກຂ່າວວິທະຍຸໂທລະພາບສູນກາງຈີນ(CMG) ໄດ້ໄປເອົາຂ່າວຢູ່ເທິງ ລົດໂດຍສານສາກົນ ຕາມທາງລົດໄຟຈີນ-ລາວຂະບວນໄປກັບ ລະຫວ່າງນະຄອນຄຸນໝິງ ແຂວງຢຸນນານຈີນ-ນະຄອນຫລວງວຽງຈັນ ໂດຍໄດ້ລົງເລິກ ສຳພາດຜູ້ໂດຍສານ ຢູ່ຂະບວນລົດໄຟຖ້ຽວ D87/88 ທີ່ແລ່ນລົດຕາມທາງລົດໄຟຈີນ-ລາວ ຕອນຢູ່ປະເທດຈີນ. ນັກທ່ອງທ່ຽວສາກົນຫລາຍຄົນໄດ້ໃຫ້ຮູ້ວ່າ: ລົດໄຟຈີນ-ລາວ ມີຄວາມສະດວກສະບາຍ ແລະ ວ່ອງໄວ ກໍຄື ນະໂຍບາຍ ຍົກເວັ້ນວີຊາ ເຂົ້າເມືອງຈີນ ແມ່ນປັດໄຈສຳຄັນ ທີ່ດຶງດູດເຂົາເຈົ້າ “ຂີ່ລົດໄຟມາຈີນ”ຫລາຍຂຶ້ນກວ່າເກົ່າ.
ທີ່ມາ: CMG
