ທ່ານ ສົມພອນ ສີອຸດົມພັນ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 6 ແຂວງຫຼວງພະບາງ ໄດ້ປະ ກອບຄຳເຫັນຕໍ່ບົດລາຍງານຂອງລັດຖະບານຢູ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວ່າ: ຜ່ານການ ຕິດຕາມກວດກາຂອງຄະນະ ສສຊ ຢູ່ແຂວງຫລວງພະບາງ ເຫັນວ່າມີບັນຫາທີ່ຈະຕ້ອງເອົາໃຈໃສ່ ເປັນຕົ້ນແມ່ນ ການຄຸ້ມຄອງລາ ຄາສິນຄ້າ, ການຜະລິດສິນຄ້າຍັງບໍ່ທັນເປັນຂະບວນຢ່າງແຂງ ແຮງ, ການລັກລອບອະນຸ ຍາດ ແລະ ການຄຸ້ມຄອງການຂຸດຄົ້ນແຮ່ທາດ ຍັງບໍ່ທັນຮັດກຸມ ພາໃຫ້ເກີດມີປາກົດການຫຍໍ້ທໍ້ຫຼາຍຢ່າງ, ບັນຫາທີ່ໜ້າເປັນຫ່ວງຢ່າງໜຶ່ງ ແມ່ນວຽກການສຶກສາ ມີທ່າອຽງຖົດຖອຍ, ປາກົດການຫຍໍ້ທໍ້ຫຼາຍກໍລະນີຍັງບໍ່ທັນໄດ້ຮັບການແກ້ໄຂຢ່າງເດັດຂາດເຂັ້ມງວດ ເປັນຕົ້ນການອະນຸຍາດຂຸດຄົ້ນແຮ່ທາດຊະຊາຍ, ບັນຫາຢາເສບຕິດ ແລະ ອື່ນໆ ເຊິ່ງບັນຫາທີ່ກ່າວມານັ້ນ ສະເໜີລັດຖະບານເອົາໃຈໃສ່ແກ້ໄຂໃຫ້ເປັນຮູບປະທຳ.
ສຳລັບທິດທາງປີ 2025 ທ່ານໄດ້ສະເໜີຕໍ່ລັດຖະບານບາງບັນຫາ ດັ່ງນີ້:
1. ໃຫ້ມີທິດທາງລະອຽດໃນການຊຸກຍູ້ສົ່ງເສີມການຜະລິດສິນຄ້າພາຍໃນ, ໃນນີ້ ແມ່ນໃຫ້ເອົາໃຈໃສ່ຊຸກຍູ້ສົ່ງເສີມດ້ານວິຊາການ, ການນຳໃຊ້ເຕັກນິກວິຊາການໃໝ່ເຂົ້າໃນການຜະລິດ, ການດຳເນີນທຸລະກິດຕ່າງໆ.
2. ເອົາໃຈໃສ່ແກ້ໄຂຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາ ຊົນບັນດາເຜົ່າ ອັນສຳຄັນແມ່ນໃຫ້ເລັ່ງໃສ່ການສ້າງອາຊີບໝັ້ນທ່ຽງໃຫ້ແກ່ເຂົາເຈົ້າ, ຮີບຮ້ອນປະຕິບັດນະໂຍບາຍເພີ່ມເງິນເດືອນ, ນະໂຍບາຍຕ່າງໆໃຫ້ໄວ ເພື່ອແກ້ໄຂຄວາມຫຍຸ້ງຍາກຂອງພະນັກງານ, ທະຫານ, ຕຳຫຼວດ ແລະ ປະຊາ ຊົນບັນດາເຜົ່າ.
3. ສຸມທຶນຮອນເຂົ້າໃນການປັບປຸງ, ສ້ອມແປງເສັ້ນທາງທີ່ເປ່ເພໃຫ້ສາມາດທຽວໄດ້ສະດວກກວ່າເກົ່າ ເພາະເສັ້ນທາງຫຼວງແຫ່ງ ຊາດທີ່ຜ່ານແຂວງຫຼວງພະບາງ ເປ່ເພຊຸດໂຊມ; ໄລຍະຜ່ານມາທາງກະຊວງໂຍທາທິການ ແລະ ຂົນສົ່ງ ໄດ້ມີຄວາມພະຍາ ຍາມແກ້ໄຂ, ແຕ່ຢາກໃຫ້ລັດຖະບານຊ່ວຍແກ້ໄຂຕື່ມ.
4. ສຳລັບແຜນການລົງທຶນຂອງລັດປະຈຳປີ 2025 ແມ່ນເຫັນດີສະໜັບສະໜູນ ໂດຍສະເພາະແມ່ນການກຳນົດເປົ້າໝາຍຂອງການລົງທຶນໃນການພັດທະນາຊົນນະບົດ ແລະ ແກ້ໄຂຄວາມທຸກ ຍາກ, ການລົງທຶນເຂົ້າໃນການປັບປຸງເສັ້ນທາງທີ່ຕິດພັນກັບການນຳໃຊ້ລົດໄຟ ລາວ-ຈີນ, ປັບປຸງເສັ້ນທາງຕິດພັນກັບການທ່ອງ ທ່ຽວ; ສະນັ້ນ, ຢູ່ຈຸດນີ້ຢາກສະເໜີຕໍ່ລັດຖະບານຊ່ວຍຈັດສັນງົບປະມານເຂົ້າໃນການປັບປຸງເສັ້ນທາງໄປຫາສະຖານີລົດໄຟ, ເສັ້ນ ທາງໄປຕາດກວາງຊີ ເຊິ່ງຜ່ານມາແຂວງກໍໄດ້ມີຄວາມພະຍາຍາມປັບປຸງຈຳນວນໜຶ່ງ ແຕ່ກໍຍັງຕ້ອງການທຶນປັງປຸງຕື່ມ ເພາະເສັ້ນ ທາງດັ່ງກ່າວຮັບໃຊ້ການທ່ອງທ່ຽວ ແລະ ເປັນໃບໜ້າໃບຕາຂອງປະເທດເຮົາ.
5. ເອົາໃຈໃສ່ຄຸ້ມຄອງການຂຸດຄົ້ນແຮ່ທາດຕ່າງໆ ໂດຍສະເພາະແມ່ນເຂັ້ມງວດໃນການຕິດຕາມກວດກາການອະນຸຍາດຂຸດຄົ້ນແຮ່ທາດຕ່າງໆ, ຖ້າອະນຸຍາດບໍ່ຖືກຕ້ອງ ກໍຕ້ອງເດັດຂາດປະຕິບັດວິໄນ; ນອກນັ້ນ, ກໍຕ້ອງຄຸ້ມຄອງການເຄື່ອນ ໄຫວຂຸດຄົ້ນຂອງບັນດາບໍລິສັດຕ່າງໆຕາມກົດໝາຍ.
