ວັນທີ 31 ກໍລະກົດ 2023 ທີ່ກະຊວງການຕ່າງປະເທດ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອໍາລາ ແລະ ໄດ້ຕາງໜ້າໃຫ້ລັດຖະບານລາວ ປະດັບຫຼຽນໄຊມິດຕະພາບໃຫ້ແກ່ທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ລາວ ໃນໂອກາດທີ່ໄດ້ສໍາເລັດການປະຕິບັດໜ້າທີ່ການທູດ ຕະຫຼອດໄລຍະ 4 ປີກວ່າ ຢູ່ ສປປ ລາວ ເພື່ອເປັນການຍ້ອງຍໍຊົມເຊີຍ ສັນສະເສີນ ແລະ ຈາລຶກຄຸນງາມຄວາມດີ ຕໍ່ຜົນງານໃນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຮ່ວມມືແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈີນ-ລາວ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ແຕກດອກອອກຜົນຢ່າງຕໍ່ເນື່ອງ.
ໃນໂອກາດນີ້ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການເຄື່ອນໄຫວວຽກງານຢ່າງຫ້າວຫັນຂອງທ່ານ ເອກອັກຄະລັດຖະທູດ ທີ່ໄດ້ຊຸກຍູ້ການພົວພັນ ແລະ ການຮ່ວມມື ລະຫວ່າງ ສອງປະເທດໃນຫຼາຍດ້ານເປັນຕົ້ນ ການປະກອບສ່ວນໃຫ້ແກ່ການລົງນາມ “ແຜນແມ່ບົດການສ້າງຄູ່ຮ່ວມຊາຕາກໍາ ລາວ-ຈີນ ຈີນ-ລາວ” ຊຸກຍູ້ ແລະ ອໍານວຍຄວາມສະດວກ ໃຫ້ແກ່ການເດີນທາງຢ້ຽມຢາມ ເຂົ້າຮ່ວມກອງປະຊຸມ ແລະ ສໍາມະນາທັງໃນຂອບສອງຝ່າຍ ແລະ ຫຼາຍຝ່າຍ ຂອງການນໍາຂັ້ນສູງຂອງສອງປະເທດ ຈາກສູນກາງ ແລະ ທ້ອງຖິ່ນ ຢ່າງເປັນປົກກະຕິ ຊຸກຍູ້ ແລະ ຈັດຕັ້ງປະຕິບັດໂຄງການກໍ່ສ້າງ “ໜຶ່ງແລວ ໜຶ່ງເສັ້ນທາງ”ພົ້ນເດັ່ນທີ່ສຸດ ໂຄງການທາງລົດໄຟ ລາວ-ຈີນ ເຊິ່ງເປັນໂຄງການໃຫຍທີ່ສຳຄັນ ແລະ ມີລັກຊະນະປະຫວັດສາດຂອງການຮ່ວມມື ລາວ-ຈີນ ລວມທັງໂຄງການກໍ່ສ້າງທາງດ່ວນ ວຽງຈັນ-ວັງວຽງ ໂຄງການກໍ່ສ້າງເຂດພັດທະນາກວມລວມໄຊເສດຖາ ໂຄງການກໍ່ສ້າງໂຮງໝໍມະໂຫສົດ ໂຄງການກໍ່ສ້າງເຂດພັດທະນາບຶງທາດຫຼວງ 8 ໂຄງການໃຫຍ່ ທີ່ລັດຖະບານ ສປ ຈີນ ໄດ້ປະກາດໃຫ້ການຊ່ວຍເຫຼືອ ສປປ ລາວ ແລະ ການຊ່ວຍເຫຼືອດ້ານອື່ນໆ ທີ່ຈໍາເປັນ ເປັນຈໍານວນຫຼວງຫຼາຍ.
ທ່ານ ເອກອັກຄະລັດຖະທູດ ໄດ້ສະແດງຄວາມຂອບໃຈເປັນຢ່າງສູງຕໍ່ພັກ ລັດຖະບານ ແລະ ປະຊາຊົນລາວ ໂດຍສະເພາະກະຊວງການຕ່າງປະເທດ ທີ່ໄດ້ໃຫ້ການຮ່ວມມື ສະໜັບສະໜູນ ຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ໃນຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ຈົນໄດ້ຮັບຜົນສໍາເລັດຢ່າງຈົບງາມ ພ້ອມທັງໄດ້ສະແດງຄວາມປິຕິຍິນດີ ແລະ ຂອບໃຈຕໍ່ລັດຖະບານ ແຫ່ງ ສປປ ລາວ ທີ່ໄດ້ໃຫ້ການຍ້ອງຍໍຊົມເຊີຍຜົນງານ ແລະ ປະດັບຫຼຽນໄຊມີດຕະພາບ ອັນມີຄວາມໝາຍສໍາຄັນ ໃຫ້ແກ່ຕົນໃນຄັ້ງນີ້ ເຊິ່ງຈະເປັນສັນຍາລັກອັນມີຄວາມໝາຍຄວາມສໍາຄັນ ຕໍ່ການປະກອບສ່ວນຊຸກຍູ້ສົ່ງເສີມສາຍພົວພັນມິດຕະພາບອັນເປັນມູນເຊື້ອ ການຮ່ວມມືແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈີນ-ລາວ ໃຫ້ຈະເລີນງອກງາມຍິ່ງໆຂຶ້ນ ພ້ອມທັງໄດ້ສະແດງຄວາມໝາຍໝັ້ນວ່າ ພາຍຫຼັງກັບຄືນປະເທດແລ້ວ ກໍ່ຍັງຈະສືບຕໍ່ປະກອບສ່ວນເຂົ້າໃນການສົ່ງເສີມການພົວພັນຮ່ວມມື ທີ່ເປັນມູນເຊື້ອອັນດີ ລະຫວ່າງ ສອງປະເທດ ລາວ-ຈີນ ໃຫ້ພັດທະນາ ແລະ ຂະຫຍາຍຕົວຍິ່ງໆຂຶ້ນ ເຊິ່ງທ່ານ ເອກອັກຄະລັດຖະທູດ ໄດ້ມີຄວາມຊົງຈໍາທີ່ດີຫຼາຍດ້ານຕໍ່ລາວ ແລະ ທັງຈະສືບຕໍ່ໂຄສະນາສິ່ງທີ່ດີງາມຂອງ ສປປ ລາວ ຕໍ່ ສປ ຈີນ ກໍ່ຄື ຕໍ່ສາກົນ.
