ທ່ານ ຄໍາປຸ່ນ ນວນສະບັບ ວ່າການເຈົ້າເມືອງແກ່ນທ້າວ ແຂວງໄຊຍະບູລີ ໄດ້ສະແດງຄວາມຮູ້ສຶກຕໍ່ວັນຊາດ ຄົບຮອບ 49 ປີ ວ່າ: ວັນຊາດທີ 2 ທັນວາ ແມ່ນວັນທີ່ມີຄວາມໝາຍຄວາມສຳຄັນສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວ. ມັນແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ; ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ປະທານ ໄກສອນ ພົມວິຫານ ໄດ້ຕີລາຄາ ວັນທີ 2 ທັນວາ 1975 ວ່າ: ພັກປະຊາຊົນ ປະຕິວັດລາວ ນໍາພາປະຊາຊົນເຮົາ ສ້າງປະຫວັດສາດຂອງຊາດຍາດເອົາໄຊຊະນະສົມບູນ, ໄຊຊະນະນັ້ນ ບໍ່ພຽງແຕ່ໄດ້ຟື້ນຟູຄວາມເປັນເອກະລາດຂອງປະເທດເຮົາ, ຫາກຍັງເປັນຄັ້ງທຳອິດທີ່ປະຊາຊົນບັນດາເຜົ່າຜູ້ເຄີຍດຳລົງຊີວິດເປັນທາດ ໄດ້ກາຍມາເປັນເຈົ້າຂອງແທ້ຈິງຂອງຊາດໜຶ່ງທີ່ມີເອກະລາດ, ມີອິດສະຫຼະພາບຢ່າງສົມບູນ ແລະ ພວມກ້າວຂຶ້ນສັງຄົມນິຍົມ, ເຮັດໃຫ້ຄວາມມຸ່ງຫວັງອັນແຮງກ້າຂອງປວງຊົນລາວ ກໍຄືຂອງມວນມະນຸດປະກົດເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ”.
ໃນ 49 ປີ ແຫ່ງການປົກປັກຮັກສາ ແລະ ສ້າງສາລະບອບໃໝ່ ພາຍໃຕ້ການນຳພາຂອງພັກນັ້ນ ແມ່ນໄລຍະເວລາທີ່ປະເທດຊາດຂອງພວກເຮົາມີການຂະຫຍາຍຕົວຢ່າງຮອບດ້າ ທີ່ບໍ່ເຄີຍມີມາກ່ອນໃນປະຫວັດ ສາດ ໂດຍສະເພາະແມ່ນພາຍຫຼັງທີ່ພັກໄດ້ວາງແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກມານີ້ ການພັດທະນາເສດຖະກິດ-ສັງຄົມ ຂອງ ສປປ ລາວ ໄດ້ມີຜົນສຳເລັດອັນສຳຄັນ ແລະ ມີບາດກ້າວຂະຫຍາຍຕົວຕໍ່ເນື່ອງ, ໝັ້ນທ່ຽງ, ອັດຕາການເຕີບໂຕຂອງເສດຖະກິດສະເລ່ຍເພີ່ມຂຶ້ນໃນແຕ່ລະປີ ອັນໄດ້ເຮັດໃຫ້ໂສມໜ້າໃໝ່ຂອງປະເທດເຮົາມີການປ່ຽນແປງຢ່າງໃຫຍ່ຫຼວງທີ່ສຸດ.
ພາຍໃຕ້ການນໍາພາຂອງພັກປະຊາຊົນ ປະຕິວັດລາວ. ເວົ້າສະເພາະ ເມືອງແກ່ນທ້າວ ແຂວງໄຊຍະບູລີ ໄດ້ເຮັດໃຫ້ເມືອງຊາຍແດນຕິດກັບປະເທດໄທ ມີສະຖຽນລະພາບດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ການພັດທະນາເສດຖະກິດ-ສັງຄົມພາຍໃນເມືອງມີທ່າກ້າວຂະຫຍາຍຕົວດີຂຶ້ນ. ເດັ່ນກວ່າໝູ່ ແມ່ນການຜະລິດເປັນສິນຄ້າຂອງປະຊາຊົນພາຍໃນເມືອງແກ່ນທ້າວ ຂະຫຍາຍຕົວເປັນລໍາດັບ, ເປັນສິນຄ້າສົ່ງອອກ ທັງສ້າງລາຍຮັບໃຫ້ກັບປະຊາຊົນໄດ້ເປັນຢ່າງດີ ເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.
ນະໂອກາດວັນທີ່ມີຄວາມໝາຍທາງປະຫວັດສາດນີ້ ຕາງໜ້າໃຫ້ການນໍາຂອງເມືອງ ຂໍສະແດງຄວາມຮູ້ບຸນຄຸນການນໍາຂັ້ນສູງທຸກຮຸ່ນ, ທຸກສະໄໝ, ຕໍ່ນັກຮົບປະຕິວັດ, ພະນັກງານ-ສະມາຊິກພັກ, ປະຊາຊົນບັນດາເຜົ່າ ທີ່ໄດ້ເສຍສະຫຼະຊີວິດເພື່ອປະເທດຊາດ ຈົນສາມາດປົດປ່ອຍປະເທດຊາດ ອອກຈາກພວກຈັກກະພັດລ່າຫົວເມືອງຂຶ້ນ ແລະ ລູກແຫຼ້ງຕີນມືໄດ້ສໍາເລັດ.
ອວຍພອນໃຫ້ການນໍາພັກ-ລັດ ຈົ່ງມີພະລານາໄມເຂັ້ມແຂງ, ສືບຕໍ່ນຳພາປະເທດຊາດກ້າວຂຶ້ນສູ່ສັງຄົມນິຍົມໃຫ້ສໍາເລັດຜົນ.
