ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ບຸນຊ່ວງເຮືອປະເພນີ ປະຈຳປີ 2024 ທີ່ນະຄອນ ຫລວງພະບາງ ຈະເປີດກວ້າງ ເຮືອຊ່ວງ ແລະ ສີພາຍ ຍິ່ງໃຫຍ່ເຕັມຮູບແບບ ຢູ່ພາຍໃນປະເທດ ເພື່ອເຂົ້າຮ່ວມແຂ່ງຂັນທີ່ຍຶ່ງຄານ ບ້ານຫາດຮ່ຽນ ໂດຍເນັ້ນເຖິງ ຄວາມເປັນວັດທະນະທຳ ແລະ ປະເພນີອັນດີງາມ ຄາດວ່າຈະມີເຮືອເຂົ້າຮ່ວມປະມານ 23 ລໍາ ທີ່ມາຈາກບັນດາບ້ານ ພາຍໃນນະຄອນ ຫລວງພະບາງ, ພະແນກການ-ອົງການ, ເມືອງພາຍໃນແຂວງ. ສຳລັບຕ່າງແຂວງ ຈະມີແຂວງໄຊຍະບູລີ ແລະ ນະຄອນຫລວງວຽງຈັນ ເຂົ້າຮ່ວມ.
ທ່ານ ວຽງທອງ ຫັດສະຈັນ ເຈົ້ານະຄອນ ຫລວງພະບາງ ໄດ້ຖະແຫລງຂ່າວຕໍ່ສື່ມວນຊົນ ໃນວັນທີ 21 ສິງຫາ 2024 ຜ່ານມາວ່າ: ປັດຈຸບັນນີ້, ທາງຄະນະຮັບຜິດຊອບ ໄດ້ກະກຽມວຽກງານແຕ່ລະດ້ານ ຕິດພັນກັບການສ້າງຂະບວນການເພື່ອສະເຫລີມສະຫລອງປີທ່ອງທ່ຽວລາວ 2024 ເມື່ອນັກທ່ອງທ່ຽວໄດ້ເຂົ້າມາທ່ຽວຊົມຫລວງພະບາງ ໃນໄລ ຍະບຸນ ໃຫ້ມີຄວາມປະທັບໃຈ, ສ່ວນລາຍການເຄື່ອນໄຫວບຸນທາງຄະນະຮັບຜິດຊອບແມ່ນໄດ້ກຳນົດເອົາວັນທີ 24 ສິງຫາ-2 ກັນຍາ 2024, ຊຶ່ງພາຍໃນງານຈະມີຕະຫລາດນັດວາງສະແດງສິນຄ້າ ທີ່ເດີ່ນທາດຫລວງ. ສຳລັບວັນທີ 27 ສິງຫາ ແມ່ນບຸນຊ່ວງເຮືອທີ່ຍຶ່ງຄານ ບ້ານຫາດຮ່ຽນ, ໃນວັນທີ 31 ສິງຫາ ແມ່ນບຸນຊ່ວງເຮືອທີ່ຍຶ່ງດົງ ບ້ານສັງຄະໂລກ, ໃນວັນທີ 1 ກັນຍາ 2024 ຕອນເຊົ້າມີການໂລະລາດ ຫລື ລົງຕະຫລາດນັດແບບມວນຊົນ ຕາມເສັ້ນທາງສີສະຫວ່າງວົງ ເລີ່ມແຕ່ສາມແຍກບ້ານຈູມຄ້ອງ (ຫໍພະບາງ) ຫາ ສາມແຍກພະແນກ ໂຍທາທິການ ແລະ ຂົນສົ່ງແຂວງ ຫລວງພະບາງ, ໃນວັນທີ 2 ກັນຍາ ຕອນເຊົ້າ ການນໍາພັກ-ລັດ ຮ່ວມໃສ່ບາດຢູ່ໜ້າວັດແສນສຸຂາຣາມ, ສ່ວນປະຊາຊົນບັນດາເຜົ່າ ໃສ່ບາດເພື່ອຄວາມເປັນສິລິມຸງຄຸນ ຢູ່ຕາມວັດແຫ່ງຕ່າງໆ ພ້ອມທັງຊົມການຊ່ວງເຮືອປະເພນີ ຕະຫລອດວັນ.
ໂອກາດນີ້, ທ່ານ ວຽງທອງ ຫັດສະຈັນ ໄດ້ຮຽກຮ້ອງໃຫ້ປະຊາຊົນ, ພະນັກງານ, ທະຫານ, ຕຳຫລວດ, ຜູ້ປະກອບການທຸລະກິດ, ຜູ້ຈັດການ-ຜູ້ບໍລິການດ້ານຕ່າງໆ ຈົ່ງພ້ອມກັນເປັນເຈົ້າພາບ-ເປັນເຈົ້າການທີ່ດີ ເຮັດວຽກງານປ້ອງກັນຊາດ-ປ້ອງກັນຄວາມສະຫງົບ, ເປັນເຈົ້າການທາງດ້ານການບໍລິການ, ເປັນເຈົ້າການໃນການຮັກສາຄວາມສະອາດ ແລະ ມີສ່ວນ ຮ່ວມໃນການປະກອບສ່ວນ ທາງດ້ານເຫື່ອແຮງ ແລະ ວັດຖຸປັດໄຈ ເຂົ້າໃນການຈັດບຸນຫໍ່ເຂົ້າປະດັບດິນ ແລະ ບຸນຊ່ວງເຮືອໃນຄັ້ງນີ້ ໃຫ້ປະສົບຜົນສຳເລັດຢ່າງຈົບງາມ, ພ້ອມທັງ ເຊີນຊວນປະຊາຊົນບັນດາເຜົ່າ, ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມຫລວງພະບາງ ເມືອງມໍລະດົກໂລກ ຮັບຮອງວ່າທ່ານຈະໄດ້ຮັບຄວາມປະທັບໃຈ ທີ່ໄດ້ສຳພັດກັບວັດທະນະທຳ-ຮີດຄອງປະເພນີອັນດີງາມຂອງຊາວຫລວງພະບາງທີ່ສືບທອດກັນມາແຕ່ບູຮານນະການ.
