ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະ ແຫລງຂ່າວ ວັດທະນະທໍາ ແລະ ທ່ອງທ່ຽວ ໄດ້ຂຶ້ນສະເໜີຜົນການຈັດຕັ້ງປະຕິບັດ ກົດໝາຍ ວ່າດ້ວຍປ້າຍ ຕໍ່ກອງປະຊຸມສະ ໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນຕອນ ເຊົ້າວັນທີ 22 ພະຈິກ 2024, ຊຶ່ງກົດໝາຍ ວ່າດ້ວຍປ້າຍ ສະ ບັບເລກທີ 50/ສພຊ, ລົງວັນທີ 21 ມິຖຸນາ 2018 ທີ່ນໍາໃຊ້ໃນປັດຈຸບັນ ໄດ້ພັດທະນາຈາກດຳລັດວ່າດ້ວຍປ້າຍ ສະບັບເລກທີ 36/ລບ, ລົງວັນທີ 29 ມັງກອນ 2016 ມາເປັນກົດໝາຍວ່າດ້ວຍປ້າຍ, ຊຶ່ງປະກອບມີ XII ພາກ ແລະ 64 ມາດຕາ. ຜ່ານມາຍັງບໍ່ທັນໄດ້ຮັບການປັບປຸງເທື່ອ.
ທ່ານໄດ້ຍົກໃຫ້ເຫັນການຕີລາຄາການໂຄສະນາເຜີຍແຜ່ ແລະ ການຜັນຂະຫຍາຍກົດໝາຍກົດຫມາຍດັ່ງກ່າວຕະຫລອດໄລຍະ 6 ປີກວ່າຜ່ານມາ ເຫັນວ່າການໂຄສະນາດ້ວຍປ້າຍ ໃນຂອບເຂດທົ່ວປະເທດຍັງບໍ່ທັນສອດຄ່ອງກັບກົດໝາຍສະບັບນີ້. ພ້ອມນີ້ ຍັງໄດ້ຍົກໃຫ້ເຫັນການຈັດຕັ້ງປະຕິບັດກົດໝາຍດັ່ງກ່າວໃນໄລຍະຜ່ານມາ, ໃນນີ້:
ດ້ານດີ ແລະ ຜົນໄດ້ຮັບ: ໄດ້ມີກົດໝາຍວ່າດ້ວຍປ້າຍ ສະບັບເລກທີ 50/ສພຊ, ລົງວັນທີ 21 ມິຖຸນາ 2018 ແລະນິຕິກຳໃຕ້ກົດໝາຍ ຂັ້ນສູນກາງ ແລະ ຂັ້ນທ້ອງຖິ່ນເປັນບ່ອນອີງທາງດ້ານຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມ ຄອງ, ຕິດຕາມກວດກາ, ເຮັດໃຫ້ການຈັດຕັ້ງປະຕິບັດວຽກງານປ້າຍໃນທົ່ວປະເທດ ມີຄວາມຊັດເຈນຂຶ້ນ, ຫັນປ່ຽນວຽກງານປ້າຍສູ່ຄວາມເປັນລະບົບ ລະບຽບ ຖືກຕ້ອງ ມີຄວາມເປັນເອກະ ພາບ, ມີປະສິດທິພາບ, ມີຄວາມປອດໄພ ຮຽບຮ້ອຍດີຂຶ້ນ;
ຜູ້ປະກອບການທຸລະກິດປ້າຍຈຳນວນໜຶ່ງໄດ້ໃຫ້ຄວາມຮ່ວມມື ກັບເຈົ້າໜ້າທີ່ລົງກວດກາ ແລະ ແກ້ໄຂບັນຫາປ້າຍ, ຮັບຟັງ ແລະ ປະຕິບັດກົດໝາຍວ່າດ້ວຍປ້າຍ ແລະ ລະບຽບການທີ່ວາງອອກ;
ມີການປະສານງານ ຂອງຄະນະສະເພາະກິດຂັ້ນສູນກາງ ແລະ ທ້ອງ ຖິ່ນໃນການຈັດຕັ້ງປະຕິບັດກົດໝາຍວ່າດ້ວຍປ້າຍ, ການຕິດ ຕາມກວດກາ ບັນຫາປ້າຍທີ່ບໍ່ຖືກຕ້ອງ ເຖິງຈະຊັກຊ້າ ແຕ່ກໍ່ໄດ້ ຮັບການແກ້ໄຂ; ໄດ້ຮັບການຮ່ວມມື ລາຍງານຈາກສະມາຄົມປ້າຍ ຊຶ່ງເປັນກຳລັງແຮງໃນການເຕົ້າໂຮມບັນດາຫົວໜ່ວຍທຸລະກິດ ໃນການຕິດຕາມໂຄສະນາ ເຜີຍແຜ່ຊ່ວຍແນະນຳກ່ຽວກັບກົດໝາຍວ່າດ້ວຍປ້າຍໄດ້ໃນລະດັບດີຂື້ນຢ່າງຕໍ່ເນື່ອງ;
ອົງການຄຸ້ມຄອງປ້າຍ ສາມາດກວດກາແກ້ໄຂບັນຫາປ້າຍໃນຂອບເຂດຄວາມຮັບຜິດຊອບຂອງຕົນໄດ້ເປັນຢ່າງດີ. ສ່ວນພົນລະເມືອງລາວ, ຊາວຕ່າງດ້າວ ແລະ ຊາວຕ່າງປະເທດ ທີ່ອາ ໄສ ຢູ່ ສປປ ລາວ ສາມາດ ຮັບຮູ້ຂໍ້ມູນຂ່າວສານ ສາລະຄວາມຮູ້ ຈາກການໂຄສະນາດ້ວຍປ້າຍ ຕ່າງໆ, ສາມາດສະແດງທັດສະນະ ຄຳເຫັນ ຕໍ່ເນື້ອໃນ, ຮູບແບບປ້າຍ ໄດ້ງ່າຍ ແລະ ວ່ອງໄວ; ວຽກງານປ້າຍສາມາດສ້າງລາຍຮັບວິຊາການເຂົ້າງົບປະມານແຫ່ງລັດ, ປະກອບສ່ວນພັດທະນາເສດຖະກິດ-ສັງຄົມ ໃຫ້ແກ່ປະ ເທດເຮົາໄດ້ຢ່າງຫຼວງຫຼາຍ.
ທ່ານຍັງໄດ້ຍົກໃຫ້ເຫັນດ້ານອ່ອນ ແລະ ຂໍ້ຄົງຄ້າງ ເຊັ່ນ: ການ ເຜີຍແຜ່ກົດໝາຍ ຍັງບໍ່ທັນກວ້າງຂວາງ ແລະບໍ່ເປັນປົກກະຕິ ບໍ່ທົ່ວເຖິງ. ຫຼາຍຫົວໜ່ວຍຜູ້ປະກອບການທີ່ເກີດຂຶ້ນໃໝ່ ຍັງບໍ່ເຂົ້າ ໃຈ ຈິ່ງບໍ່ຂໍອະນຸຍາດໃນການສ້າງຕັ້ງບໍລິສັດ ລວມທັງບໍ່ຂໍອະນຸ ຍາດໂຄສະນາດ້ວຍປ້າຍ ຕາມກົດໝາຍ ແລະ ລະບຽບການ;
ສະຕິຄວາມເປັນເຈົ້າການຂອງພົນລະເມືອງລາວຍັງບໍ່ສູງ, ການປະ ຕິບັດພັນທະໃນການຄຸ້ມຄອງ ປົກປັກຮັກສາປ້າຍບໍ່ທັນປະຕິບັດໄດ້. ເຮັດໃຫ້ເກີດມີການຕິດຕັ້ງປ້າຍທີ່ບໍ່ສອດຄ່ອງກັບກົດໝາຍ ເຊັ່ນ ຂໍ້ຄວາມບໍ່ສຸພາບ, ຕະຫຼົກ, ລາມົກ, ຂັດກັບວັດທະນະທຳ ຮີດຄອງປະເພນີ ເກີດຂຶ້ນເລື້ອຍໆ; ການແກ້ໄຂ ລາຍງານຂອງເຈົ້າໜ້າທີ່ຊັກຊ້າ.
ກົດໝາຍວ່າດ້ວຍປ້າຍ ຍັງມີຫຼາຍມາດຕາ ຍັງມີເນື້ອບໍ່ທັນຊັດເຈນ, ບາງມາດຕາຄວນໄດ້ກຳນົດໃຫ້ມີລະບຽບການຕ່າງຫາກ ເປັນຕົ້ນແມ່ນ ເນື້ອໃນປ້າຍໜຶ່ງໆ ຄວນມີຈັກພາສາ, ຖັດຈາກພາ ສາລາວ ຄວນໃຊ້ພາສາໃດ? ອັດຕາການເກັບຄ່າທຳນຽມ ບໍລິ ການ ຄວນກຳນົດ ແນວໃດ ເພື່ອຈຳກັດໃຫ້ມີການໂຄສະນາປ້າຍພາສາຕ່າງປະເທດໜ້ອຍລົງ;ຍັງຂາດບຸກຄະລາກອນໃນການປະ ຕິບັດວຽກງານປ້າຍ ໂດຍສະເພາະແມ່ນ ມີການປັບປຸງ ສັບຊ້ອນປ່ຽນແທນ ຈິ່ງເຮັດໃຫ້ການກວດກາ ແກ້ໄຂ ວຽກງານປ້າຍຊັກ ຊ້າ; ການນຳເຂົ້າປ້າຍຈາກຕ່າງປະເທດບໍ່ໄດ້ຮັບອະນຸຍາດ, ບໍ່ໄດ້ຜ່ານການກວດກາຄວາມສອດຄ່ອງທາງດ້ານເນື້ອໃນ, ມາດຕະ ການຕໍ່ຜູ້ລະເມີດ ຍັງມີການຕໍ່ລອງ, ໂຍະຍານ ແລະ ບໍ່ທັນຮັດກຸມເທົ່າທີ່ຄວນ ແລະ ອື່ນໆ.
ນອກຈາກນີ້, ທ່ານ ນາງສວນສະຫວັນ ວິຍະເກດ ຍັງໄດ້ຍົກໃຫ້ເຫັນ ທິດທາງແກ້ໄຂ ກົດໝາຍວ່າດ້ວຍປ້າຍ ແລະ ແຜນການປັບປຸງກົດໝາຍວ່າດ້ວຍປ້າຍ ຕື່ມອີກ.
