ພິທີສະເຫລີມສະຫລອງ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສປປ ເກົາຫລີ ຄົບຮອບ 50 ປີ ຈັດຂຶ້ນໃນຕອນຄໍ່າວັນທີ 27 ມິຖຸນາ 2024 ຢູ່ນະຄອນຫລວງວຽງຈັນ ໂດຍມີ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ທ່ານ ລີ ຢົງ ຊົນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫລີ ປະຈຳ ສປປ ລາວ, ມີບັນດາຫົວໜ້າກົມ, ຮອງກົມ ຈາກບັນດາກະຊວງທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.
ໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ມີຄຳເຫັນວ່າ: ສປປ ລາວ ແລະ ສປປ ເກົາຫລີ ໄດ້ສ້າງຕັ້ງສາຍພົວພັນການທູດ ໃນວັນທີ 24 ມິຖຸນາ 1974, ພາຍໃຕ້ການຊີ້ນຳ-ນຳພາ ຂອງ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວ ແລະ ປະທານ ກິມ ອິນ ຊຸງ ຜູ້ນຳທີ່ຍິ່ງໃຫຍ່ຂອງປະຊາຊົນ ສປປ ເກົາຫລີ. ສາຍພົວພັນຂອງສອງປະເທດ ໄດ້ຮັບການຖະນຸຖະໜອມ ແລະ ເພີ່ມພູນຄູນສ້າງ ມາເປັນແຕ່ລະໄລຍະ ໂດຍການນໍາພາຂອງບັນດາອະດີດຜູ້ນຳຂອງສອງປະເທດ, ໃນປັດຈຸບັນ ໄດ້ຮັບການສືບທອດໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່, ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ແລະ ສະຫາຍ ກິມ ເຈິງ ອຸນ ເລຂາທິການໃຫຍ່ ພັກແຮງງານເກົາຫລີ, ປະທານກິດຈະການແຫ່ງລັດ ແຫ່ງ ສປປ ເກົາຫລີ.
ຕະຫລອດໄລຍະ 5 ທົດສະວັດ ທີ່ຜ່ານມາ, ພາຍໃຕ້ການນຳພາ-ຊີ້ນຳ ອັນສະຫລາດສ່ອງໃສ ຂອງການນຳທັງສອງປະເທດ, ສາຍພົວພັນມິດຕະພາບອັນເປັນມູນເຊື້ອ ແຫ່ງຄວາມສາມັກຄີ ແລະ ການຮ່ວມມືອັນດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໄດ້ຮັບການເສີມຂະຫຍາຍ ຈົນເຖິງປັດຈຸບັນ, ອັນໄດ້ປະກອບສ່ວນສໍາຄັນ ໃນພາລະກິດປົກປັກຮັກສາ ເເລະ ສ້າງສາພັດທະນາປະເທດຊາດ ຂອງຕົນ ໂດຍສະ ເພາະ, ໃນຊຸມປີຜ່ານມານີ້, ສອງຝ່າຍ ໄດ້ສືບຕໍ່ຮັກສາກົນໄກການຮ່ວມມື ເເລະ ປະສານງານກັນຢ່າງໃກ້ຊິດ ໃນການຊຸກຍູ້ການພົວພັນຮ່ວມມືສອງຝ່າຍ ກໍຄື ການສະໜັບສະໜູນ ຊ່ວຍເຫລືອ ເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ເຊິ່ງສະແດງອອກໃນການແລກປ່ຽນການຢ້ຽມຢາມ ເຊິ່ງກັນ ແລະ ກັນ ຂອງຄະນະຜູ້ແທນການນຳພັກ-ລັດ ຂອງສອງປະເທດ ຢ່າງເປັນປົກກະຕິ, ອັນພົ້ນເດັ່ນ ກໍຄື ການຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງສະຫາຍ ກິມ ເຊິງ ນາມ ກໍາມະການສໍາຮອງກົມການເມືອງ, ຫົວໜ້າຄະນະພົວພັນຕ່າງປະເທດສູນກາງພັກແຮງງານ ເກົາຫລີ ໃນລະຫວ່າງວັນທີ 28-31 ມີນາ 2024 ທີ່ຜ່ານມາ ແລະ ການແລກປ່ຽນສານອວຍພອນເຊິ່ງກັນ ແລະ ກັນ ໃນໂອກາດວັນສໍາຄັນຕ່າງໆ.
ພ້ອມນີ້, ທ່ານ ສະເຫລີມໄຊ ກົມມະສິດ ຍັງໄດ້ສະແດງຄວາມຫວັງວ່າ ສອງປະເທດ ລາວ-ສປປ ເກົາຫລີ ຈະສືບຕໍ່ການຮ່ວມມືປະສານງານຂອງສະຖານທູດຂອງທັງສອງປະເທດ ເພື່ອຊຸກຍູ້ ເເລະ ເສີມຂະຫຍາຍສາຍພົວ ພັນຮ່ວມມື ຂອງສອງປະເທດ ໃຫ້ກ້າວສູ່ລວງເລິກຍິ່ງໆຂຶ້ນ ເພື່ອສືບຕໍ່ສະໜັບສະໜູນ ເເລະ ຊ່ວຍເຫລືອເຊິ່ງກັນ ເເລະ ກັນ ໃນຂອບສອງຝ່າຍ ແລະ ຫລາຍຝ່າຍ ເພື່ອນໍາເອົາຜົນປະໂຫຍດມາສູ່ ປະຊາຊົນສອງຊາດ ພວກເຮົາ ແລະ ເພື່ອການປະກອບສ່ວນເຂົ້າໃນການຮັກສາສັນຕິພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ສາ ກົນ. ພ້ອມທັງ ຕາງໜ້າໃຫ້ພັກ-ລັດ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນມາຍັງ ພັກ-ລັດ ແລະ ປະຊາຊົນ ສປປ ເກົາຫລີ ອ້າຍນ້ອງ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອ ແກ່ພາລະກິດ ການປະຕິວັດ ຂອງລາວ ໃນເມື່ອກ່ອນ ກໍຄື ໄລຍະປົກປັກຮັກສາ ແລະ ສ້າງສາພັດທະນາປະເທດຊາດຂອງລາວ ໃນປັດຈຸບັນ.
ພ້ອມນີ້, ທ່ານ ລີ ຢົງ ຊົນ ກໍໄດ້ມີຄຳເຫັນວ່າ: ສະຖານທູດ ສປປ ເກົາຫລີ ຈະສືບຕໍ່ເສີມຂະຫຍາຍ ສາຍພົວພັນຕະພາບທີ່ເປັນມູນເຊື້ອ ທີ່ສ້າງຕັ້ງຂຶ້ນໂດຍການນຳໃນເມື່ອກ່ອນ ໃຫ້ກ້າວຂຶ້ນສູ່ ລະດັບສູງອັນໃໝ່ ສົມກັບຄວາມມຸ່ງມາດປາຖະໜາ ຂອງຜູ້ນຳສອງປະເທດ ແລະ ຕາມຄວາມຮຽກຮ້ອງຕ້ອງການ ຂອງຍຸກສະໄໝໃໝ່. ປັດຈຸ ບັນ ສາຍພົວພັນມິດຕະພາບ ຂອງສອງປະເທດ ໄດ້ກ້າວເຂົ້າສູ່ໄລຍະອັນໃໝ່ ແຫ່ງການພັດທະນາ ພາຍໃຕ້ການເອົາ ໃຈໃສ່ ອັນເລິກເຊິ່ງ ຂອງ ສະຫາຍ ເລຂາທິການໃຫ່ຍ ຂອງສອງປະເທດ. ໃນຊຸມປີຜ່ານມານີ້, ການພົວພັນສອງຝ່າຍ ໄດ້ຮັບການຮັດແໜ້ນຢ່າງສະໝໍ່າສະເໝີ ແລະ ເຊື້ອໝັ້ນວ່າ ການພົວພັນຮ່ວມມືດັ່ງກ່າວ, ຈະສືບຕໍ່ໄດ້ຮັບການຮັດແໜ້ນ ແລະ ພັດທະນາຢ່າງບໍ່ຢຸດຢັ້ງ ດ້ວຍຄວາມພະຍາຍາຮ່ວມກັນຂອງສອງປະເທດ.
ພ້ອມນີ້, ທ່ານ ລີ ຢົງ ຊົນ ຍັງໄດ້ຕາງໜ້າໃຫ້ພັກ, ລັດ ແລະ ປະຊາຊົນເກົາຫລີ ສະແດງຄວາມຂອບໃຈ ແລະ ຮູ້ບຸນຄຸນມາຍັງ ພັກ-ລັດ ແລະ ປະຊາຊົນລາວ ອ້າຍນ້ອງ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອແກ່ພາລະກິດການຕໍ່ສູ້ຂອງປະຊາຊົນເກົາຫລີ ໃນເມື່ອກ່ອນ ແລະ ປັດຈຸບັນ ກໍຄື ພາລະກິດສ້າງສາພັດທະນາປະເທດຊາດ ສັງຄົມນິຍົມທີ່ຮັ່ງມີ, ເຂັ້ມແຂງ. ພ້ອມນັ້ນ, ສະຖານທູດ ສປປ ເກົາຫລີ ປະຈຳ ສປປ ລາວ ຈະສືບຕໍ່ເຮັດວຽກ ຢ່າງໃກ້ຊິດກັບກະຊວງການຕ່າງປະເທດ ເພື່ອສືບຕໍ່ພັດທະນາສາຍພົວພັນ ມິດຕະພາບ ແລະ ການຮ່ວມມືໃນຂອບສອງຝ່າຍ ແລະ ຫລາຍຝ່າຍໃນອະນາຄົດ.
ຂ່າວ: ທະນູທອງ
ພາບ: ຂັນໄຊ
