ຕອນບ່າຍວັນທີ 1 ກໍລະກົດ 2024 ນີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ຈູລີ ບີດຊ໋ອບ (Julie Bishop) ຜູ້ຕາງໜ້າພິເສດກ່ຽວກັບມຽນມາ ຂອງເລຂາທິການໃຫຍ່ອົງການສະຫະປະຊາຊາດ (ສປຊ) ໃນໂອກາດທີ່ເດີນທາງມາຢ້ຽມຢາມເຮັດວຽກຢູ່ ສປປ ລາວ.
ໃນໂອກາດນີ້, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຊົມເຊີຍຢ່າງຈິງໃຈ ຕໍ່ ທ່ານ ນາງ ຈູລີ ບີດຊ໋ອບ ທີ່ໄດ້ຮັບການແຕ່ງຕັ້ງ ເປັນຜູ້ຕາງໜ້າພິເສດ ກ່ຽວກັບມຽນມາ ຂອງເລຂາທິການໃຫຍ່ອົງການສະຫະປະຊາຊາດ ແລະ ຕີລາຄາສູງບົດບາດສຳຄັນດັ່ງກ່າວ. ພ້ອມນີ້, ທ່ານ ນາງ ຈູລີ ບີດຊ໋ອບ ກໍໄດ້ສະແດງຄວາມຊົມເຊີຍຕໍ່ ຄວາມພະຍາຍາມຂອງ ສປປ ລາວ ໃນນາມປະທານອາຊຽນປີ 2024 ໃນການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນຳອາຊຽນ, ທັງສອງຝ່າຍ ຈະປະສານງານກັນຢ່າງໃກ້ຊິດ.
ນອກຈາກນີ້, ຜູ້ຕາງໜ້າພິເສດ ຂອງເລຂາທິການໃຫຍ່ອົງການສະຫະປະຊາຊາດ ກ່ຽວກັບມຽນມາ ຍັງໄດ້ພົບປະກັບ ທ່ານ ອາລຸນແກ້ວ ກິດຕິຄຸນ, ຜູ້ຕາງໜ້າພິເສດກ່ຽວກັບມຽນມາ ຂອງປະທານອາຊຽນ ຂອງ ສປປ ລາວ ໃນປີ 2024 ເພື່ອປຶກສາຫາລື ແລະ ຮັດແໜ້ນການປະສານງານກັນ ໃນການຈັດຕັ້ງປະຕິບັດໜ້າທີ່ຂອງຕົນ.
ຂ່າວ: ກະຊວງການຕ່າງປະເທດ
