ໃນວັນທີ 21 ກໍລະກົດ 2023 ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະພັກ ສນຊ ແລະຄະນະຮັບຜິດຊອບໂຄງການ ຫ້ອງສະໝຸດ ນາຄາວ ໄດ້ຈັດກອງປະຊຸມທາງໄກເພື່ອພົບປະເຮັດວຽກກັບແນວລາວສ້າງຊາດແຂວງຫົວພັນ ເຊິງນໍາໂດຍ ທ່ານ ວົງເພັດ ກຽນສິງຮັກ ກໍາມະການປະຈໍາພັກ ປະທານແນວລາວສ້າງຊາດແຂວງຫົວພັນ ມີພະແນກສຶກສາທິການ ແລະ ກີລາ ແຂວງ ແນວລາວສ້າງຊາດເມືອງ ວຽງໄຊ ແລະອຳນວຍການໂຮງຮຽນ ນາຄາວ ພ້ອມດ້ວຍພະນັກງານທີ່ກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງການລາຍງານໂດຍຫຍໍ້ກ່ຽວກັັບຜົນງານການເຄື່ອນໄຫວວຽກງານຂອງແນວລາວສ້າງຊາດແຂວງຫົວພັນ ໄລຍະຜ່ານມາ ໂດຍສະເພາະການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ 2 ວາລະແຫ່ງຊາດ ແລະຂະບວນການແຂ່ງຂັນຮັກຊາດ ແລະພັດທະນາ ທີ່ຕິດພັນກັບຂະບວນປະຕິບັດການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດໃນທົ່ວແຂວງ ຈາກນັ້ນ ກໍ່ໄດ້ຮັບຟັງການລາຍງານຫຍໍ້ວຽກງານແນວລາວສ້າງຊາດຢູ່ເມືອງວຽງໄຊ ວຽກງານກອງທຶນສາມັກຄີ ແລະ ພັດທະນາວຽກງານການກະກຽມອອກແບບ ແລະ ສ້າງຫ້ອງສະໝຸດ ຢູ່ ໂຮງຮຽນມັດທະຍົມສົມບູນ ນາຄາວ.
ພາຍຫຼັງຮັບຟັງການລາຍງານແລ້ວ ຜູ້ເຂົ້າຮ່ວມຢູ່ ສນຊ ກໍ່ໄດ້ແລກປ່ຽນຄໍາເຫັນທາງດ້ານວິຊາການ ຕໍ່ແຕ່ລະວຽກ; ໃນໂອກາດທີ່ມີເນື້ອໃນຄວາມໝາຍນີ້ ທ່ານ ສິນລະວົງ ຄຸດໄພທູນ ໄດ້ມີບາງຄໍາເຫັນໃຫ້ທິດຊີ້ນໍາ ແລະເນັ້ນໃຫ້ແນວລາວສ້າງຊາດແຂວງ ເມືອງ ຄະນະຮັບຜິດຊອບກອງທຶນສາມັກຄີພັດທະນາ ແລະ ວຽກງານຫ້ອງສະໝຸດ ເຊິ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ການນໍາພາຂົງເຂດວຽກງານຕົນ ມີໝາກຜົນຫລາຍດ້ານ ແລະ ໃຫ້ສືບຕໍ່ຮັກສາ ພ້ອມທັງເສີມຂະຫຍາຍມູນເຊື້ອອັນດີງາມ ໃຫ້ສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມຄົບຄະນະ ສນຊ ຕັ້ງທີ2 ສະໄໝທີ XI ມະຕິ 55 ຂອງ ສນຊ ວ່າດ້ວຍການສ້າງລາຍໄດ້ເພີ່ມ ສືບຕໍ່ສ້າງກອງທຶນສາມັກຄີ ແລະ ພັດທະນາຂັ້ນຕ່າງໆ ໃຫ້ກາຍເປັນ “ມູນມໍລະດົກຕົກທອດໃຫ້ລຸ້ນຕໍ່ໆໄປ” ໃນເດືອນສິງຫາທີ່ມານີ້ ແມ່ນເປັນເດືອນທີ່ມີຫຼາຍວັນສໍາຄັນທາງດ້ານປະຫວັດສາດ ແລະ ວັດທະນະທໍາຂອງຊາດ ສະນັ້ນ ຈົ່ງໄດ້ພ້ອມກັນ ສ້າງຂະບວນການຕ່າງໆ ບົນຈິດໃຈຮັກສາ ແລະ ເສີມຂະຫຍາຍມູນເຊື້ອການເປັນ ຖານທີ່ໝັ້ນການປະຕິວັດ ໃຫ້ຟົດຟື້ນ ແລະ ມີເນື້ອໃນດີ.
