ກະຊວງສາທາລະນະສຸກ ຮ່ວມກັບ ສະຖານທູດຈີນ ປະຈຳລາວ ແລະ ອົງການສະຫະປະຊາຊາດ ເພື່ອການພັດທະນາ ຈັດກອງປະຊຸມສະຫລຸບຜົນງານການປະຕິບັດໂຄງການຮ່ວມມືເພື່ອການເສີມສ້າງ ຄວາມເຂັ້ມ ແຂງ ເພື່ອຟື້ນຟູຈາກຜົນກະທົບຂອງໂຄວິດ 19 ຈັດຂຶ້້ນ ໃນວັນທີ 27-28 ມິຖຸນາ 2024 ຢູ່ນະຄອນຫລວງວຽງຈັນ ເຊິ່ງໂຄງການໄດ້ຮັບຜົນສຳເລັດຕາມຈຸດປະສົງແຜນແມ່ບົດ ການຮ່ວມມື ເປັນຕົ້ນ ສຳເລັດການສ້າງຂໍ້ຕົກລົງວ່າດ້ວຍການຂຶ້ນທະບຽນ ແລະ ຈົດແຈ້ງອຸປະກອນການແພດ, ປັບປຸງຄູ່ມື ການກວດກາອຸປະກອນປ້ອງກັນສ່ວນບຸກ ຄົນ(PPE), ປັບປຸງຄູ່ມືການວິໄຈ PPE, ສຳເລັດຈັດຝຶກອົບຮົມ ແລະ ເຜີຍແຜ່ຂໍ້ຕົກລົງ ແລະ ຄູ່ມືໃຫ້ແກ່ ຂະແໜງ ການກວດກາ ແລະ ວິໄຈອາຫານ ແລະ ຢາ 7 ແຂວງ ພາກເໜືອ, ພາກກາງ ແລະ ພາກໃຕ້ ລວມເຖິງການຕິດຕາມກວດກາ ອຸປະກອນ PPE ທີ່ຈໍລະຈອນຈຳໜ່າຍໃນທ້ອງຕະຫລາດ. ນອກຈາກນັ້ນ, ຜົນສຳເລັດອັນພົ້ນເດັ່ນພາຍໃຕ້ໂຄງການນີ້ ກໍຄື ການຈັດຊື້ ແລະ ສະໜອງ ເຄື່ອງຈັກສາຍການຜະລິດເຈວລ້າງມື, ຜ້າອັດປາກ-ດັງ, ເຄື່ອງອະເຊື້ອຜ້າອັດປາກ-ດັງ ແລະ ສິ່ງປຸກສ້າງ ທີ່ໄດ້ຈັດຈ້າງການກໍ່ສ້າງ ໃຫ້ແກ່ລັດວິສາຫະກິດ ໂຮງງານຜະລິດຢາເລກ 3.
ໂອກາດນີ້, ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ໄດ້ສະແດງຄວາມຂອບໃຈມາຍັງ ລັດຖະບານ ສປ ຈີນ ສຳລັບການສະໜັບສະໜູນ ແລະ ການຮ່ວມມືຢ່າງສຸດກົກສຸດປາຍໃນການຈັດ ຕັ້ງປະຕິບັດໂຄງການດັ່ງກ່າວ ແລະ ສະແດງຄວາມຊົມເຊີຍຕໍ່ກົມອາຫານ ແລະ ຢາ ທີ່ໄດ້ຕິດຕາມຊຸກຍູ້ໃກ້ຊິດຕິດ ແທດ. ນອກຈາກນີ້, ຍັງມີບັນດາຂະແໜງການ ແລະ ໜ່ວຍງານທີ່ກ່ຽວຂ້ອງ ທີ່ໄດ້ປະກອບສ່ວນເຂົ້າໃນຜົນສຳເລັດໂຄງການໂດຍສະເພາະ ອົງການ ສປຊ, ສປ ຈີນ ແລະ ສະພາການຄ້າ ຂອງ ສປ ຈີນ ທີ່ມີສ່ວນຮ່ວມໃນການຂັບເຄື່ອນໂຄງການດັ່ງກ່າວ ໂດຍຜ່ານຮູບການຈັດຕັ້ງປະຕິບັດ ຂອງ ສປຊ ປະຈຳ ສປປ ລາວ.
ສຳລັບ ທິດທາງໃນຕໍ່ໜ້າ ແລະ ຄວາມຍືນຍົງ ເພື່ອຮັບປະກັນໃຫ້ມີການສືບຕໍ່ໝາກຜົນທີ່ໂຄງການໄດ້ປະ ກອບໄວ້ໃຫ້ໃນເບື້ອງຕົ້ນນີ້, ກະຊວງສາທາລະນະສຸກ ຈະສືບຕໍ່ຊີ້ນຳ ກົມອາຫານ ແລະ ຢາ, ລັດວິສາຫະກິດໂຮງງານຜະລິດຢາເລກ 3 ໃຫ້ມີແບບແຜນ ແລະ ຄວາມເປັນເຈົ້າການໃນການຮັບປະກັນຄວາມຍືນຍົງ ໂດຍສະເພາະແມ່ນການນຳໃຊ້ມາດຕະຖານດ້ານຄວາມປອດໄພ, ສັງຄົມ ແລະ ສິ່ງແວດລ້ອມ ທີ່ໂຄງການກຳນົດໄວ້ ໂດຍພາຍໃຕ້ການ ຈັດຕັ້ງປະຕິບັດ ແລະ ຕິດຕາມຊຸກຍູ້ຂອງກົມອາຫານ ແລະ ຢາ, ເພື່ອສືບຕໍ່ການຈັດຕັ້ງປະຕິບັດໂຄງການໃນໄລຍະສຸດທ້າຍ ໃຫ້ບັນລຸຜົນຕາມລາຍລະອຽດຄວາມຕ້ອງການຂອງໂຄງການທີ່ໄດ້ຕັ້ງໄວ້. ພ້ອມນີ້, ທ່ານຮອງລັດຖະມົນຕີ ກະຊວງສາທາລະນະສຸກ ຍັງສະເໜີເຖິງຜູ້ສະໜັບສະໜູນ ແລະ ຜູ້ໃຫ້ທຶນ ພິຈາລະນາສືບຕໍ່ການສະໜັບສະໜູນດ້ານງົບປະມານ ຢ່າງຕໍ່ເນື່ອງ ເພື່ອຂະຫຍາຍ ແລະ ບັນລຸເປົ້າໝາຍທີ່ສູງຂຶ້ນ ໂດຍສະເພາະ ສະເໜີລະດົມທຶນຊ່ວຍເຫລືອທັງດ້ານງົບປະມານ ແລະ ວິຊາການ ເພື່ອສືບຕໍ່ການປຸກສ້າງ ສາງເກັບມ້ຽນວັດຖຸດິບ ແລະ ຜະລິດຕະພັນເຈວລ້າງມື ແລະ ຜ້າອັດປາກ-ດັງ ໃຫ້ສອດຄ່ອງຕາມຫລັກການ ການເກັບມ້ຽນທີ່ດີ; ສະເໜີຂໍການສະໜັບສະໜູນທີ່ຕິດພັນກັບການປະຕິບັດຕາມຫລັກການການຜະລິດທີ່ດີ (GMP) ໃນການປຸກສ້າງສະຖານທີ່ທຳຄວາມສະ ອາດອຸປະກອນບັນຈຸ ກ່ອນຮັບໃຊ້ເຂົ້າໃນການຜະລິດເຈວລ້າງມື ແລະ ຜ້າອັດປາກ-ດັງ ແລະ ອຸປະກອນ-ເຄື່ອງມືອຳນວຍຄວາມສະດວກອື່ນໆ ທີ່ມີຄວາມຈຳເປັນ; ສະເໜີຂໍການຮ່ວມມື ແລະ ສະໜອງງົບປະມານ ເພື່ອສະໜັບສະໜູນດ້ານວິຊາການ ແກ່ລັດວິສາຫະກິດໂຮງງານຜະລິດຢາເລກ 3 ເພື່ອໃຫ້ໄດ້ການຮັບຮອງ GMP ແລະ ທິດທາງການປັບປຸງໃຫ້ໄດ້ຮັບການຢັ້ງຢືນ ISO 13485:2016 ແລະ ISO45001:2018;
