ເຊວຊີ ຫວັງຕັດໜ້າ ລີເວີພູລ ດ້ວຍການທຸ່ມເງິນບວກກັບນັກເຕະ ໃນການເຊັນສັນຍາ ຄິລິຢັນ ເອັມບັບເປ ນັກເຕະດາວດັງຂອງ ປາຣີ ແຊງ-ແຊກແມງ (PSG) ມາເສີມທັບ.
ສໍາລັບອະນາຄົດຂອງ ເອັມບັບເປ ກັບ PSG ເປັນໄປດ້ວຍຄວາມບໍ່ແນ່ນອນ ຫຼັງຈາກທີ່ນັກເຕະເຫຼືອສັນຍາກັບທີມເຖິງປີ 2024 ແຕ່ຜູ້ກ່ຽວຢືນຢັນແລ້ວວ່າເຂົາຈະບໍ່ໃຊ້ທາງເລືອກໃນການຂະຫຍາຍສັນຍາຕໍ່ໄປອີກ 1 ປີ.
ເຮັດໃຫ້ຕົ້ນສັງກັດຕ້ອງການຂາຍດາວເຕະອາຍຸ 24 ປີອອກຈາກທີມໃນຕະຫຼາດນັກເຕະໃນລະດູຮ້ອນນີ້ທັນທີ ໂດຍມີ ອັນ-ຮິລາວ ທີມຊື່ດັງຂອງຊາອຸດິອາຣາເບຍ ຍື່ນຂໍ້ສະເໜີເປັນສະຖິຕິໂລກຫຼາຍກວ່າ 300 ລ້ານເອີໂຣ ໃຫ້ກັບ PSP. ເຊິ່ງສະໂມສອນຕອບຮັບແລ້ວ ຢ່າງໃດກໍຕາມ, ນັກເຕະໄດ້ປະຕິເສດທີ່ຈະຍ້າຍໄປຄ້າຝີຕີນໃນ ຊາອູດິ ອາຣະເບຍ ເນື່ອງຈາກມີເປົ້າໝາຍຮ່ວມທີມ ຣິວ ມາດຣິດ.
ໂດຍກ່ອນໜ້ານີ້, ມີລາຍງານຈາກ “Mirror” ວ່າ ລິເວີພູລ ກໍາລັງຢູ່ໃນຂັ້ນຕອນການເຈລະຈາເພື່ອຂໍຢືມ ເອັມບັບເປ ໄປໃຊ້ງານເປັນເວລາໜຶ່ງລະດູການ ກ່ອນທີ່ນັກເຕະຈະໝົດສັນຍາໃນລະດູຮ້ອນໜ້າ.
ຈົນຫຼ້າສຸດ “Delhi Records” ລະບຸວ່າ ເຊວຊີ ກາຍເປັນທີມຫຼ້າສຸດເຊິ່ງໃຫ້ຄວາມສົນໃຈ ເອັມບັບເປ ໂດຍພວກເຂົາກໍາລັງເຈລະຈາດ້ວຍຂໍ້ສະເໜີທີ່ເປັນເງິນ ບວກກັບນັກເຕະເພື່ອປິດຂໍ້ຕົກລົງຂອງກອງໜ້າທີມຊາດຝຣັ່ງມາເສີມທັບໃນຕະຫຼາດລະດູຮ້ອນນີ້.
ນອກຈາກນັ້ນແລ້ວ ມີລາຍງານເພີ່ມເຕີມວ່າ ທ່ານ ນາສເຊີ ອັນ-ເຄໄລຟີ ປະທານສະໂມສອນ PSG ໄດ້ເວົ້າລົມໂດຍກົງກັບທ່ານ ທັອດ ໂບລີ ເຈົ້າຂອງທີມ ເຊວຊີ ກ່ຽວກັບຂໍ້ຕົກລົງການຍ້າຍທີມຂອງ ເອັມບັບເປ ດ້ວຍຕົວເອງ.
