ວັນທີ 14 ມີນາ 2024, ທ່ານ ພົອ ວິໄລ ຫຼ້າຄຳຟອງ ກຳມະການກົມການເມືອງ ສູນກາງພັກ ຮອງນາຍົກລັດຖະ ມົນຕີ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ບົວແກ້ວ ພູມວົງໄຊ ເອກອັກຄະລັດຖະທູດລາວ ປະຈຳກຳປູ ເຈຍ, ມີທ່ານເຈົ້າແຂວງແຂວງອັດຕະປື, ຮອງເຈົ້າແຂວງຈຳປາສັກ ພ້ອມດ້ວຍ ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບ ສປປ ລາວ ໄດ້ເຄື່ອນໄຫວສັນທະວະໄມຕີ ແລະ ເຮັດວຽກຢູ່ຣາຊະອານາຈັກກຳປູເຈຍ ຢ່າງເປັນທາງການ ເພື່ອສືບຕໍ່ເສີມຂະຫຍາຍການພົວພັນຮ່ວມມືວຽກງານປ້ອງກັນຄວາມສະຫງົບ ປະຈຳປີ 2024. ພິທີຕ້ອນຮັບຢ່າງເປັນທາງການໄດ້ຈັດຂຶ້ນຢູ່ທີ່ກະຊວງພາຍໃນ ຣາຊະອານາຈັກກໍາປູເຈຍ ໂດຍການໃຫ້ກຽດຕ້ອນຮັບຢ່າງອົບອຸ່ນຂອງ ທ່ານ ອະພິສັນຕິບັນດິດ ຊໍ ສົກຂາ ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ພ້ອມດ້ວຍຄະນະ.
ຈາກນັ້ນ, ຄະນະຜູ້ແທນທັງສອງຝ່າຍກໍໄດ້ເຂົ້້າຮ່ວມກອງປະຊຸມ ວ່າດ້ວຍການຮ່ວມມືລະຫວ່າງກະຊວງປ້ອງກັນຄວາມສະຫງົບແຫ່ງ ສປປ ລາວ ແລະ ກະຊວງພາຍໃນ ແຫ່ງຣາຊະອານາຈັກກຳປູເຈຍ ປະຈຳປີ 2024; ໃນກອງປະຊຸມໄດ້ມີການສະຫຼຸບທອດຖອນບົດຮຽນ ແລະ ທົບທວນຄືນບົດບັນທຶກການຮ່ວມມືສອງຝ່າຍ ທີ່ໄດ້ຮ່ວມກັນລົງນາມ ໃນປີ 2023; ໃນໄລຍະໜຶ່ງປີຜ່ານມາ ທັງສອງຝ່າຍໄດ້ພ້ອມກັນຈັດຕັ້ງປະຕິ ບັດຕາມເນື້ອໃນຂອງບົດບັນທຶກການຮ່ວມມືປະຈຳປີ 2023 ທີ່ສອງກະຊວງໄດ້ລົງ ນາມຮ່ວມກັນ ຢ່າງຫ້າວຫັນ ແລະ ມີຜົນສຳເລັດໃນຫຼາຍດ້ານ ນັບທັງສູນກາງ ແລະ ທ້ອງຖິ່ນ ທີ່ມີເຂດແດນຕິດຈອດກັນ; ເຊິ່ງເປັນການປະກອບສ່ວນອັນໃຫຍ່ຫຼວງເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ເວົ້າລວມ, ເວົ້າສະເພາະແມ່ນ ລະຫວ່າງສອງກະຊວງ ນັບມື້ນັບແໜ້ນແຟ້ນຂຶ້ນເລື້ອຍໆ.
ຈາກຜົນສຳເລັດດັ່ງກ່າວນັ້ນ ໄດ້ເຮັດໃຫ້ສະພາບສັງຄົມຂອງແຕ່ລະປະເທດມີຄວາມສະຫງົບສຸກ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ; ນອກນັ້ນ, ຄະນະຜູ້ແທນຂັ້ນສູງ, ຄະນະຫ້ອງວ່າການກະຊວງ, ຂັ້ນກົມ-ກອງວິຊາສະເພາະຂອງສອງກະຊວງ, ຂັ້ນທ້ອງຖິ່ນ ກໍ່ໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຕະຫຼອດເຖິງການແລກປ່ຽຂໍ້ມູນຂ່າວສານ ແລະ ປະສານສົມທົບໃນການຮ່ວມມືກັນແກ້ໄຂບັນຫາປະກົດການຫຍໍ້ທໍ້ດ້ານຕ່າງໆ ຢູ່ໃນສັງຄົມ ເພື່ອຮັບປະກັນໃຫ້ສອງປະເທດມີຄວາມສະຫງົບ-ປະຊາຊົນດຳລົງຊີວິດດ້ວຍຄວາມປອດໄພ.
ສຳລັບທິດທາງແຜນການຮ່ວມມືປະຈຳປີ 2024 ທັງສອງຝ່າຍໄດ້ເປັນເອກພະພາບຮ່ວມມືກັນໃນຫຼາຍຂົງເຂດຮັກສາຄວາມສະຫງົບເຊັ່ນ: ການຮ່ວມມືຮັກສາຄວາມສະ ຫງົບ ແລະ ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ, ການກວດກາ ແລະ ຄວບຄຸມຢາເສບຕິດ, ວຽກງານຕ້ານການຄ້າມະນຸດ, ວຽກງານຮັກສາຄວາມສະຫງົບ-ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ ແລະ ການຂ້າມຊາຍແດນ, ການຮ່ວມມືໃນການສະກັດກັ້ນ ແລະ ຕ້ານອາຊະຍາກຳ ທາງໂທລະຄົມ ແລະ ຄອມພິວເຕີ, ການໂອນໂຕນັກໂທດຜູ້ທີ່ຖືກຕັດສິນລົງໂທດ, ການແລກປ່ຽນການຢ້ຽມຢາມຂອງຄະນະຜູ້ແທນ ແລະ ການກໍ່ສ້າງກຳລັງ.
ຕອນທ້າຍພິທີ, ກໍໄດ້ມີການລົງນາມບົດບັນທຶກວ່າດ້ວຍການຮ່ວມມື ລະຫວ່າງ ກະ ຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງຣາຊະ ອານາຈັກກຳປູເຈຍ ປະຈຳປີ 2024; ຝ່າຍກະຊວງປ້ອງກັນຄວາມສະຫງົບລາວ ລົງ ນາມໂດຍ ທ່ານ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ຝ່າຍກໍາປູເຈຍ ລົງນາມໂດຍ ທ່ານ ອະພິສັນຕິບັນດິດ ຊໍ ສົກຂາ ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນກຳປູເຈຍ.
ພາບ-ຂ່າວ: ພັຕ ຄຳແສງ ປັນຍາ
