ຕອນບ່າຍວັນທີ 11 ກໍລະກົດ 2024, ທີ່ສະພາແຫ່ງຊາດ ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄດ້ພົບປະກັບ ສະຫາຍ ໂຕ ເລິມ ປະທານປະເທດ ແຫ່ງ ສສ ຫວຽດນາມ ພ້ອມດ້ວຍຄະນະຜູ້ແທນຂັ້ນສູງ, ໃນໂອກາດເດີນທາງມາຢ້ຽມຢາມທາງລັດຖະກິດ ທີ່ ສປປ ລາວ ໃນວັນທີ 11-12 ກໍລະກົດ 2024.
ໃນໂອກາດນີ້, ສະຫາຍ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ, ພ້ອມທັງສະແດງຄວາມຊົມເຊີຍ ແລະ ຕີລາຄາສູງ ທີ່ ສະຫາຍ ໂຕ ເລິມ ໄດ້ຮັບການເລືອກຕັ້ງໃຫ້ດໍາລົງຕໍາແໜ່ງເປັນປະທານປະເທດ ແຫ່ງ ສສ ຫວຽດນາມ ໃນທ້າຍເດືອນພຶດສະພາທີ່ຜ່ານມາ, ທັງໄດ້ຕີລາຄາສູງຕໍ່ການຢ້ຽມຢາມທາງລັດຖະກິດ ທີ່ ສປປ ລາວ ໃນຄັ້ງນີ້ ເຊິ່ງເປັນປະເທດທໍາອິດ ໃນການເຄື່ອນໄຫວຕ່າງປະເທດຂອງ ສະຫາຍ ໂຕ ເລິມ ໃນຕໍາແໜ່ງປະທານປະເທດ. ພ້ອມນີ້, ກໍຝາກຄວາມຢ້ຽມຢາມຖາມຂ່າວອັນອົບອຸ່ນ ແລະ ຄວາມສາມັກຄີຮັກແພງຖານສະຫາຍອ້າຍນ້ອງ ຜ່ານ ສະຫາຍ ໂຕ ເລິມ ໄປຍັງສະຫາຍ ເຈິນ ແທ່ງ ເມິ້ນ ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍບັນດາສະຫາຍການນໍາຂອງສະພາແຫ່ງຊາດ, ລັດຖະບານ ແລະ ປະຊາຊົນຫວຽດນາມອ້າຍນ້ອງ, ພ້ອມທັງໄດ້ຝາກຄໍາເຊື້ອເຊີນໄປຍັງ ສະຫາຍ ເຈິນ ແທ່ງ ເມິ້ນ ມາຢ້ຽມຢາມ ສປປ ລາວ ຢ່າງເປັນທາງການ ໃນເວລາທີ່ມີຄວາມສະດວກ.
ໃນການພົບປະ, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກ ຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ທັງທາງກວ້າງ ແລະ ທາງເລິກ ໃນທຸກໆຂົງເຂດ, ການພົວພັນດ້ານການເມືອງ ສືບຕໍ່ມີຄວາມໜັກແໜ້ນ; ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ດ້ານການຕ່າງປະເທດ ສືບ ຕໍ່ໄດ້ຮັບການເສີມຂະຫຍາຍ ແລະ ມີການຊ່ວຍເຫລືອສະໜັບສະໜູນກັນຕະຫລອດມາ; ການພົວພັນດ້ານເສດຖະກິດ-ການຄ້າ, ການລົງທຶນ, ການສຶກສາ, ວັດທະນະທຳ ແລະ ອື່ນໆ ກໍຄື ການພົວພັນຮ່ວມມື ລະຫວ່າງຂະແໜງການສູນກາງ ແລະ ທ້ອງຖິ່ນ ມີບາດກ້າວຂະຫຍາຍຕົວຂຶ້ນເລື້ອຍໆ. ສະເພາະການ ພົວພັນຮ່ວມມື ລະຫວ່າງ ສອງອົງການນິຕິບັນຍັດ ກໍຄື ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ໄດ້ຮັບການເສີມຂະຫຍາຍທາງກວ້າງ ແລະ ທາງເລິກສະເໝີມາ, ໄດ້ມີການແລກປ່ຽນການຢ້ຽມຢາມ ຂອງການນໍາຂັ້ນສູງໃນລະດັບຕ່າງໆ ຂັ້ນປະທານສະພາແຫ່ງຊາດ, ຮອງປະທານສະພາແຫ່ງຊາດ, ຂັ້ນປະທານກໍາມາທິການ, ສະມາຊິກສະພາແຫ່ງຊາດ ຕະຫລອດເຖິງ ສະມາຊິກສະພາແຫ່ງຊາດຂັ້ນທ້ອງຖິ່ນນໍາກັນ ຢ່າງເປັນປົກກະຕິ, ທັງຍັງມີການຮ່ວມກັນຈັດສໍາມະນາແລກປ່ຽນບົດຮຽນຕ່າງໆ. ພິເສດ, ສສ ຫວຽດນາມ ໄດ້ສົ່ງຊ່ຽວຊານຫວຽດນາມ ມາໃຫ້ບົດຮຽນແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພະນັກງານສະພາແຫ່ງຊາດລາວ, ພ້ອມນີ້ສອງຝ່າຍກໍມີການພົວພັນຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ຢ່າງແໜ້ນແຟ້ນ ໃນເວທີລັດຖະສະພາພາກພື້ນ ແລະ ສາກົນ. ນອກນີ້, ສະຫາຍ ໄຊສົມພອນ ພົມວິຫານ ໄດ້ແຈ້ງໃຫ້ ສະຫາຍ ໂຕ ເລິມ ຊາບໂດຍຫຍໍ້ກ່ຽວກັບ ຜົນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ທີ່ຫາກໍສໍາເລັດໃນຕົ້ນເດືອນກໍລະກົດຜ່ານມານີ້ ແລະ ຍັງໄດ້ແຈ້ງໃຫ້ຊາບ ທິດທາງແຜນການຮ່ວມມືໃນຕໍ່ໜ້າ ທີ່ບັນດາກໍາມາທິການ ຂອງສະພາແຫ່ງຊາດ ລາວ ແລະ ຫວຽດນາມ ເປັນເອກະພາບຮ່ວມກັນ ເປັນຕົ້ນ ການສືບຕໍ່ຮ່ວມກັນຕິດຕາມກວດກາໃນຫົວຂໍ້ທີ່ພົ້ນເດັ່ນ ແລະ ເປັນປະໂຫຍດ ໃຫ້ແກ່ການຮ່ວມມື ຂອງສອງປະເທດ, ສືບຕໍ່ຮ່ວມມືກັນສ້າງປື້ມ 50 ປີ ແຫ່ງສາຍພົວພັນ ລະຫວ່າງ ສະພາແຫ່ງຊາດລາວ ແລະ ຫວຽດນາມ ແລະ ອື່ນໆ ເຊິ່ງສະພາແຫ່ງຊາດຫວຽດນາມ ກໍໄດ້ສະແດງຄວາມຢືນຢັນສືບຕໍ່ໃຫ້ການສະໜັບສະໜູນ ແລະ ຊ່ວຍເຫລືອດ້ານຊ່ຽວຊານ, ທຶນຮອນ ແລະ ອຸປະກອນຮັບໃຊ້ຫ້ອງການ ເພື່ອໃຫ້ສະພາແຫ່ງຊາດລາວ ເປັນເຈົ້າພາບກອງປະຊຸມໃຫຍ່ ໄອປາ ຄັ້ງທີ 45 ແລະ ກອງປະຊຸມອື່ນ ທີ່ປິ່ນອ້ອມ.
ໃນໂອກາດດຽວກັນນີ້, ສະຫາຍ ປະທານປະເທດ ໂຕ ເລິມ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ແຈ້ງຜົນການພົບປະຢ່າງເປັນທາງການກັບ ສະຫາຍ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ແລະ ການພົບປະກັບ ສະຫາຍ ສອນໄຊ ສີພັນດອນ ນາຍົກລັດຖະ ມົນຕີ ແຫ່ງ ສປປ ລາວ ເຊິ່ງເຫັນວ່າໄດ້ມີການປຶກສາຫາລືຢ່າງກົງໄປກົງມາໃນຫລາຍບັນຫາ ທີ່ເຕັມໄປດ້ວຍບັນຍາກາດໄມຕີຈິດຖານສະຫາຍອ້າຍນ້ອງໃນຄອບຄົວດຽວກັນ.
ໃນຕອນທ້າຍ, ສອງຝ່າຍ ຕ່າງກໍເຫັນດີເປັນເອກະພາບຈະຮ່ວມກັນສືບຕໍ່ປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານ ລະຫວ່າງ ສອງພັກ, ສອງລັດ ກໍຄື ປະຊາຊົນສອງຊາດ ລວມທັງການພົວພັນຮ່ວມມືລະຫວ່າງສອງສະພາແຫ່ງຊາດ ລາວ-ຫວຽດນາມ ໃຫ້ນັບມື້ນັບມີປະສິດທິຜົນ ແລະ ສວຍສົດງົດງາມຕະຫລອດໄປ.
ໃນຕອນບ່າຍວັນດຽວກັນ, ສະຫາຍ ໂຕ ເລິມ ປະທານປະເທດ ແຫ່ງ ສສ ຫວຽດນາມ ຍັງໄດ້ພົບປະຢ້ຽມຢາມບັນດາອະດີດການນໍາຂັ້ນສູງ ຂອງ ສປປ ລາວ ຄື: ສະຫາຍ ຈູມມາລີ ໄຊຍະສອນ ອະດີດປະທານປະເທດ; ສະຫາຍ ບຸນຍັງ ວໍລະຈິດ ອະດີດປະທານປະເທດ ແລະ ສະຫາຍ ທອງສິງ ທໍາມະວົງ ອະດີດນາຍົກລັດຖະມົນຕີ ແຫ່ງ ສປປ ລາວ ຕື່ມອີກ.
ພາບ: ອ່າຍຄໍາ
