ເມື່ອບໍ່ດົນຜ່ານມາ ລັດຖະບານຍີ່ປຸ່ນໄດ້ມອບການຊ່ວຍເຫຼືອພາຍໃຕ້ໂຄງການພັດທະນາເສດຖະກິດສັງຄົມ ໂດຍການມອບອຸປະກອນຕ່າງໆ ເພື່ອຍົກລະດັບຂະແໜງການປະມົງຂອງປະເທດລາວລວມມີມູນຄ່າທັງໝົດ 1,8 ລ້ານໂດລາສະຫະລັດ. ການຊ່ວຍເຫຼືອຄັ້ງນີ້ປະກອບມີໂຮງເພາະພັນປານິນ ເພື່ອເພີ່ມຂີດຄວາມສາມາດໃນການເພາະລ້ຽງສັດ ນໍ້າຂອງປະເທດລາວ ບັນດາອຸປະກອນຕ່າງໆຈະຖືກສົ່ງໄປຍັງແຂວງຊຽງຂວາງ ແລະ ສະຫວັນນະເຂດເພື່ອເພີ່ມຂີດຄວາມສາມາດໃນການຜະລິດປາເພື່ອການບໍລິໂພກຂອງປະຊາຊົນ.
ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນປະຈໍາ ສປປ ລາວ ໄດ້ເຂົ້າຮ່ວມພິທີມອບຮັບອຸປະກອນດັ່ງກ່າວຮ່ວມກັບ ທ່ານ ປອ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ທ່ານທູດ ໄດ້ກ່າວໃນພິທີມອບຮັບວ່າ: “ປານໍ້າຈືດຖືວ່າເປັນແຫຼ່ງໂປຕີນຈາກສັດທີ່ສໍາຄັນທີ່ສຸດຂອງປະເທດລາວ ແລະ ເປັນແຫຼ່ງໂພສະນາການທີ່ສໍາຄັນໂດຍກວມເອົາເຖິງ 50% ຂອງໂປຕີນຈາກສັດທີ່ບໍລິໂພກໃນປະເທດລາວ ການຮັບປະກັນແຫຼ່ງໂປຕີນ ແລະ ຄວາມຕ້ອງການດ້ານໂພສະນາການຕ່າງໆຍັງຖືເປັນບັນຫາອັນຮີບດ່ວນຂອງປະເທດລາວ ແຕ່ພັດວ່າບັນດາອຸປະກອນ ແລະ ສິ່ງອໍານວຍຄວາມສະດວກໃນການເພາະລ້ຽງປານ້ອຍພັດຍັງບໍ່ພຽງພໍ ດ້ວຍເຫດນັ້ນ ປະເທດຍີ່ປຸ່ນຫວັງວ່າໂຄງການດັ່ງກ່າວນີ້ຈະສົ່ງເສີມການພັດທະນາ ແລະ ເພີ່ມຂີດຄວາມສາມາດຂອງຂະແໜງການປະມົງໃນລາວໃຫ້ຍິ່ງຂຶ້ນ ແລະ ນໍາໄປສູ່ການປັບປຸງໂພສະນາການຂອງປະເທດລາວ.”
ຕໍ່ຄໍາເວົ້າຂອງທ່ານທູດ ທ່ານລັດຖະມົນຕີ ໄດ້ກ່າວຂອບໃຈ ແລະ ຮູ້ສຶກເປັນກຽດທີ່ໄດ້ເຂົ້າຮ່ວມພິທີມອບຮັບໃນຄັ້ງນີ້ ບັນດາອຸປະກອນທີ່ໄດ້ຮັບໃນຄັ້ງນີ້ ຈະນໍາໄປໃຊ້ເພື່ອເພີ່ມຂີດຄວາມສາມາດດ້ານການປະ ມົງຂອງປະເທດລາວ ແລະ ເຫັນໄດ້ຄວາມສຳຄັນໃນການນໍາໃຊ້ອຸປະກອນຢ່າງມີປະສິດທິພາບສູງທີ່ສຸດ ການຊ່ວຍເຫຼືອໃນຄັ້ງນີ້ ແມ່ນນິມິດໝາຍທີ່ສະແດງໃຫ້ເຫັນເຖິງສາຍພົວພັນອັນດີງາມຂອງສອງປະເທດຂະແໜງການປະມົງຂອງປະເທດລາວ ໄດ້ຮັບການຊ່ວຍເຫຼືອຈາກປະເທດຍີ່ປຸ່ນມາຕັ້ງແຕ່ປີ 2001 ແລະ ສູນແຫ່ງນີ້ກໍເຊັ່ນດຽວກັນ ແມ່ນໄດ້ຮັບການຊ່ວຍເຫຼືອດ້ານການສ້ອມແປງໃນປີ 2015 ເຊິ່ງເຮັດໃຫ້ພວກເຮົາສາມາດຈັດພິທີມອບຮັບໃນມື້ນີ້ໄດ້.
ລັດຖະບານຍີ່ປຸ່ນໄດ້ໃຫ້ການສະໜັບສະໜຸນຢ່າງຫຼວງຫຼາຍ ໃນຂະແໜງການປະມົງຂອງປະເທດລາວ ແລະ ຕໍ່ຈາກນີ້ໄປກໍເຊັ່ນດຽວກັນ ປະເທດຍິ່ປຸ່ນມີຄວາມຕັ້ງໃຈຢາກສືບຕໍ່ໃຫ້ການຮ່ວມມືຕໍ່ໄປ ນອກຈາກການສະໜັບສະໜູນດ້ານອຸປະກອນແລ້ວ ປະເທດຍີ່ປຸ່ນໃຫ້ມີການສົ່ງອາສາສະໝັກໄຈກ້າ ເພື່ອເປັນການປະ ກອບສ່ວນດ້ານການພັດທະນາຊັບພະຍາກອນມະນຸດ ແລະ ຖ່າຍທອດເຕັກນິກຄວາມຮູ້ວິຊາການດ້ານຂະ ແໜງການປະມົງຂອງປະເທດລາວ.
