ສະໂມສອນ ດອກປີກໄກ່ ແລັບດອກ ຊຶ່ງເປັນສະໂມສອນນ້ອງໃໝ່ ທີ່ຫາກໍ່ສ້າງຕັ້ງຂຶ້ນມາພາຍໃນປີນີ້ ສາມາດແຈ້ງເກີດຄວ້າແຊ໋ມການແຂ່ງຂັນກິລາດອກປີກໄກ່ ທົ່ວປະເທດ ຊີງຂັນປະທານສະຫະພັນດອກປີກໄກ່ແຫ່ງຊາດລາວ ຫຼື ສດລ ປະຈຳປີ 2023 ໄດ້ເຖິງ 2 ລາຍການ ຈາກປະເພດຊາຍຄູ່ທົ່ວໄປ ແລະ ຄູ່ປະສົມຍິງ-ຊາຍ ພ້ອມທັງຍາດໄດ້ ອັນດັບທີ 2 ເຖິງສອງລາຍການຈາກປະເພດຄູ່ຊາຍທົ່ວໄປ ແລະ ດ່ຽວຊາຍທົ່ວໄປ.
ການແຂ່ງຂັນກິລາດອກປີກໄກ່ ທົ່ວປະເທດ ຊີງຂັນປະທານ ສດລ ປະຈຳປີ 2023 ຈັດຂຶ້ນ ລະຫວ່າງວັນທີ 14-16 ກໍລະກົດ 2023 ທີ່ສະໂມສອນ ເຟຣມຊິບ ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມ ແລະ ມອບລາງວັນໂດຍທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ທັງເປັນປະທານ ສະຫະພັນດອກປີກໄກ່ແຫ່ງຊາດລາວ, ມີຄະນະບໍລິຫານງານສະຫະພັນ, ບັນດາຄະນະນຳແຕ່ລະສະໂມສອນ ແລະ ແຂວງ, ຄູຝຶກ ແລະ ນັກກິລາ ຕະຫຼອດບັນດາກອງເຊຍເຂົ້າຮ່ວມຊົມ-ເຊຍຢ່າງຫຼວງຫຼາຍ.
ການແຂ່ງຂັນດອກປີກໄກ່ ທົ່ວປະເທດ ຊີງຂັນທ່ານປະທານ ສດລ ປະຈຳປີ 2023 ໃນຄັ້ງນີ້ ມີການຊີງໄຊກັນທັງໝົດ 7 ລາຍການ ຊຶ່ງມີນັກກິລາເຂົ້າຮ່ວມ 112 ຄົນ, ຍິງ 21 ຄົນ ຈາກ 16 ສະໂມສອນ ແລະ 4 ແຂວງ. ຜ່ານການແຂ່ງຂັນໃນໄລຍະ 3 ວັນດັ່ງກ່າວ ຜົນປະກົດວ່າ: ລາຍການຄູ່ຍິງທົ່ວໄປ ຫຼຽນຄຳ ຕົກເປັນຂອງ ນາງ ທິດາຈັນ+ນາງ ພຸດສະຫວັນ ຈາກສະໂມສອນ ແລັບດອກ, ຫຼຽນເງິນ ນາງ ວິລະກອນ+ນາງ ປາວິນາ ຈາກສະໂມສອນ ກັບຕັນ ແລະ ຫຼຽນທອງ ຮ່ວມ ນາງ ປະທຸມພອນ+ນາງ ອຸດາວຽງ ຈາກສະໂມສອນ ເຟຣນຊິບ ແລະ ນາງ ນະພາວັນ+ນາງ ອາວູ ຈາກສະໂມສອນ ກັບຕັນ. ສ່ວນລາຍການຄູ່ຊາຍທົ່ວໄປ ຫຼຽນຄໍາ ເປັນຂອງ ທ້າວ ບຸນປະເສີດ+ທ້າວ ພຸດສະຫວັນ ຈາກສະໂມສອນ ກັບຕັນ, ຫຼຽນເງິນ ທ້າວ ນາມບຸນ+ທ້າວ ດາວວຽງໄຊ ສະໂມສອນ ແລັບດອກ ແລະ ຫຼຽນທອງຮ່ວມ ທ້າວ ມານັດ+ທ້າວ ໂພທິພອນ ຈາກ ສະໂມສອນ ກັບຕັນ ແລະ ທ້າວ ວິທະຍາ+ທ້າວ ສົມສຸກ ສະໂມສອນ ແລັບດອກ.
ສຳລັບລາຍການດ່ຽວຊາຍທົ່ວໄປ ຫຼຽນຄຳ ເປັນຂອງ ມານັດ ເພຍສຸລິນ ຈາກສະໂມສອນ ກັບຕັນ, ຫຼຽນເງິນເປັນຂອງທ້າວ ພອນສັກ ໂຊກທະວີ ສະໂມສອນ ແລັບດອກ ແລະ ຫຼຽນທອງຮ່ວມ ທ້າວ ພຸດສະຫວັນ ສະໂມສອນ ກັບຕັນ ແລະ ທ້າວຜາໄຊ ແສງຈະເລີນ ສະໂມສອນ ແລັບດອກ; ລາຍການຄູ່ປະສົມທົ່ວໄປ ຫຼຽນຄຳ ເປັນຂອງ ທ້າວ ນາມບຸນ+ນາງ ທິດາຈັນ, ຫຼຽນເງິນ ທ້າວ ບຸນປະເສີດ+ນາງ ອາວູ ສະໂມສອນ ກັບຕັນ ແລະ ຫຼຽນທອງຮ່ວມ ທ້າວ ດາວວີໄຊ+ນາງ ນາງ ອອນລີທູ ສະໂມສອນ ແລັບດອກ ແລະ ທ້າວ ໂພທິພອນ+ນາງ ວິລະກອນ ສະໂມສອນ ກັບຕັນ.
ຂະນະທີ່ ປະເພດຄູ່ເຍົາວະຊົນຊາຍ ຮຸ່ນອາຍຸ 17 ປີ ຫຼຽນຄຳ ເປັນຂອງ ທ້າວ ຊະນະ ສີຣິສັກ ຈາກສະໂມສອນ LGB+ທ້າວ ມານະສິນ ຈາກສະໂມສອນ ກັບຕັນ, ຫຼຽນເງິນ ທ້າວ ສຸລິເດດ ສະໂມສອນ ກັບຕັນ+ທ້າວ ສຸພະສອນ ສະໂມສອນ ເຄທີ ແລະ ຫຼຽນທອງຮ່ວມ ທ້າວ ວາລັດ+ທ້າວ ທະນົງສັກ ຈາກສະໂມສອນ ວິນເນີ ຫຼວງພະບາງ ແລະ ທ້າວ ທະວັດສິນ ສະໂມສອນ LGB+ທ້າວ ເພັດສະນະກອນ ຈາກສະໂມສອນ ກັບຕັນ; ລາຍການດ່ຽວເຍົາວະຊົນຊາຍ ຮຸ່ນອາຍຸ 17 ປີ ຫຼຽນຄຳ ເປັນຂອງ ທ້າວ ຊະນະ ສີຣິສັກ ຈາກສະໂມສອນ LGB, ຫຼຽນເງິນ ທ້າວ ມານະສິນ ຈາກສະໂມສອນ ກັບຕັນ ແລະ ຫຼຽນທອງຮ່ວມ ທ້າວ ພູບັນດິດ ສຸວັນນະວົງ ຈາກສະໂມສອນ ວິກເຕີຣີ 1268 ແລະ ທ້າວ ອານຸສິນ ຈາກສະໂມສອນ LGB; ລາຍການຄູ່ຊາຍສະໝັກຫຼິ້ນ ຫຼຽນຄໍາ ເປັນຂອງ ທ້າວ ແສງປະເສີດ+ທ້າວ ສຸລິໄຊ ຈາກເຈົ້າຖິ່ນ ສະໂມສອນ ເຟຣນຊິບ, ຫຼຽນເງິນ ທ້າວ ພຸດທະວົງ+ທ້າວ ສອນວິຈິດ ສະໂມສອນ ເຟຣນຊິບ ແລະ ຫຼຽນທອງ ຮ່ວມ ທ້າວ ປິຍຸບຸດ+ທ້າວ ທ້າວ ສົມພອນ ສະໂມສອນ ເຟຣນຊິບ ແລະ ທ້າວ ສິດປະເສີດ+ທ້າວ ສຸພະໄຊ ຈາກສະໂມສອນ ເຄທີ.
ຂ່າວໂດຍ: ສົງການ ພັນແພງດີ
