ຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສ ຂອງບັນດາປະເທດພາຄີບົດບັນທຶກຄວາມເຂົ້າໃຈ ວ່າດ້ວຍການຮ່ວມມືເພື່ອຄວບຄຸມຢາເສບຕິດ ປີ 1993 ເຊິ່ງປະກອບມີ 6 ປະເທດລຸ່ມແມ່ນໍ້າຂອງ ລວມມີ: ລາວ, ກຳປູເຈຍ, ຈີນ, ມຽນມາ, ໄທ, ຫວຽມນາມ ແລະ ອົງການສະຫະປະຊາຊາດ ເພື່ອຄວບຄຸມຢາເສບຕິດ ແລະ ຕ້ານອາຊະຍາກໍາ ປະຈໍາພາກພື້ນອາຊີຕາ ແລະ ປາຊີຟິກ (UNODC) ໃນລະຫວ່າງວັນທີ 28-29 ພຶດສະພາ 2024 ນະຄອນຫຼວງວຽງຈັນ.
ໂດຍມີ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ຫົວໜ້າກົມໃຫຍ່ຕໍາຫຼວດ, ພັນເອກ ອິນປົງ ຈັນທະວົງສາ ຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ແລະ ທ່ານ ມາສູດ ກາຣິມີປົວ (Masood Karimipour) ຜູ້ຕາງໜ້າອົງການ ສປຊ ເພື່ອຄວບຄຸມຢາເສບຕິດ ແລະ ຕ້ານອາດຊະຍາກຳປະຈຳພາກພື້ນອາຊີ ແລະ ປາຊີຟິກ ພ້ອມດ້ວຍບັນດາປະເທດພາຄີບົດບັນທຶກຄວາມເຂົ້າໃຈ ວ່າດ້ວຍການຮ່ວມມືເພື່ອຄວບຄຸມຢາເສບຕິດ ໃນອະນຸພາກພື້ນແມ່ນໍ້າຂອງ ເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ຮັບຟັງ ແລະ ປຶກສາຫາລືບາງວຽກງານທີ່ສໍາຄັນຄືດັ່ງນີ້:
– ການລາຍງານສະພາບບັນຫາຢາເສບຕິດໃນພາກພື້ນໃນໂລກ
– ການລາຍງານສະພາບລວມການຈັດຕັ້ງປະຕິບັດແຜນງານທີ 12 ຂອງອະນຸພາກພື້ນແມ່ນໍ້າຂອງ
– ການປະກາດຫ້ອງການປະສານງານຊາຍແດນ
– ກວດກາຄືນ ແລະ ຮັບຮອງເອົາເງື່ອນໄຂຂອງຄະນະເຮັດວຽກຕາມຂໍ້ລິເລີ່ມຂອງ ສປ ຈີນ ເພື່ອຮ່ວມກັນແກ້ໄຂບັນຫາຢາເສບຕິດສັງເຄາະ ໃນຂົງເຂດອະນຸພາກພື້ນແມ່ນໍ້າຂອງ ແລະ ແຜນການຈັດກອງປະຊຸມຂອງຄະນະເຮັດວຽກ ແລະ ບັນດາກິດຈະກໍາຕ່າງໆ
– ການລາຍງານຜົນຂອງກອງປະຊຸມຄະນະກຳມະການ ຄວບຄຸມຢາເສບຕິດສາກົນ(CND) ຄັ້ງທີ 67
– ການປຶກສາຫາລືແບບໂຕະມົນກ່ຽວກັບສະພາບ, ສິ່ງທ້າທາຍ ແລະ ທິດທາງການຮ່ວມມືໃນຕໍ່ໜ້າ ພາຍໃຕ້ກອບຂອງບັນດາປະເທດທີ່ລົງນາມໃນບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມືເພື່ອຄວບຄຸມຢາເສບຕິດ ໃນອານຸພາກພື້ນແມ່ນໍ້າຂອງ (Mekong MOU Framework)
– ການເປັນເຈົ້າພາບກອງປະຊຸມປີ 2025
ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ກ່າວວ່າ: ສປປ ລາວ ໄດ້ໃຫ້ຄຳໝັ້ນສັນຍາເຂົ້າຮ່ວມຢ່າງຕັ້ງໜ້າ ໃນການພັດທະນາກົນໄກ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືເພື່ອຄວບຄຸມຢາເສບຕິດ ຂອງບັນດາປະເທດອານຸພາກພື້ນແມ່ນ້ຳຂອງ(MOU) ຢ່າງຕັ້ງໜ້າ. ພວກເຮົາໄດ້ສືບຕໍ່ຈັດຕັ້ງປະຕິບັດ “ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2024-2025 ແລະ ແຜນການຍຸດທະສາດແຫ່ງຊາດ ໃຫ້ເປັນບຸລິມະສິດ ຄຽງຄູ່ກັບບົດບັນທຶກຄວາມເຂົ້າໃຈ ວ່າດ້ວຍການຮ່ວມມືເພື່ອຄວບຄຸມຢາເສບຕິດ ຂອງບັນດາປະເທດອານຸພາກພື້ນແມ່ນ້ຳຂອງ(MOU) ເປັນພື້ນຖານຂອງຄວາມພະຍາຍາມໃນການຮ່ວມມືຂອງພວກເຮົາ ກັບບັນດາປະເທດສະມາຊິກລຸ່ມແມ່ນໍ້າຂອງ.
ສປປລາວ ພ້ອມແລ້ວທີ່ຈະຮ່ວມມືກັບທຸກຝ່າຍເພື່ອສະໜັບສະໜູນ ຄວາມມຸ່ງໝັ້ນຮ່ວມກັນ, ສົ່ງເສີມການຈະເລີນເຕີບໂຕແບບຍືນຍົງຂອງ MOU ແມ່ນ້ຳຂອງ, ຍົກສູງປະສິດທິຜົນ ແລະ ເພີ່ມທະວີການຮ່ວມມືສາກົນເພື່ອແກ້ໄຂບັນຫາຢາເສບຕິດຂອງພາກພື້ນ, ເພີ່ມທະວີການຮ່ວມມືພາກພື້ນ ແລະ ສາກົນ. ຮ່ວມກັນຊຸກຍູ້ໃຫ້ມີສັນຕິພາບ, ຄວາມສະຫງົບ, ປອດໄພ ແລະ ຄວາມຈະເລີນຮຸ່ງເຮືອງຢູ່ໃນອານຸພາກພື້ນແມ່ນ້ຳຂອງ.
ຂ່າວ: ຄໍາໂຖ, ຄວາມສະຫງົບລາວ
