ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ແລະ ອົງການອຸຍນີເຊັບ ປະຈຳລາວ, ສະຖານທູດອົສຕຣາລີ, ອົງການຄອຍກາ ໄດ້ຈັດກອງປະຊຸມຕົວແທນເດັກທົ່ວປະເທດ ເພື່ອກະກຽມຕົວແທນເດັກເຂົ້າຮ່ວມກອງປະຊຸມລະດັບສູງ ພ້ອມທົບທວນການຈັດຕັ້ງປະຕິບັດວຽກງານສິດທິເດັກ ໃນ ສປປ ລາວ ໃນໂອກາດວັນຄົບຮອບ 34 ປີ ຂອງສົນທິສັນຍາວ່າດ້ວຍສິດທິເດັກ ຫຼື ເດັກໂລກ (20 ພະຈິກ 1989 ຫາ 20 ພະຈິກ 2023) ຂຶ້ນໃນລະຫວ່າງ ວັນທີ 18-20 ພະຈິກ ນີ້ ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ນາງ ມະນີວອນ ຫຼວງສົມບັດ ຫົວໜ້າຫ້ອງການ ຄຊກມດ, ທ່ານ ນາງ ເພຍ ເບລໂລ ບຣິດໂຕ ຜູ້ຕາງໜ້າ ອົງການອຸຍນີເຊັບ ປະຈໍາ ລາວ, ມີອົງການຈັດຕັ້ງສາກົນ, ຕົວແທນເດັກ ແລະ ໄວໜຸ່ມລາວ ຈາກ 18 ແຂວງທົ່ວປະເທດເຂົ້າຮ່ວມ.
ກອງປະຊຸມໃນຄັ້ງນີ້ຈັດຂຶ້ນ ເພືຶ່ອປຶກສາຫາລືກັນກ່ຽວກັບບັນຫາທີ່ພົ້ນເດັ່ນທີ່ສຸດທີ່ໄດ້ສ້າງຜົນກະທົບຕໍ່ຊີວິດການເປັນຢູ່ຂອງເດັກ-ໄວໜຸ່ມ ພ້ອມສະເໜີວິທີການ ແລະ ຊ່ອງທາງເພື່ອເປັນທາງອອກໃຫ້ກັບບັນຫາຕ່າງໆ. ໃນນັ້ນ, ຊາວໜຸ່ມຜູ້ເຂົ້າຮ່ວມ ໄດ້ສົນທະນາ ແລະ ຄົ້ນຄວ້າ ກ່ຽວກັບການປ່ຽນແປງອາກາດ ແລະ ໄພພິບັດ, ການແຕ່ງດອງຂອງເດັກກ່ອນໄວ ແລະ ການຖືພາຂອງເດັກ ແລະ ການປົກປ້ອງເດັກ ຈາກສື່ສັງຄົມອອນລາຍ ບັນຫາດັ່ງກ່າວລ້ວນແລ້ວແຕ່ເປັນຫົວຂໍ້ທີ່ເຄັ່ງຮ້ອນທີ່ພວມສ້າງຜົນກະທົບຕໍ່ໄວໜຸ່ມໃນປັດຈຸບັນ. ນອກຈາກນີ້, ຍັງໄດ້ຮັບຟັງການໃຫ້ຂໍ້ມູນ ແລະ ລາຍລະອຽດຂອງແຕ່ລະຫົວ ຂໍ້ຈາກກະຊວງກ່ຽວຂ້ອງ ແລະ ຊ່ຽວຊານ ໃນແຕ່ລະສາຂາ ເພື່ອເປັນບ່ອນອີງ ໃຫ້ການສົນທະນາ ແລະ ປຶກສາຫາລືຂອງຕົວແທນເດັກ ແລະ ໄວໜຸ່ມ. ໃນນັ້ນ, ຊາວໜຸ່ມຍັງໄດ້ເຂົ້າຮ່ວມການຝຶກອົບຮົມດ້ານພາວະຜູ້ນຳ ເພື່ອສະໜັບສະໜຸນ ໃຫ້ເຂົາເຈົ້າມີຄວາມສາມາດໃນການສື່ສານຜ່ານທາງສື່ທາງພາບ ແລະ ສຽງຕື່ມອີກ.
ທ່ານ ນາງ ມະນີວອນ ຫຼວງສົມບັດ ກ່າວວ່າ: ພັກ ແລະ ລັດຖະບານ ສປປ ລາວ ຍາມໃດກໍຖືສໍາຄັນ ແລະ ເອົາໃຈໃສ່ໃນການສົ່ງເສີມ, ປົກປ້ອງສິດ ແລະ ຜົນປະໂຫຍດອັນຊອບທໍາຂອງເດັກ, ການມີສ່ວນຮ່ວມ ແລະ ໄດ້ຮັບໂອກາດການພັດທະນາໃນດ້ານຕ່າງໆ ຕາມ 4 ສິດພື້ນຖານຂອງເດັກ ຊຶ່ງສະແດງອອກຢ່າງຈະແຈ້ງໃນແນວນະໂຍບາຍຂອງພັກ, ລັດຖະທໍາມະນູນ, ກົດໝາຍຂອງລັດ. ດັ່ງນັ້ນ, ຄຊກມດ ຈຶ່ງໄດ້ຊຸກຍູ້ສົ່ງເສີມ, ສະໜັບສະໜູນ ແລະ ສ້າງເວທີໃຫ້ເດັກ ໄດ້ປະກອບຄໍາຄິດເຫັນ ແລະ ສະແດງທັດສະນະຂອງຕົນ ເພື່ອໃຫ້ການນໍາ, ຄອບຄົວ, ຊຸມຊົນ ແລະ ສັງຄົມ ຮັບຮູ້-ຮັບຟັງບັນຫາກ່ຽວຂ້ອງກັບສິດ, ຜົນປະໂຫຍດ ແລະ ຜົນກະທົບ ຕໍ່ບັນຫາທີ່ກ່ຽວຂ້ອງກັບເດັກ ຄື ການປ່ຽນແປງອາກາດ ແລະ ໄພພິບັດ, ການແຕ່ງດອງຂອງເດັກກ່ອນໄວ ແລະ ການຖືພາຂອງເດັກ ແລະ ການປົກປ້ອງເດັກຈາກສື່ສັງຄົມອອນລາຍ ພວກເຮົາຈຳເປັນຕ້ອງໄດ້ຮັບຟັງສຽງຂອງຜູ້ທີ່ໄດ້ຮັບຜົນກະທົບສູງສຸດເຫຼົ່ານີ້.
ທ່ານ ນາງ ເພຍ ເຣເບລໂລ ບຣິດໂຕ ກ່າວວ່າ: ສິດທິເດັກ ແລະ ໄວໜຸ່ມ ໄດ້ຖືກຮັບຟັງລະບຸໄວ້ໃນກອງປະຊຸມດ້ານສິດທິເດັກ ຊຶ່ງ ສປປ ລາວ ໄດ້ເປັນຜູ້ລົງນາມໃນປີ 1991. ດັ່ງນັ້ນ, ກອງປະຊຸມຄັ້ງນີ້ແມ່ນວາລະທີ່ສຳຄັນຫຼາຍ ສຳລັບພວກເຮົາ ເພື່ອທີ່ຈະຮ່ວມກັນ ສົ່ງເສີມການໃຫ້ຄຳໝັ້ນສັນຍາ ຕໍ່ສິດທິເດັກ.
(ຂ່າວ-ພາບ: ວັນເພັງ)
