ຕາມຂ່າວຈາກ ວິທະຍຸ ສາກົນ ຫວຽດນາມ, ວັນທີ 6 ກັນຍານີ້ ອິນໂດເນເຊຍ ໄດ້ຈັດກອງປະຊຸມ ຂັ້ນສູງ ອາຊຽນ+3 ຄັ້ງທີ 26 (ສປ ຈີນ, ຍີ່ປຸ່ນ, ສ.ເກົາຫລີ) ແລະ ກອງປະຊຸມ ຂັ້ນສູງ ອາຊຽນ-ສ.ອາເມລິກາ ແລະ ອາຊຽນ-ການາດາ.ສຳລັບ ກອງປະຊຸມຂັ້ນສູງ ອາຊຽນ+3 ຄັ້ງທີ 26, ທ່ານ ຟ້າມມິນຈີງ, ນາຍົກລັດຖະມົນຕີ ຫວຽດ ນາມ ໄດ້ກ່າວເນັ້ນໜັກວ່າ: ອາຊຽນ +3 ຕ້ອງຍູ້ແຮງ ການແລກປ່ຽນ ດ້ານເສດຖະກິດ, ການຄ້າ, ການລົງທຶນ ແລະ ການເຊື່ອມຕໍ່ ຫລາຍຝ່າຍ; ເປີດກວ້າງ ບັນດາ ຂົງ ເຂດ ຮ່ວມມື, ໂດຍສະເພາະ ການຫັນເປັນ ດີຈີຕອນ, ເສດຖະກິດ ດີຈີຕອນ, ການຄ້າ ເອເລັກໂຕຣນິກ, ເຕັກໂນໂລຊີ ສີຂຽວ.ນອກນີ້ ຍັງຢືນຢັນວ່າ: ສສ ຫວຽດນາມ ພ້ອມ ແລ້ວ ທີ່ຈະສົມທົບກັນ ຊຸກຍູ້ ບັນດາ ຂອບການຮ່ວມມື ແມ່ນໍ້າຂອງ-ແມ່ນ້ຳລ້ານຊ້າງ, ແມ່ນ້ຳຂອງ-ຍີ່ປຸ່ນ ແລະ ແມ່ນ້ຳຂອງ-ສ.ເກົາຫລີ. ກອງປະຊຸມຂັ້ນສູງ ອາຊຽນ+3 ໄດ້ຮັບ ຮອງເອົາ ຖະແຫລງການ ກ່ຽວກັບ ການພັດທະນາ ລະບົບ ນິເວດ ລົດໄຟຟ້າ.ຂະນະທີ່ ກອງປະຊຸມ ຂັ້ນສູງ ອາຊຽນ-ສ.ອາເມລິກາ ຄັ້ງທີ 11, ທ່ານ ຟ້າມມິນຈີງ, ນາຍົກລັດຖະມົນຕີ ຫວຽດນາມ ສະເໜີໃຫ້ ອາຊຽນ ສົມທົບກັບ ສ.ອາເມລິກາ ຜັນຂະຫຍາຍບັນດາ ຂໍ້ລິເລີ່ມ ອະນາຄົດ ອາຊຽນ-ສ.ອາເມລິກາ ກ່ຽວກັບ ສຸຂະພາບ, ການສຶກ ສາ, ພະລັງງານ, ສິ່ງແວດລ້ອມ, ການປ່ຽນແປງ ຂອງດິນຟ້າອາກາດ, ການພັດທະນາ ແບບຍືນຍົງ. ເນື່ອງໃນໂອກາດນີ້, ທ່ານນາຍົກລັດຖະມົນຕີ ໄດ້ສະເໜີໃຫ້ ສ.ອາເມລິກາ ຊຸກຍູ້ ການຮ່ວມມື ແລະ ໜູນຊ່ວຍ ສສ ຫວຽດນາມ ໃນການຮັບມື ກັບການປ່ຽນແປງ ຂອງດິນຟ້າອາກາດ, ສືບຕໍ່ໜູນຊ່ວຍ ການພັດທະນາ ເຂດອະນຸພາກພື້ນ ແມ່ນ້ຳຂອງ ຜ່ານກົນໄກ ຮ່ວມມື ແມ່ນ້ຳຂອງ-ສ.ອາເມລິກາ. ກອງປະຊຸມ ຂັ້ນສູງ ອາຊຽນ-ສ.ອາເມລິກາ ຄັ້ງທີ 11 ໄດ້ຮັບຮອງເອົາ ຖະແຫລງ ການຮ່ວມ ກ່ຽວກັບ ການຮ່ວມມື ໂດຍອີງໃສ່ ພື້ນຖານ ທັດສະນະ ອາຊຽນ ກ່ຽວກັບ ມະຫາສະໝຸດ ອິນເດຍ-ປາຊີຟິກ (AOIP).ສ່ວນກອງປະຊຸມ ຂັ້ນສູງ ອາຊຽນ-ການາດາ, ທ່ານ ຟ້າມມິນຈີງ ນາຍົກລັດຖະມົນຕີ ຫວຽດນາມ ເນັ້ນໜັກວ່າ, ນີ້ແມ່ນ ຈຸດເວລາ ທີ່ເໝາະສົມ ເພື່ອຍົກການພົວພັນ ອາຊຽນ-ການາດາ ໃຫ້ຂຶ້ນເປັນ ຄູ່ຮ່ວມມື ຍຸດທະສາດ; ສະເໜີໃຫ້ ສອງຝ່າຍ ສຸມໃສ່ ຊຸກຍູ້ ການແລກ ປ່ຽນການຄ້າ, ການລົງທຶນ, ເຊື່ອມຕໍ່ ວິສາຫະກິດ ແລະ ປາດຖະໜາວ່າ ການາດາ ຈະໜູນຊ່ວຍ ບັນດາ ປະເທດ ອາຊຽນ ແລະ ອະນຸພາກພື້ນ ແມ່ນ້ຳຂອງ ໃນການຫັນປ່ຽນ ພະລັງງານ, ຫລຸດຜ່ອນ ບັນດາຜົນກະທົບ ແລະ ປັບຕົວເຂົ້າກັບ ການປ່ຽນແປງ ຂອງດິນຟ້າອາກາດ. ກອງປະຊຸມ ສຸດຍອດ ອາຊຽນ-ການາດາ ໄດ້ຮັບ ຮອງເອົາ ຖະແຫລງການ ວ່າດ້ວຍ ການເພີ່ມທະວີ ການຮ່ວມມື ຄ້ຳປະກັນສະບຽງ ອາຫານ ແລະ ໂພຊະນາການ ພາຍຫລັງ ວິກິດການ. ຂະນະດຽວກັນ ການນຳ ບັນດາ ປະເທດ ອາຊຽນ ສະເໜີ ໃຫ້ບັນດາ ຄູ່ຮ່ວມມື ສະໜັບ ສະໜູນ ຫລັກໝັ້ນຂອງ ອາຊຽນ ກ່ຽວກັບ ທະເລຈີນໃຕ້, ມຸ່ງໄປເຖິງ ການສ້າງ ທະເລຈີນໃຕ້ ໃຫ້ກາຍເປັນ ເຂດທະເລ ແຫ່ງສັນຕິພາບ, ສະຖຽນ ລະພາບ, ການຮ່ວມມື ແລະ ພັດທະນາ ແບບຍືນຍົງ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
