ເມື່ອບໍ່ດົນມານີ້, ເຈົ້າໜ້າທີ່ຕໍາຫລວດ ກອງບັນຊາການ ປກສ ເຂດເສດຖະກິດພິເສດສາມຫລ່ຽມຄໍາ ສົມທົບກັບ ກຳລັງປ້ອງກັນຊາດປະຈຳເຂດ, ເຈົ້າໜ້າທີ່ຕໍາຫລວດ ສປ ຈີນ, ໜ່ວຍງານຮັກສາຄວາມປອດໄພ ເຂດເສດຖະກິດພິເສດສາມຫລ່ຽມຄຳ ໄດ້ເຂົ້າຈັບກຸ່ມແກ້ງສໍ້ໂກງຊັບທາງໂທລະຄົມ (Call Center) ຢູ່ໃນເຂດເສດຖະ ກິດພິເສດສາມຫລ່ຽມຄໍາ ເມືອງຕົ້ນເຜິ້ງ, ແຂວງບໍ່ແກ້ວ ເຊິ່ງຈັບຕົວໄດ້ທັງໝົດ 280 ຄົນ, ຍິງ 7 ຄົນ(ຄົນສັນຊາດຈີນ). ພ້ອມດ້ວຍເຄື່ອງຂອງກາງໂທລະສັບມືຖື 1.345 ໜ່ວຍ ແລະ ຄອມພິວເຕີ້ຕັ້ງໂຕະ 458 ຊຸດ.
ຈາກນັ້ນ, ກໍໄດ້ມອບ-ຮັບ ຄົນສັນຊາດຈີນຈໍານວນດັ່ງກ່າວ, ພ້ອມຂອງກາງ ໃຫ້ເຈົ້າໜ້າທີ່ຝ່າຍຈີນຢູ່ຊາຍແດນລາວ-ຈີນ ດ່ານບໍ່ເຕັນ-ບໍ່ຫານ ຕ່າງໜ້າຝ່າຍລາວມອບໂດຍ ທ່ານ ພັທ ສຸດໃຈ ອິນທອງໄຊ ຮອງພະແນກຕຳຫລວດກວດຄົນເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ, ຕ່າງໜ້າຝ່າຍຈີນຮັບໂດຍ ທ່ານ ພັອ ຈ້າວເຊິ່ງຈຸນ ຫົວໜ້າຫ້ອງການປ້ອງກັນຄວາມສະຫງົບ ແຂວງກິ່ງສິບສອງປັນນາ ເພື່ອໄປດຳເນີນຄະດີຕາມກົດໝາຍ.
ການລົງແກ້ໄຂກຸ່ມແກ້ງສໍ້ໂກງຊັບທາງໂທລະຄົມ (Call Center) ຢູ່ພາຍໃນເຂດເສດຖະກິດພິເສດສາມ ຫລ່ຽມຄຳໃນຄັ້ງນີ້, ກໍເພື່ອເປັນການເຂັ້ມງວດໃນການສະກັດກັ້ນ-ແກ້ໄຂ ປະກົດການຫຍໍ້ທໍ້ ຢູ່ໃນເຂດເສດຖະກິດພິເສດສາມຫລ່ຽມຄຳ ໃຫ້ຫລຸດລົງເທື່ອລະກ້າວ ແນໃສ່ເຮັດໃຫ້ສັງຄົມ ກໍຄື ເຂດເສດຖະກິດພິເສດສາມຫລ່ຽມຄຳ ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພ.
ຂ່າວ: ກົມສື່ມວນຊົນ ປກສ
