Thursday, April 25, 2024
Homeທຸລະກິດກະຊວງ ອຄ ເອົາໃຈໃສ່ ຄຸ້ມຄອງລາຄາສິນຄ້າ

ກະຊວງ ອຄ ເອົາໃຈໃສ່ ຄຸ້ມຄອງລາຄາສິນຄ້າ

ໃນໄລຍະຜ່ານມາ, ກະຊວງ ອຄ ໄດ້ເອົາໃຈໃສ່ ຄຸ້ມຄອງລາຄາສິນຄ້າຕາມນະໂຍບາຍ ແລະ ມາດຕະການທີ່ລັດຖະບານໄດ້ກໍານົດໄວ້. ແຕ່ຍ້ອນຫຼາຍປັດໄຈ ທັງພາຍໃນ ແລະ ນອກປະເທດ ນັບແຕ່ຕົ້ນປີເປັນຕົ້ນມາ ສິນຄ້າ ແລະ ລາຄານໍ້າມັນເຊື້ອໄຟ ມີລາຄາສູງຂຶ້ນຕາມອັດຕາເງິນເຟີ້ (ເງິນກີບອ່ອນຄ່າ) ຊຶ່ງໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ແລະ ພະນັກງານ, ທະຫານ, ຕໍາຫຼວດຂອງພວກເຮົາ.

ຕໍ່ສະພາບການເພີ່ມຂຶ້ນຂອງລາຄາສິນຄ້າ ກະຊວງ ອຄ ໄດ້ເອົາໃຈໃສ່ຄົ້ນຄວ້າຜ່ານກົນໄກຕ່າງໆ ແລະ ໃຈກາງໃນການປະສານສົມທົບກັບຂະແໜງການທີ່ກ່ຽວຂ້ອງ ໂດຍສະເພາະຈັດກອງປະຊຸມປຶກສາຫາລືກ່ຽວກັບ: ວຽກງານທີ່ຕິດພັນກັບການຄຸ້ມຄອງລາຄາ ສິນຄ້າ ແລະ ຄ່າບໍລິການ, ຜັນຂະຫຍາຍທິດຊີ້ນໍາຄະນະ 36/ນຍ ກອງປະຊຸມໄດ້ຄົ້ນຄ້ວາກໍານົດສິນຄ້າປະເພດ: ເຂົ້າ, ໄກ່, ໄຂ່, ຊີ້ນໝູ ແລະ ປາ ທີ່ຈໍາເປັນຕໍ່ການດໍາລົງຊີວິດຂອງປະຊາຊົນເພື່ອນໍາໃຊ້ມາດຕະການຕ່າງໆ ໃນດໍາລັດ 474/ນຍ, ມາດຕະການຖົມຂຸມໃນການດັດສົມລາຄາ, ຫຼຸດຜ່ອນຄ່າໃຊ້ຈ່າຍຂອງປະຊາຊົນ. ໄດ້ປຶກສາຫາລືກ່ຽວກັບຕົ້ນທຶນການຜະລິດສິນຄ້າປະເພດສະບຽງອາຫານເຊັ່ນ: ເຂົ້າກິນ, ໝູ, ປາ, ໄຂ່ໄກ່, ສິນຄ້າປະເພດຫົວອາຫານ, ແນວພັນ, ຝຸ່ນ ແລະ ການກໍານົດອັດຕາຄ່າບໍລິການທາງບົກ. ນອກຈາກນັ້ນຍັງໄດ້ປະສານສົມທົບກັບທ້ອງຖິ່ນ ໂດຍຈັດກອງປະຊຸມພົບປະລະຫວ່າງ ກຸ່ມໂຮງສີເຂົ້າກັບກຸ່ມຊາວນາ ເພື່ອປະຕິບັດໂຄງການສ້າງລະບຽບຄຸ້ມຄອງຕະຫຼາດຊື້ – ຂາຍເຂົ້າຢູ່ແຂວງ ສະຫວັນນະເຂດ, ຈໍາປາສັກ, ສາລະວັນ, ວຽງຈັນ, ໄຊຍະບູລີ, ບໍລິຄໍາໄຊ ແລະ ໄຊສົມບູນ.

ຄຽງຄູ່ກັບການຄຸ້ມຄອງລາຄາສິນຄ້າ ແລ້ວ ກະຊວງ ອຄ ຍັງຊຸກຍູ້ ການແຂ່ງຂັນທາງທຸລະກິດ, ປົກປ້ອງຜູ້ຊົມໃຊ້ ຍັງໄດ້ສືບຕໍ່ສົ່ງເສີມການຜະລິດກະສິກໍາຕິດພັນກັບການປຸງແຕ່ງ ໂດຍອີງໃສ່ທ່າແຮງ ແລະ ຄວາມສາມາດແຂ່ງຂັນໃນການຜະລິດ, ຮັບປະກັນຄຸນນະພາບ, ປະລິມານ, ການຫຸ້ມຫໍ່ ໂພຊະນາການ ແລະ ອື່ນໆ ເພື່ອໃຫ້ສາມາດແຂ່ງຂັນກັບການນໍາເຂົ້າ; ຄຸ້ມຄອງສິນຄ້າ ອຸປະໂພກ-ບໍລິໂພກ ທີ່ນໍາເຂົ້າ ໂດຍສະເພາະການຕິດສະຫຼາກພາສາລາວ, ການເຮັດໂຄງປະກອບລາຄາສິນຄ້າ ທີ່ນໍາເຂົ້າຈາກຕ່າງປະເທດ ຄຽງຄູ່ກັບການປູກຈິດສໍານຶກ, ຊຸກຍູ້ສົ່ງເສີມທົ່ວສັງຄົມໃຫ້ຫັນມາໃຊ້ຜະລິດຕະພັນ ແລະ ສິນຄ້າທີ່ຜະລິດພາຍໃນໃຫ້ຫຼາຍຂຶ້ນ ເພື່ອຫຼຸດຜ່ອນການນໍາເຂົ້າເທື່ອລະກ້າວ ແລະ ໄດ້ມີການຕິດຕາມກວດກາການຂາຍສິນຄ້າ ຢູ່ທ້ອງຕະຫຼາດເປັນປົກກະຕິ, ມີການກ່າວເຕືອນ ແລະ ປະຕິບັດມາດຕະການ ຕໍ່ຜູ້ລະເມີດລະບຽບການ ແລະ ລາຄາກໍານົດ ເປັນແຕ່ລະໄລຍະ.

ໃນປີ 2023 ຜ່ານມາ, ກະຊວງ ອຄ ໄດ້ລົງເຄື່ອນໄຫວກວດກາບັນດາຫົວໜ່ວຍທຸລະກິດ/ຫ້າງຮ້ານທີ່ນໍາເຂົ້າ, ຈໍາໜ່າຍສິນຄ້າປະເພດຕ່າງໆ ຈໍານວນ 2.504 ຫົົວໜ່ວຍ. ຜ່ານການກວດກາພົບເຫັນການລະເມີດ 744 ຫົວໜ່ວຍ, ລວມມູນຄ່າການປັບໃໝ 1.018.379.300 ກີບ. ພ້ອມທັງໄດ້ປັບປຸງຄະນະຄຸ້ມຄອງລາຄາສິນຄ້າ ແລະ ຄ່າບໍລິການໂດຍເພີ່ມ 3 ຂະແໜງການທີ່ກ່ຽວຂ້ອງ ແລະ 1 ທ້ອງຖິ່ນ ຄື: ຫ້ອງວ່າການສໍານັກງານນາຍົກລັດຖະມົນຕີ, ຂະແໜງການເງິນ, ທະນາຄານ ແຫ່ງ ສປປ ລາວ ແລະ ນະຄອນຫຼວງວຽງຈັນ.

ໂດຍ: ວັນໄຊ

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments