ການແຂ່ງຂັນມະຫະກໍາກິລາໂອລິມປິກເກມສ໌ ປີ 2024 ທີ່ນະຄອນຫຼວງປາຣີ ປະເທດຝຣັ່ງ ເຊິ່ງຈະດໍາເນີນການແຂ່ງຂັນໃນລະຫວ່າງວັນທີ 26 ກໍລະກົດ – 11 ສິງຫາ ນັ້ນ.
ຫຼ້າສຸດ ” ປາຣີ 2024 ” ໄດ້ເປີດຕົວໂຄງການອາສາສະໝັກໂອລິມປິກ ແລະ ພາຣາລິມປິກ ຈໍານວນ 45.000 ຄົນຈາກທົ່ວປະເທດ ເພື່ອໃຫ້ມີສ່ວນຮ່ວມໃນການປະສົບຄວາມສໍາເລັດຂອງກິດຈະກໍາກິລາທີ່ຍິ່ງໃຫຍ່ທີ່ສຸດໃນໂລກ ໂດຍໂຄງການດັ່ງກ່າວຈະເປີດຮັບສະໝັກມາຕັ້ງແຕ່ເດືອນມີນາ 2023 ທີ່ຜ່ານມາ.
ສຳລັບງານກິລາໂອລິມປິກ ແລະ ພາຣາລິມປິກປາຣີ ອາສາສະໝັກ 45.000 ຄົນຈະເຄື່ອນຕົວໄປທົ່ວທຸກສະຖານທີ່ທາງການທັງໝົດ ລວມເຖິງສະຖານທີ່ແຂ່ງຂັນ ແລະ ສະຖານທີ່ສຳຄັນອື່ນໆ ເຊັ່ນ: ເຮືອນພັກນັກກິລາ, ສູນສື່ມວນຊົນຫຼັກ, ສະຖານທີ່ຝຶກຊ້ອມ, ສະຖານີລົດໄຟ ແລະ ສະຫນາມບິນ.
ການມອບໝາຍທີ່ອາດໄດ້ຮັບມອບໝາຍໃຫ້ອາສາສະໝັກໃນລະຫວ່າງເກມ ມີ 3 ປະເພດຫຼັກ ຄື: ການມອບໝາຍເພື່ອປັບປຸງຄຸນນະພາບຂອງປະສົບການຂອງທຸກຄົນທີ່ກ່ຽວຂ້ອງໃນເກມ, ການມອບໝາຍເພື່ອປັບປຸງປະສິດທິພາບດ້ານກິລາ ແລະ ການມອບຫມາຍເພື່ອອໍານວຍຄວາມສະດວກແກ່ອົງການຈັດຕັ້ງຂອງເກມ.